Хэбзэгъэуцу ныбжьыкIэхэм я Палатэу ФедерациемкIэ Советым щызэхэщагъэм и Совет изэхэсыгъо видеоконференцие шIыкIэм тетэу кIуагъэ.

ЦIыфхэм IэпыIэгъу ягъэ­гъотыгъэнымкIэ ­Адыгэ Республикэм и Штаб щыIэу пэIудзыгъэ шIыкIэм тетэу Iофтхьабзэм хэлэжьагъ Мые­къуапэ икъэлэ Совет идепутатэу, хэбзэгъэуцу ныбжьыкIэхэм я Палатэу ФедерациемкIэ Со­ветым щызэхэщагъэм социальнэ политикэмкIэ ыкIи псауныгъэм икъэу­хъумэнкIэ и Комитет итхьа­матэ игуадзэу, НыбжьыкIэ гвардием и Адыгэ шъолъыр къутамэ ипащэу Бэрзэдж Асиет.
Комитетхэм ятхьама­тэхэм мы аужырэ мазэхэм хэбзэгъэуцу ныб­жьыкIэхэм я Палатэ Iофэу ышIагъэр къызэфа­хьысыжьыгъ. Джащ фэдэу Хэгъэгум иухъумакIо и Илъэсрэ ТекIоныгъэшхом ия 80-рэ илъэсрэ афэ­гъэхьыгъэ Iофтхьабзэу зэ­рахьащтхэм къатегущы­Iагъэх.
«ТиIофшIэгъухэмрэ тэ­рырэ Iофэу тшIагъэм икIэуххэм апэрэ мэзищым иублэгъу татегущыIагъ ыкIи мы охътэ благъэм тшIэщтхэр итхъухьагъэх. Пленарнэ зэхэсыгъор къызыщыблагъэрэм зы­хэплъэнхэу къахалъхьащт Iофыгъо шъхьаIэхэм татегущыIэнэу зытэгъэхьазыры. Нэбгырэ пэпчъ игу­къэкI икъоу дэлэжьэнхэ ыкIи тегущыIэнхэ фае. Лъэныкъо пстэури къыдалъытэзэ, ныбжьыкIэхэм яеплъыкIэхэм япхырыщынкIэ екIолIэкIэ тэрэз къызагъотыкIэ, тихэгъэгу хэхъоныгъэ езыгъэшIыщт унашъохэу мэхьанэшхо зиIэхэр аштэнхэ зэра­лъэкIыщтым тицыхэ телъ», — къыIуагъ Бэрзэдж Асиет.