Дипломым дунэе мэхьанэ иIэ хъугъэ
Адыгэ къэралыгъо университетыр апшъэрэ еджэпIэ 45-у зидипломхэр Туркменистан щалъытэхэрэм ыкIи щылажьэхэрэм ахагъэхьагъ.
IэкIыб къэралыгъохэм яапшъэрэ еджапIэхэу зидипломхэр Туркменистан щалъытэхэрэр ыкIи щылажьэхэрэр гъэсэныгъэмкIэ хэгъэгу Министерствэм къыгъэнэфагъэх. Ар агъэцэкIэным фэшI дунаим иуниверситет пэрытхэм ярейтинг къыпкъырыкIыгъэх, ахэм ащыщых Московскэ дунэе рейтингэу «Университетым ипшъэрылъищ» зыфиIорэр, университетхэм ядунэе рейтингэу 2025-рэ (The World University Rankings), университетхэм ядунэе рейтингэу QS 2025-рэ ыкIи дунэе университетхэм я Академическэ рейтингэу 2025-рэ илъэсым телъытагъэр (Shanghai Ranking). Илъэс къэс агъэкIэжьырэ пчъагъэм хэхьэх дунаим щыпэрыт апшъэрэ еджэпIэ 1500-рэ, Урысыем ит университет 45-рэ ащ хэт. Апэрэу а сатырым хэуцуагъ Адыгэ къэралыгъо университетыр.
Туркменистан щыщхэр Адыгэ къэралыгъо университетым зигъэхьазырхэрэр 2011-рэ илъэсым щегъэжьагъ. А уахътэм къыкIоцI тиуниверситет туркмен студент 2000-м ехъу щырагъэджагъ. 2016-рэ илъэсым Туркменистан истудентмэ зэчIыгогъухэм язэхахьэ зэхащагъ, апшъэрэ еджапIэм ар апэрэу щытхыгъэ хъугъэ. Туркмен студентхэр университетым испортивнэ ыкIи икультурнэ щыIакIэ чанэу хэлажьэх. 2018-рэ илъэсым, туркмен студентхэу Урысыем иапшъэрэ еджапIэхэм ащеджэхэрэм азыфагу футбол цIыкIумкIэ зэнэкъокъухэр зэхащэгъэгъэх, ащ Адыгэ къэралыгъо университетым икомандэ апэрэ чIыпIэр къыщыдихыгъ.
Непэрэ мафэм хэгъэгу 43-мэ къарыкIыгъэ студент 1600-рэ АКъУ-м щеджэ, а пчъагъэм щыщэу нэбгырэ 1300-р Туркменистан къикIыгъэх, кIэлэегъэджэ IофшIэным, экономикэм ыкIи юриспруденцием афэгъэхьыгъэ сэнэхьатхэр ары нахьыбэрэмкIэ ахэм къыхахыхэрэр.
Университетым Туркменистан игъэсэныгъэ организациехэм зэпхыныгъэу адыриIэм хегъэхъо зэпыт, культурнэ ыкIи научнэ лъэныкъохэмкIэ лъэпкъ кадрэхэм ягъэхьазырын Iоф дешIэ. АКъУ-р дунэе гъэсэныгъэ къэгъэлъэгъонхэм ахэлажьэ, Туркменистан и Россотрудничествэ и ЛIыкIо IофшIапIэ, Туркменистан и Посольствэу Урысыем щыIэм, Астрахань ыкIи Казань ащыIэ Консульствэхэм адэлажьэ. Апшъэрэ еджапIэм фэгъэхьыгъэ къэбарыр дунэе справочникхэм ыкIи каталогхэм къащыхауты.
Адыгэ къэралыгъо университетым ипресс-къулыкъу