Мыекъопэ «АГУ-Адыифым» итренерхэм ащыщ хъужьыгъэ Никита Голуб.

ИлъэсиплIыкIэ узэкIэIэбэжьмэ ащ тикомандэ ыгъасэщтыгъ. А уахътэм тигандболисткэхэр «Динамо-Синарэм», «Ставро­польем», «Лучым», «Уфа-Алисэм» «Университетым» атекIуагъэх. 2021-рэ илъэсым щегъэ­жьагъэу 2024-м нэс Никита Голуб «Кубань» (Краснодар) Iоф щишIагъ. Игупсэ клуб къыгъэзэжьыным ыпэкIэ спорт еджапIэу С.М. Джэнчатэм ыцIэ зы­хьырэм тренерэу Iутыгъ.
Шъугу къэдгъэкIыжьын, мы тренерым ыгъэсагъэхэм ащыщхэр (2002 — 2003-рэ илъэсхэм къэ­хъугъэхэр) Урысыем и Суперлигэ пэрытныгъэ щызыIыгъ коман­дэхэм ащешIэх. ГущыIэм пае, «ЦСКА-м», «Черноморочкэм», «Астраханочкэм» ыкIи «Кубаним».
Мэлылъфэгъум и 29-м «АГУ-Адыифым» зичэзыу ешIэгъу иIэщт, Ижевскэ икомандэу «Университетым» IукIэщт.