ЦIыф зэрымыс быбырэ авиасистемэхэм я Урысые форум тыгъуасэ­рэ непэрэ Адыгеим щэкIо. Хэгъэгум иухъумакIохэм я Илъэс къыдыхэлъытагъэу ар Мыекъопэ технологическэ университетым щыра­гъэкIокIы.

«ЦIыф зэрымыс быбырэ авиасистемэхэр: амалхэмрэ хэхъоныгъэмрэ зыщызэгъэуIугъэх» шъхьэу Iофтхьабзэм фа­шIыгъэр. Ащ хэлажьэх кIэлэ­еджакIохэр, студентхэр, кIэлэ­егъаджэхэр, общественнэ ор­ганизациехэм ялIыкIохэр, предпринимательхэр, мы лъэныкъом зиушъомбгъуным пылъхэр. Уры­сыем иапшъэрэ еджэпIэ пэрытхэм я Дзэ егъэджэн гуп­чэхэми къарыкIыгъэх. Ахэм ащыщых Татищевым ыцIэ зы­хьырэ Астраханскэ къэралыгъо университетыр, Трубилиным ыцIэ­кIэ щыт Пшызэ къэралыгъо аграрнэ университетыр, Луганскэ къэралыгъо университетэу Даль ыцIэ зыхьырэр, Къэбэр­тэе-Бэлъкъар къэралыгъо университетыр, Темыр-Кавказ фе­деральнэ университетыр, Темыр-Кавказ къэралыгъо академиер, Къыблэ федеральнэ университетыр.
Форумым икъызэIухын къыгъэдэхагъ искусствэхэмкIэ еджа­пIэм къыгъэхьазырыгъэ къэ­гъэлъэгъоным. «Урысыер, ыпэ­кIэ лъыкIуат!» зыфиIорэ ком­позициеу орэдыIо купэу «Акцент» зыфиIорэм къыIуагъэр Iофтхьабзэр зыфытегъэпсыхьагъэм инэпэеплъэу хъугъэ. МэфэкI шIыкIэкIэ Iофтхьабзэр къызызэIуахы нэуж ащ хэла­жьэхэрэр лъэныкъо зэфэшъхьафхэм атегъэпсыхьэгъэ чIыпIэ зэIухыгъэхэм яблэгъа­гъэх.
ЦIыф зэрымыс быбырэ аппаратхэм якъэгъэлъэгъон, ахэм Iоф ягъэшIэгъэнымкIэ егъэджэнхэр, «Урысыем идзэ­кIолI­хэр» зыфиIорэ интерактивнэ патрио­тическэ гупчэр форумым иIоф­шIэн къыхиубытэу агъэпсыгъэх. Джащ фэдэу ащ къекIолIагъэхэр джэгукIэхэм ахагъэлажьэх, дронхэм ягъэзекIонкIэ программэхэм ятхын иапэрэ лъэбэ­къу­хэр арагъэкIух, Хэгъэгу зэ­ошхом епхыгъэ шIэжь чIыпIэ­хэу Адыгеим икъушъхьэхэм ахэтхэм, С. Г. Алифиренкэм ыцIэ зы­хьырэ щэрыуапIэм якIолIэщтых, нэмыкIхэри форумым иIофшIэн къыдыхэлъытагъэх.