Тэхъутэмыкъое районым ит щэпIэ гупчэу «Мега-Адыгея» зыфиIорэм адыгэ культурэм ия 4-рэ фестиваль щыкIуагъ.

Адыгэ IэпэщысэхэмкIэ IэпэIасэхэм якъэгъэлъэгъон зэфэшъхьафхэр, лъэпкъ гъэлъэгъуапIэхэр, мастер-классхэр мыщ щызэIухыгъагъэх, къэралыгъо ансамблэхэм, творческэ купхэм, зэлъашIэрэ орэдыIохэм концерт къыщатыгъ. Фестивалым илъэс къэс игъунапкъэхэм ахегъахъо, искусствэм ижъуагъохэмрэ кIэу ащ къыхэхьэгъэ IэпэIасэхэмрэ къызэIуе­хых. Джащ фэдэу АР-м и Къэралыгъо академическэ ансамблэу «Налмэсым», УФ-м лъэпкъ творчествэмкIэ изаслуженнэ коллективэу, адыгэ музыкальнэ Iэмэ-псымэхэм яансамблэу «Уджым», творческэ зэхэт купэу «Ошъадэм» зы пчэгум къадытехьагъэх лъэпкъ мэкъамэм ыкIи орэдым икупэу «Мыст», адыгэ лъэпкъ Iэмэ-псымэхэм яансамблэу «ДжэгуакIор», къэшъокIо ансамблэу «Мыекъуапэ инэфылъэхэр», нэмыкIхэри.
Бэрбэч Аскэр, Нэхэе Тэмарэ, Лъачъэ Альберт, Даутэ Сусаннэ, Къэлэкъутэкъо Мурат, Мышъэ Азидэ, Битэ (Хъурэнэ) Азэ пчэгум щышIэтыгъэх.

Еутых Асе, ЛIышэ Ахьмэд, ПIатIэкъо Айдэмыр, Боджэкъо Бэллэ, Сет Сафиет, Гумэ Ларисэ, Джарымэкъо Зурет, Анжела Исаевам — зэкIэмкIи IэпэIэсэ 45-мэ яIэпэщысэхэр, лъэпкъ искусствэр зыIэтыгъэхэу Бырсыр Абдулахь, Абрэдж Гощэфыжь яIэшIагъэхэр фестивалым къыщагъэлъэгъуагъэх.
«Адыгеим икультурнэ кIэн» зыфиIорэ тхылъ къэгъэлъэгъоныр, КъокIыпIэм щыпсэурэ лъэпкъхэм яискусствэкIэ къэ­ралыгъо музеим и Темыр-Кавказ къутамэ икъэгъэлъэгъон, ижъырэ адыгэ ыкIи джырэ уахътэм аусыгъэ орэдхэр, гур зыгъэпсынкIэрэ къашъохэр, лъэпкъ музыкальнэ Iэмэ-псымэхэм къапкъырыкIырэ мэкъамэхэр Iофтхьабзэм ипчэгу итыгъэх. Фестивалым ихьакIэхэр ыкIи хэлажьэхэрэр адыгэ шэн-хабзэхэм, лъэпкъ искусствэм ахэщэгъагъэх.
Лъэпкъыбэ зыщыпсэурэ Адыгеим, Тэхъутэмыкъое районэу Краснодар краим пэгъунэгъум щыкIорэ мыщ фэдэ фестивалым цIыфхэр нахь къырещалIэх. Зэдэлэжьэным, лъэпкъ зэшIуныгъэм ар афэIорышIэ, адыгэ лъэпкъ культурэм, тарихъым уащегъэгъуазэ.
Адыгэ шъуашэм ишIынкIэ Адыгеим ыкIи Къэбэртэе-Бэлъкъарым яIэпэIасэхэм якъэгъэлъэгъонхэм фестивалыр къагъэкIэрэкIагъ. Адыгэ дышъэидэм, тхыпхъэ хэдыкIыным ишэпхъэ лъагэхэр непэ зынэсыхэрэр ащ къыгъэнэфагъ. ХьакIэхэм дахэу апэгъокIыгъэх. Фестивалым ипрограммэ анахь хьалэмэтэу ыкIи узIэпищэу хэтыгъэр пщынаохэр купышхоу зэхэтхэу къызэрэрыкIуагъэхэр ары.
«МэфэкIыр дахэу рекIокIыгъ. БлэкIыгъэ фестивальхэм ягъэ­пшагъэмэ, хьакIэхэри хэлэжьагъэхэри зыпштэрэм, нахь цIыфыбэ къекIолIагъ. Искусствэм илъэныкъо ыкIи ныбжь зэфэ­шъхьафхэр зиIэхэр зэфищагъэх. ЗэкIэ фестивалым хэлэжьа­гъэхэм тафэраз. Концертыр бэмэ агу зэрэрихьыгъэр къаIуагъ. Фестивалыр тапэкIи нахь гъэшIэгъонэу зэхэщэгъэным тыдэлэжьэщт» — къыщитхыгъ Тэхъутэмыкъое районым иадминистрацие ипащэу Шъао Аскэр ителеграм-канал.