ДзюдомкIэ зэнэкъокъоу Ермэлхьаблэ щыкIуагъэм зыныбжь илъэс 15-м емыхъугъэхэр хэлэжьагъэх. Урысыем и Къыблэ ишъолъыр 11-мэ яспортсмен 464-мэ заушэтыгъ.

Командэм нэбгырэ пчъагъэу хэтымкIэ Адыгэ Республикэмрэ Ростов хэкумрэ ятIонэрэ чIыпIэм щытыгъэх, шъолъыритIум спорт­смен 60 зырыз къагъэлъэгъуагъ. Краснодар краим икуп дзюдоисти 163-рэ хэтыгъ, ахэм медаль 56-рэ къахьыгъ.
Адыгеир кIэлэ 55-мэ ыкIи пшъэшъи 5-мэ къагъэлъэгъуагъ. Анахь къахэщыгъэхэр Шэуджэн районым илIыкIохэр ары. Килограмм 50-м нэс къэзыщэчыхэрэм якуп хэтыгъэхэ Къэлэшъэо Астемиррэ Мэрэтыкъо Арамбыйрэ финалым щызэIукIагъэх. Астемир текIоныгъэр къыдихыгъ, Арамбый ятIонэрэ хъугъэ. Тренер-кIэлэ­егъаджэхэу Мерэм Анзауррэ Акъущ Бислъанрэ агъэсэрэ Ахы­джэго Айдар дышъэ медаль къы­хьыгъ. Килограмм 55-м нэс къэзыщэчыхэрэм якуп зыщызыушэтыгъэ ХьакIэмыз Рэмэзан ятIо­нэрэ чIыпIэр къыфагъэшъошагъ. Джащ фэдэу Владимир Порфировым, Iэшъхьэмэфэ Салим ыкIи Георгий Феодосиади джэрз медальхэр къахьыгъэх.