Урысыем и Следственнэ комитет Адыгэ РеспубликэмкIэ иследственнэ гъэIорышIапIэ къалэу МыекъуапэкIэ иследственнэ отдел иследовательхэм Къэралыгъо автоинспекцием иреспубликэ гъэIорышIапIэ игъогу-пост къулыкъу иинспектори 6-у Урысыем и Уголовнэ кодекс ия 290-рэ статья ия 3-рэ Iахь зигугъу къышIырэ бзэджэшIагъэ зезыхьагъэхэм (къуалъхьэ аIызыхыгъэхэм) уголовнэ Iофхэр къафызэIуахыгъэх.

Адыгеим хэгъэгу кIоцI IофхэмкIэ и Министерствэ щынэгъончъэнымкIэ икъулыкъурэ Урысыем щынэгъон­чъэнымкIэ и Федеральнэ къулыкъу Адыгэ Респуб­ликэмкIэ и ГъэIорышIапIэрэ яIофышIэхэм оперативнэ-лъыхъон Iофтхьабзэу зэрахьагъэхэм яматериалхэмкIэ уголовнэ Iофхэр къызэIуахыгъэх.
Следовательхэм зэрагъэунэфыгъэмкIэ, 2018-рэ илъэсым къыщегъэжьагъэу 2024-рэ илъэсым нэс а инспекторхэм Мыекъуапэ игъогухэм атехъухьэрэ тхьамыкIагъохэм яхьылIэгъэ къэбархэр аварийнэ комиссархэм якъулыкъу иIофышIэхэм ахъщэ къаратызэ, аIэкIагъахьэщтыгъэх.
БзэджэшIагъэ зезыхьагъэхэм пшъэдэкIыжьэу арагъэхьыщтым икъыхэхын джыдэдэм ыуж итых.
Следовательхэмрэ криминалистхэмрэ ищыкIэгъэ следственнэ Iофтхьабзэхэр зэрахьэх, бзэджэшIагъэ­хэм ахэщэгъэн зылъэкIыщтхэр къыхагъэщых.

Урысыем и Следственнэ комитет Адыгэ Респуб­ликэмкIэ иследственнэ гъэIорышIапIэ иотделэу мэхьанэшхо зиIэ Iофхэр зэхэзыфырэм иследовательхэм тыкъэзыуцухьэрэ дунаим икъэухъумэнкIэ ыкIи чIыопс къэкIуапIэхэмкIэ республикэ гъэIорышIапIэм къэралыгъо экологическэ надзорымкIэ испециалист шъхьаIэ Урысые Федерацием и Уголовнэ кодекс ия 290-рэ статья ия 6-рэ Iахь зигугъу къышIырэ бзэджэшIагъэ зэрэзэрихьагъэм (къолъхьэшхо къызэраIихыгъэм) пае уголовнэ Iоф къыфызэIуахыгъ.
Адыгэ Республикэм хэгъэгу кIоцI IофхэмкIэ и Министерствэ экономическэ щынэгъончъэнымкIэ ыкIи къолъхьэ тын-Iыхыным пэуцужьыгъэнымкIэ игъэIорышIапIэ, Урысыем щынэгъончъэнымкIэ и Федеральнэ къулыкъу АдыгеимкIэ и ГъэIорышIапIэ яIофышIэхэм оперативнэ-лъыхъон Iофтхьабзэу зэрахьагъэхэм яматериалхэмкIэ уголовнэ Iофыр къызэIуахыгъ.
Нафэ къызэрэхъугъэмкIэ, 2020-рэ илъэсым ищылэ мазэ къыщегъэжьагъэу 2023-рэ илъэсым ибэдзэогъу нэс псэолъэшIынымкIэ пыдзафэхэр зыугъоирэ ыкIи Iузыщырэ сатыу организацием илIыкIо ащ къуалъхьэ ритыщтыгъ Iизын тхылъ ямыIэу Адыгэкъалэ ихэкIитэ­къу­пIэ пэрыохъунчъэу зэрэрагъэкIуалIэщтыгъэхэм пае.
УплъэкIунхэр зэхэзыщэрэ къулыкъум испециалист шъхьаIэ пстэумкIи къуалъхьэу къаIихыгъэр сомэ миллионрэ мин 600-м ехъу. ХэбзэухъумэкIо къулыкъухэм ар аубытыгъ, пшъэдэкIыжьэу рагъэхьыщтыр зэхафы.
Следовательхэмрэ криминалистхэмрэ ищыкIэгъэ следственнэ Iофтхьабзэхэр зэрахьэх, бзэджэшIагъэм хэщэгъэн зылъэкIыщхэм якъыхэгъэщын ыуж итых.
Урысыем щынэгъончъэнымкIэ и Федеральнэ къулыкъу АР-мкIэ и ГъэIорышIапIэ ипресс-къулыкъу.