АР-м и Къэралыгъо автоинспекцие кIэщакIо зыфэхъугъэ пресс-зэIукIэ гъэсэныгъэ тедзэ зыщарагъэгъотырэ Гупчэм тыгъуасэ щыкIуагъ.

Ар зыныбжь имыкъугъэ кIэлэцIыкIу-водительхэр зыхэфэрэ гъогу хъугъэ-шIагъэхэр дэгъэзыжьыгъэнхэм фэгъэхьыгъагъ.
Iофтхьабзэм хэлэжьагъэх АР-м и Къэралыгъо автоинспекцие зэхэщэн-зэфэхьысыжь Iоф­шIэнымкIэ ыкIи пропагандэмкIэ иотдел ипащэу, полицием иподполковникэу Бзэджэжъыкъо Мурат, гъэсэныгъэ тедзэ зыщарагъэгъотырэ Гупчэм ипащэу Наталья Щербина, кIэлэцIыкIухэм яфитыныгъэхэр къэу­хъумэгъэнхэмкIэ Уполномо­ченнэу Наталья Агеевар, ныбжьыкIэхэм я Урысые Союз и Адыгэ шъолъыр къутамэ итхьаматэу Абрэдж Заур.
Зыныбжь имыкъугъэхэр зы­хэфэрэ авариехэм япчъагъэ зэхапшIэу зэрэ Урысые фэдэу Адыгейми зыкъызэрэщиIэтыгъэм къыхэкIэу, ахэр нахь макIэ шIыгъэнхэм, къэмыгъэхъугъэнхэм афэIорышIырэ Iоф­тхьэбзэ зэфэшъхьафхэр ти­шъолъыр щызэхащэнхэу ра­гъэжьагъ. Непэрэ пресс-зэIукIэр егъэжьапIэ ащ фэхъугъ.
Пэублэ гущыIэхэмкIэ Наталья Щербина къэзэрэугъоигъэхэм закъыфигъазэзэ, гъогу фыкъоныгъэхэр дэгъэзыжьыгъэнхэмкIэ Гупчэр гъэсэныгъэ тедзэ зыщы­рагъэгъотырэ Гупчэм икъутамэу зэрэщытыр ыкIи АР-м и Къэралыгъо автоинспекцие зэпхыныгъэ дыряIэу яIофшIэн илъэс пчъагъэ хъугъэу зэрагъэпсырэр къыхигъэщыгъ.
— ЖъоныгъокIэ мэфэкI ма­фэхэм ыкIи гъэмэфэ зыгъэпсэфыгъо лъэхъаныр зыщырагъэ­жьэщтхэм япэгъокIэу тызэрэзэ­рэугъоигъэм мэхьанэ иI. Зыныбжь имыкъугъэхэр зыхэфэрэ гъогу хъугъэ-шIагъэхэм япчъагъэ зыпкъитыныгъэ иIэным фэшI зэкIэми ткIуачIэ зэхэлъэу тызэрэзэдэлэжьэщтым теусагъ. Ар зыфэгъэхьыгъэр: ны-тыхэр, кIэ­лэцIыкIухэр, гъэсэныгъэм иучреждениехэр ыкIи автоин­спекторхэр, — къыхигъэщыгъ Наталья Щербина.
Тишъолъыр игъогухэм къатехъухьэгъэ хъугъэ-шIагъэхэм япчъагъэ, ахэм кIэлэцIыкIухэм фыкъоныгъэу хахыгъэхэм, ушъхьагъоу афэхъугъэхэм афэгъэ­хьыгъэу къэгущыIагъ Бзэджэ­жъыкъо Мурат. Джащ фэдэу Iофыгъо анахьэу къызхэкIыхэрэм мототранспортыр зэращыщым къэзэрэугъоигъэхэм анаIэ тыраригъэдзагъ. Ащ къызэрэхи­гъэщыгъэмкIэ, а транспорт лъэпкъым щынагъоу къыхэкIын ылъэкIыщтым икъоу ны-тыхэр емыгупшысэхэу якIэлэцIыкIухэм къафащэфы ыкIи зефэнымкIэ фитыныгъэ ямыIэу агъэфедэх. Хэбзэнчъэ зекIуакIэхэм пшъэ­дэкIыжьэу апылъхэм пропагандэмкIэ отделым ипащэ ягугъу къышIыгъ.
