Республикэм Iэрыфэгъу щыIакIэ илъыным фытегъэпсыхьагъэу икIыгъэ илъэсым республи­кэм Iофышхо зэрэща­шIагъэр АР-м и ЛIы­шъхьэу КъумпIыл ­Мурат ителеграм-нэ­кIубгъо къыщитхыгъ.

Республикэм ипащэ къы­зэритхыгъэмкIэ, мы лъэпкъ проектым къыдыхэлъытагъэу гъэ­рекIо зэшIуахыгъэхэм пстэумкIи сомэ миллион 953,4-рэ апэIухьагъ. Ащ къы­хэхыгъэ ахъщэкIэ общественнэ чIыпIи 8-рэ фэтэрыбэу зэхэт унэхэм ящагухэу 31-рэ икIыгъэ илъэсым зэтыра­гъэпсыхьагъ.
Мы проектым къыдыхэлъы­тагъэу псы къабзэм епхыгъэу псэолъи 6 агъэпсыгъ ыкIи республикэм исым ипроцент 88-мэ шапхъэхэм адиштэрэ псы къабзэ аIэкIахьэ хъугъэ.
Джащ фэдэу унэ квадрат метрэ мин 565,6-рэ респуб­ликэм щатыгъ, жъы хъугъэу, зэхэоным нэсыгъэхэм ачIэс нэбгырэ 797-мэ псэукIэ амал тэрэзхэр яIэ хъугъэ.
«ПсэупIэр ыкIи къэлэ щы­IакIэр» зыфиIорэ лъэпкъ проектым къыдыхэлъытагъэу къэлэ цIыкIухэм яобщественнэ чIыпIэу зэтырагъэпсыхьащтхэр къызщыхахыгъэ Урысые зэнэкъокъоу зэхащэгъагъэм текIоныгъэр къыщызыхьыгъэ Мыекъуапэ имэз-парк чIыпIэу «Мэздахэмрэ» Адыгэкъалэ ипроспектэу Лениным ыцIэ зыхьырэм щырагъэжьэгъэ паркымрэ яшIыни ыкIэм рафылIагъ.
— 2024-рэ илъэсым гъогухэм, псэупIэхэм яшIын фы­тегъэпсыхьэгъэ лъэпкъ проектхэмрэ къэралыгъо программэхэмрэ япхырыщынкIэ пэрытныгъэр зыIыгъ шъолъыр­хэм республикэр ащыщ хъу­гъэ. КъыкIэзгъэтхъымэ сшIои­гъор, унэе мылъкурэ федеральнэ IэпыIэгъумрэ тэрэзэу зэдэгъэфедагъэ зэрэхъурэр, хэбзэ къулыкъухэмрэ респуб­ликэм ис цIыфхэмрэ шIуагъэ къытэу зэрэзэдэлажьэхэрэр шъолъырым хэхъоныгъэхэр ышIынхэм зэрэфэIорышIэрэр ары, — къыщыхигъэщыгъ КъумпIыл Мурат ипсалъэ.