Адыгеим ибзылъфыгъэхэм я Союз икъутамэу Тэхъутэмыкъое районым щыIэм ипащэу Шыупэщэ Къадырхъан Урысые Федерацием и Президент и Рэзэныгъэ тхылъ къыфигъэшъошагъ.

Шыупэщэ Къадырхъан къуаджэу Козэт щэпсэу, культурэм и Унэ ипащэу илъэ­сыбэ хъугъэу мэлажьэ.
Къадырхъан бзылъфыгъэ чан, ны Iуш, шъхьэгъусэ акъылышIу, пшъэшъэгъу пыт, ныжъ Iушъаб. ГукIэгъоу хэлъым, фэбэныгъэу къыпкъырыкIырэм цIыфыбэ зыфещэ.
Адыгеим ибзылъфыгъэхэм я Союз непэ Iофыбэ зэшIуехы. ГуфэкIо купхэр бзылъфыгъэхэм ярайон организацие зэхищагъэхэу мэлажьэх. Къадырхъан зипэщэ купыр нэбгыри 150-рэ мэхъу. 2023-рэ илъэсыр къызехьэм, нэбгырэ 44-рэ зэкIэмкIи ащ хэтыгъэр. Ащ фэдэу илъэс закъом бэу къызэрэхэхьагъэм Iофэу ашIэрэм шIуагъэ къызэрихьырэр, организацием мэхьэнэшхо зэриIэр къеу­шыхьаты.
— Бзылъфыгъэр Тхьэм къызфигъэхъурэр сабый ыпIуныр, хъулъфыгъэм, унагъом кIэгъэкъон афэхъуныр, ахэм акIыгъужьэу ыгу зыфэкIорэ сэнэхьатыр ыгъотыныр ары. Сыздэлэжьэрэ Iофым Урысые Федерацием и Президент и Рэзэныгъэ тхылъ къыкIэкIуагъ. Насыпыгъэба! ЗэкIэ къыздэхъугъ, — къеIуатэ Къа­дырхъан.
Бзылъфыгъэу къутамэм хэтхэр сэнэ­хьат зэфэшъхьафхэм арэлажьэх: врачых, кIэлэегъаджэх, кIэлэпIух, сатыушIых, социальнэ IофышIэх, пщэрыхьакIох… Нахьыбэм унагъохэр, сабыйхэр яIэх. Ары пакIошъ, сабыибэ зыпIухэрэри ахэтых. Ау ащ пае къэмынэу Iофтхьабзэу зэхащэхэрэм чанэу ахэлажьэх, шIушIэ IэпыIэгъум иугъоин яIахьышхо хэлъ. Бзылъфыгъэхэм унагъори, хъызмэт Iоф­шIэнри зэдагъэцэкIэн алъэкIы. Ащ уигъэ­гушхонэу щыт.
— Iофтхьабзэу районым щызэхатщэхэрэм чанэу къахэлажьэ, шIушIэ IэпыIэгъум яIахьышхо хашIыхьэ. Непэ анахьэу тынаIэ зытетхэм ащыщых хэушъхьафыкIыгъэ дзэ операцием хэлажьэхэрэм, ахэм яунагъохэм IэпыIэгъоу республикэм аритырэм тиIахь хэтлъхьаныр, шIушIэ IэпыIэгъу къэтыугъоиныр. ДзэкIолIхэм апае хъытыухэр тэхъых, щыгъынхэр тэдых. ШъолъырыкIэу Урысыем къыхэ­хьажьыгъэхэми талъыIэсыгъ. ГущыIэм пае, районым итхылъеджапIэхэм яIофышIэу организацием хэтхэм тхылъхэр къаугъоихи, кIэлэцIыкIухэм афэттIуп­щыгъ, — еIо тигущыIэгъу.
ТигущыIэгъу къызэриIуагъэмкIэ, 2023-рэ илъэсым бзылъфыгъэхэм яорганизациеу субъектхэм ащызэхащагъэхэм яинтернет нэкIубгъохэм ащыщэу анахьыбэу зыфыкIатхэхэрэр Урысыем зыщызэрагъапшэм, Адыгеим ибзылъфыгъэхэм я Союз апэриплIым ахэфагъ. Ащ Тэхъутэмыкъое районым щыIэ къутамэм ишIушIэгъэшхо хэлъ, анахь чанэу «подписчикхэр» къыугъоигъэх. Ащ фэшI сомэ мини 100 грантэу къаратыгъ.
