Шъачэ ыкIи ТIопсэ ­шъолъырым ащыпсэурэ быслъымэнмэ Бирам мэфищыр игъэкIотыгъэу хагъэунэфыкIыгъ. Быс­лъымэн диным ипкъэуитфымэ язырэу щыт НэкIмазэр апэрэу ыIы­гъыгъ «Адыгэ макъэм» икорреспондентэу мы сатырхэр къэзытхы­гъэми.

Сэ сшъхьэкIэ къезгъэжьэн. Шъыпкъэр пIощтмэ, ахэр сэркIэ мэфэ щэкI къызэрыкIуагъэхэп. Мэзэ псаум лъэшэу узылъы­плъэжьэу, угукIи пшъхьэкIи урэ­хьатэу, уишэни, угукIуачIи псыхьагъэхэу ущытын фэягъ. ТхьэшIошъхъуныгъэ симыIэу, ау силъэпкъкIэ сыбыслъымэнэу, сэркIэ нэкIэу сIыгъыгъэр шъхьэ­кIэфагъэу ижъырэ хабзэхэм афэсшIырэ Iахьэу хъугъэ, си­амал сыуплъэкIугъэ, гушъхьэ укъэбзын гъогур скIугъэ. Ащ имызакъоу, диным фэшъып­къэхэр пэрыохъухэм зэрапхырыкIхэрэр, щэIагъэу яIэр зэхэс­шIагъ. Сфэгъэхъугъ. Гъомылапхъэу зыIуилъхьэрэр бэкIэ нахь макIэ ышIызэ, ынэкIызэ цIыфыр зыпкъ еуцожьы, ыгукIи ышъокIи нахь къабзэ мэхъу, игупшы­сэ­хэри зэрегъэзафэх. Специалистхэм, ахэр чыристан, быслъымэн, иудей, буддэм ыкIи нэмыкI динхэм арылажьэхэу щытхэми, диныр зылэжьырэ цIыф къызэрыкIохэми, шIуагъэу нэ­кIым къытэу хагъэунэфыкIыхэ­рэр къэзгъэшъыпкъэжьынхэ слъэкIыщт.
НэкIмэзэ мазэр мэкIофэ быс­лъымэнмэ нэмаз ашIыщтыгъ, Тхьэм елъэIущтыгъэх, IэпыIэгъу зищыкIагъэмэ ара­гъэкIыщтыгъ, шIушIэ Iофтхьа­бзэхэр зэрахьэщтыгъ. Ащ фэдизым ахэр зыфэягъэхэр зы: гунахьшIагъэу яIэхэр Алахьым къафигъэгъунхэр ары. ШIошъхъуныгъэ зиIэхэм зэрэхагъэунэфыкIырэмкIэ, агукIи ашъокIи зызаукъэбзыжьырэ ужыр ары быслъымэнхэр диным ихабзэхэм нахь апэблагъэ зыхъухэрэр.
БлэкIыгъэ илъэсхэм афэдэу, Бирамыр быслъымэнхэр зыщыпсэурэ чIыпIэхэм зэкIэми ащыхагъэунэфыкIыгъ. Темыр Кавказым иреспубли­кэмэ зэ­кIэмэ мэфищ зыгъэпсэфыгъо мафэхэр ащафашIыгъэх. НэкIмазэр зэраухыгъэм фэгъэ­хьыгъэ Iофтхьабзэхэри къалэу Шъа­чэ щыкIуагъэх. МэфэкIым ипэгъокIэу муниципалитетым иадминистрацие зэхэсыгъоу щы­кIуагъэм Iофтхьабзэу зэхащэщтхэм ащытегущыIагъэх, зэхэсыгъом тхьаматагъор щызэрихьагъ къалэм ипащэ игуа­дзэу Галина Москалевам.
МэфэкIыр тхьэлъэIукIэ ра­гъэжьагъ. ШIошъхъуныгъэ зиIэ нэбгыришъэм ехъу мэфэкI нэмаз ашIынэу ТIопсэ шъолъырым хэхьэрэ ШIоикъо щызэрэугъоигъэх, джащ фэдэу Шъачэ и ПсышIопэ район ит къуаджэу ШэхэкIэй, тарихъ-мэщыт закъоу къэлэ-курортым ишъолъыр итым щызэхэхьагъэх. Шъачэ щыIэ ислъам культурнэ Гупчэм кIэлэцIыкIухэм апае мэфэкI зэхахьэ щырагъэкIокIыгъ. ЗэхэщакIохэм — Адыгэ Республикэм ыкIи Пшызэ шъолъыр ащыпсэурэ быслъымэнхэм я ДиндэлэжьапIэ илIыкIохэм — НэкIмазэм фэгъэхьыгъэ зэнэкъо­къухэм ныбжьыкIэхэр ахагъэлэжьагъэх. ЗэкIэми шIухьафтынхэр, IэшIу-IушIухэр аратыгъ. НахьыжъыIохэм КъурIаным фэ­гъэхьыгъэ гъэсэныгъэ лекциехэр афызэхащагъэх.
«Илъэсишъэ пчъагъэхэм Бирамым цIыфхэм ягушъхьэбаиныгъэ хегъахъо, лъэпкъ зэфыщытыкIэхэр егъэпытэх, мамыр­ныгъэм, шIум, шъхьэкIэфэныгъэ зэфашIыным фепIух, ти Хэгъэгу зыкIыныгъэрэ кIуачIэрэ иIэным афэлажьэ», — къыщыхагъэщыгъ ислъам культурнэ Гупчэм.
НэкIмэзэ мафэхэм Шъачэ щыпсэурэ быслъымэнмэ кIэлэцIыкIу зыгъэпсэфыпIэхэу «Налмэс-налкъутэм» — сабыйхэм яхэушъхьафыкIыгъэ унэ — шIу­шIэ IэпыIэгъу фашIынэу унашъо ашIыгъ. Мыщ щагъэхъужьых сабыйхэу зижьыкъащэ, зинер­вэхэр зэщыкъуагъэхэр.
«Термоконтейнер инитIу, кIэ­лэцIыкIу джэгуалъэхэр, Iэгуао­хэр, батарейкэхэр ахэм афащагъ, — къыщыкIагъэтхъыгъ Гупчэм. — Шъачэ щыпсэурэ быслъымэнхэм яобщинэ тапэкIи учреждением IэпыIэгъу фэ­хъузэ ышIыщт».
НэкIмэзэ мафэхэм шIушIэ Iофтхьабзэхэр къалэм щызэ­хащэгъагъэх — гъомылэпхъэ Iалъмэкъхэр ыкIи IэшIу-IушIухэр ветеранхэм, пен­сионерхэм, унэгъо Iужъухэм, зизакъо­хэм ыкIи сымаджэхэм, кIэлэцIыкIухэу курортым ипсэу­пIэ зэфэшъхьафхэм ащыпсэу­хэрэм аратыгъэх.
Бирамыр зыщыхагъэунэ­фыкIырэ мафэхэм Шъачэ ыкIи ТIо­­псэ муниципальнэ шъолъырым ащыпсэурэ адыгэхэм хабзэ зэрафэхъугъэу, къэхалъэхэр къа­кIухьагъэх, жъамэ агъэугъ, хьакIэмэ Iанэхэр афызэIуахыгъ.
Ныбэ Анзор.
Сурэтыр: Адыгэ Республикэм ыкIи Пшызэ шъолъырым ащы­псэурэ быслъымэнхэм я диндэлэжьапI.