Iахьзэхэлъ обществэу «Россети Кубань» АдыгеимкIэ икъутамэ иIофы­шIэхэм 2025-рэ илъэсым километрэ 420-м ехъу зикIыхьэгъэ электрорыкIуа­пIэхэр Краснодар краимкIэ Апшеронскэ, Шытхьэлэ районхэм, Адыгэ Рес­публикэмкIэ Джэджэ, Мыекъопэ, Крас­ногвардейскэ, Кощхьэблэ, Шэ­уджэн районхэм, Мыекъуапэ къыпэIулъ чIыпIэхэм ащагъэцэкIэжьыщтых.

Программэм диштэу киловольт 35 – 110-рэ илъэшыгъэу электроэнергиер зэрыкIорэ линиеу километрэ 20-м ехъу, киловольти 10 – 0,4-рэ илъэшыгъэу электроэнергиер зэрыкIорэ линиеу километрэ 400 специалистхэм агъэцэкIэ­жьынхэу рахъухьэ. Линейнэ псэуалъэхэм изолятор мини 4-м ехъу, гъу­чIыч километрэ 80, пкъэу 545-рэ ащызэблахъущтых. ЭлектрорыкIуапIэхэм къапэIулъ чIыгу гектар 300-м ехъумэ арыт чъыг­хэмрэ куандэхэмрэ араупкIын ямурад. Къутамэхэмрэ чъыгхэмрэ гъучIычхэм къатемыфэнхэм, электроэнергиер зэра­IэкIагъахьэрэр зэщымыкъонхэм апай джарэущтэу зыкIызекIощтхэр.
ГъэцэкIэжьын IофшIэнхэу электрорыкIуапIэхэм арашIылIэщтхэм яшIуагъэкIэ псэупIэхэм зэпымыоу электроэнергиер къаIэкIэхьащт, Краснодар краимрэ Адыгэ Республикэмрэ яэлектросетевой комплекс нахь зыпкъ итэу Iоф ышIэщт.
Адыгэ электросетьхэм Краснодар краимрэ Адыгэ Республикэмрэ ямуниципальнэ образовании 8-у нэбгырэ мин 550-рэ фэдиз зыщыпсэухэрэм элек­троэнергиер аIэкIагъахьэ. Километрэ 9000-м ехъу зикIыхьэгъэ электрорыкIуа­пIэхэм яфэIо-фашIэхэр а предприятием егъэцакIэх.