— ТекIоныгъэу къыдэтхыгъэм къыкIэкIогъэ ахъщэр ным и Мафэ фэгъэхьыгъэ Iофтхьабзэм изэхэщэн пэIудгъэхьагъ. Ащ сабыибэ зиIэхэр, хэушъхьафыкIыгъэ дзэ операцием хэлажьэхэрэм янэхэр, яшъхьэгъусэхэр щыдгъэшIуагъэх, — еIо Къадырхъан.
Бзылъфыгъэхэм я Союз иустав къы­дыхэлъытагъэу, хабзэм готхэу, ащ иамал­хэр къызфагъэфедэзэ бзылъфыгъэ­хэм, унагъохэм адэIэпыIэх, кIэлэцIыкIу­хэм яфэIо-фашIэхэр агъэцакIэх, ахэр зыфэныкъохэр арагъэгъоты. ЦIыфыбэм ягукIаерэ яшIоигъоныгъэрэ проектыкIэхэмкIэ гъэцэкIагъэ мэхъу. УпчIэу, гумэкIыгъоу къэуцухэрэр хабзэм ра­хьылIэх.
— Сыд фэдизэу бзылъфыгъэхэм тычанми, хъулъфыгъэ IэпыIэгъу сыдигъокIи тищыкIагъ. Тирайон ипащэхэм лъэшэу анаIэ къызэрэттетыри къыхэзгъэщымэ сшIоигъу. Общественнэ Iофэу тшIэрэм епхыгъэу лъэIу тиIэу зафэдгъэзагъэмэ, къыддеIэх, шIушIэ IэпыIэгъу тыугъоигъэмэ, ар зэрэтщэщт транспортыр къы­таты, — лъегъэкIуатэ игущыIэ Къадырхъан.
Культурэм и Унэу Шыупэщэ Къадырхъан зипащэм кружок 12 щэлажьэ. Ахэр инхэм ыкIи цIыкIухэм апай: орэд къаIо, къэ­шъох, къэгъэлъэгъонхэр агъэуцух. ПстэумкIи нэбгыри 171-рэ ахэм ахэт. Козэт икультурнэ щыIэныгъэ ахэр ылъап­сэх, сыд фэдэрэ Iофтхьабзи чанэу хэла­жьэх.
— Адыгеим культурэм ипсэуалъэу итхэр аужырэ илъэсхэм игъэ­кIоты­гъэу зэтырагъэ­псыхьа­жьых, ащкIэ лъэпкъ проектыр IэпыIэгъушхо къа­фэхъу. Тикъуаджэ дэт культурэмкIэ и Унэ Iуа­хыжьынышъ, кIэу къыт­фашIынэу программэм тыхагъэу­цуагъ. Лъэхъаным ди­штэрэ псэуалъэ тищыкIэгъэ шъыпкъ. Ар тэркIэ гушIогъошху, — еIо тигущыIэгъу.
Къадырхъанрэ ишъхьэгъу­сэу Аслъанрэ илъэс 45-рэ хъугъэу зэдэпсэух, яунагъо къуаджэр зэрыгушхорэмэ ащыщ. ЛIакъом къызыхахьэм Къадырхъан илъэс 18 ныIэп ыныбжьыгъэр. Ащ къыщегъэ­жьагъэу бзылъфыгъэм идахэ нэмыкI аригъэIуагъэп, иунагъо зэригъэбэгъощтым, исабыйхэр дахэкIэ къызэрахигъэщыщтхэм ыуж ит. ЯкIэлэ нахьыжъэу Темур, япшъа­шъэу Заремэ, якIэлэ нахьыкIэу Аскэр сэнэ­хьат дэгъухэр агъо­тыгъ, унэгъо дахэхэр ашIагъ. Икъорэлъф пхъорэлъфхэм ны­жъыр ащэгушIукIы.
— Унагъом игъэпсын бзылъфы­гъэм­кIэ мэхьанэшхо иI. Шъхьэ­гъусэм лъы­тэныгъэ епхэу, уапэ ибгъэуцоу, щэIэгъэ тIэкIу къызхэбгъафэмэ, унэгъо кIыхьэ ухъущт. Непэрэ мафэмкIэ нысэу сиIэхэм ясэIо щэIагъэ къызхагъэ­фэнэу. Джары унагъом ишъэ­фыр, — къыIуагъ Къадырхъан.
Лъэпшъыкъо
Фатим.