— Непэ анахьэу кIэлэцIыкIу-водительхэм тынаIэ зыкIатетыдзагъэр ахэм ялажьэкIэ авариехэм зэрахэхъуагъэр ары. 2023-рэ илъэсым ебгъапшэмэ, икIыгъэ илъэсым зыныбжь ­имыкъугъэхэр зыхэфэгъэ гъогу хъу­гъэ-шIагъэхэр процент 13-кIэ нахьыбэ хъугъэ ыкIи, гухэкI нахь мышIэми, ахэм нэбгыри 8 ахэкIодагъ. 2025-рэ илъэсым имэзищ тштэмэ, пчъагъэхэм зыкъэзэраIэтырэр тинэрылъэгъу, пстэумкIи аварие 17 тигъогухэм къатехъухьагъ, зы нэбгырэ ахэкIодагъ, 17-мэ шъобжхэр хахыгъэх. Илъэси 3 — 4-кIэ узэкIэIэбэжьымэ, зыныбжь имы­къугъэхэр зыхэфэрэ гъогу хъугъэ-шIагъэхэр процент 40 — 45-кIэ нахьыбэ хъугъэх. Къыхэ­гъэщыгъэн фае ыпэкIэ лъэс­рыкIо е пассажирэу къадисыгъэхэр арымэ фыкъощтыгъэхэр, джы нахьыбэр кIэлэцIыкIу-во­ди­тельхэм ялажьэкIэ мэхъу. Ар къызхэкIырэр гъогурыкIоным ишапхъэхэр икъоу амышIэхэу, зефэнымкIэ IэпэIэсэныгъэ, во­дительскэ удостоверение ямыIэу спорт-мототранспортхэр зэрэзэрафэхэрэр ары, — хигъэунэфыкIыгъ Бзэджэжъыкъо Мурат.
Мотоциклэ лъэпкъ зэфэшъхьафхэр, кушъхьэфачъэр, электросамокатхэр зыныбжь имыкъугъэхэм хэбзэнчъэу зэрэзэрафэхэрэр непэ Iофыгъошхоу къэуцугъэхэм ащыщ. Мыр зэрафэныр лъэшэу ныбжьыкIэхэм агу рехьы, ау ащ щынагъоу хэлъыр, зэкIэ зыщызекIохэрэ гъогум ащ урытехьанэу зэрэщымытыр икъоу къагурыIорэп. Шъыпкъэ, ащ фыхэхыгъэ хэу­шъхьафыкIыгъэ чIыпIэхэр Адыге­им щыгъэпсыгъэхэп, ау ащ къи­кIырэп хэбзэнчъэу къырекIо­кIынхэр.
Iофыгъом идэгъэзыжьынкIэ Адыгеим и Къэралыгъо автоинспекцие зэдэлэжьэныгъэ къулыкъу зэфэшъхьафхэм адигъэпсыгъ: гъэсэныгъэмрэ шIэныгъэмрэкIэ Министерствэм, гъэсэныгъэ тедзэ зыщызэрагъэ­гъотырэ Гупчэм, ныбжьыкIэхэм я Урысые Союз и Адыгэ шъо­лъыр къутамэ. Мэлылъфэгъум къыщегъэжьагъэу тыгъэгъазэм нэс Iофтхьабзэу рагъэкIокIыщтхэм яплан зэхагъэуцуагъ. Тыз­хэт мазэр екIыфэ Мыекъуапэ ыкIи муниципалитетхэм игъэкIотыгъэу ны-тыхэм язэIукIэхэр ащырагъэкIокIыщтых. Ахэм яшIуагъэ къакIоу алъытагъ.
— Шапхъэхэм атетэу гъогум щызекIонхэм яцIыкIугъом къыщегъэжьагъэу ахэр фэпIугъэн-
хэр ны-тыхэм япшъэрылъ. Нэ­ужым ащ къыщежьэ щынэгъончъагъэр. Гъогу щынэгъончъэхэр кIэлэцIыкIухэм яIэным тэ тыпылъыщт, — къыIуагъ пропагандэмкIэ отделым ипащэ.
Адыгеим иныбжьыкIэхэм я Союз ипащэу Абрэдж Заур автоинспекцием игъусэу зэрэзэдэлажьэхэрэм къытегущыIагъ. Проектэу, зэIукIэгъухэу, фору­мэу зэдызэхащэхэрэм ар къащыуцугъ.
— ГъогурыкIоныр щынэгъончъэным фэIорышIэрэ Iофтхьэ­бзэ зэфэшъхьафхэр Адыгэ къэ­ралыгъо университетым, Мые­къопэ медицинэ колледжым, Мыекъопэ индустриальнэ техникумым ащызэхэтщагъэх. Сту­денческэ форумэу «Ошъутенэм» нэбгырэ 300 фэдиз зэрипхыгъ, ащи гъогурыкIоным ишапхъэхэр, хъугъэ-шIагъэу гъо­гум къа­те­хъухьанхэ ылъэкIыщтхэр щызэхэтфыгъэх. ТапэкIэ джыри тыздэлэжьэщт лъэны­къохэр дгъэнэфагъэх, буклет 1000 фэдизэу ядгъэшIыгъэр дгощыщтых, видеороликхэр тетхыщтых, нэмыкIхэри, — хигъэунэфыкIыгъ Абрэдж Заур.
ЯIофшIэнкIэ лъэныкъо гъэнэфагъэу къыхахыгъэхэр пресс-зэIукIэм къыщаIотагъэх, ахэр зэкIэ зыныбжь имыкъугъэхэр зыхэфэрэ гъогу хъугъэ-шIагъэ­хэр нахь макIэ шIыгъэнхэм фэIорышIэщтых.
Iэшъынэ Сусан.