Япчъагъэ хэхъуагъ
Щылэ-мэзэе мазэхэм зэпахырэ узхэм нахь заушъомбгъоу хабзэ. ИкIыгъэ тхьамафэм пэтхъу-Iутхъур ыкIи гриппыр къызэузхэрэм япчъагъэ зэхапшIэу хэхъуагъ, ау эпидемием ишапхъэу агъэнэфагъэм джыри шъхьадэкIыгъэп, благъэу къекIолIагъэми.
ЩэфакIохэм яфитыныгъэхэр ыкIи цIыфым игупсэфыныгъэ къэухъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм эпидемиологие лъыплъэнымкIэ иотдел ипащэу Гурген Авакян къызэриIуагъэмкIэ, тызхэт илъэсым ия 6-рэ тхьамафэ пэтхъу-Iутхъур ыкIи гриппыр нэбгырэ 1930-рэ фэдизмэ къяузыгъэу агъэунэфыгъ. Ау ащ ыпэрэ тхьамафэм ебгъапшэмэ, къэсымэджагъэр процент 51,6-м ехъукIэ нахьыб.
— Эпидемием ишапхъэу агъэнэфагъэм блэгъэ дэдэу тыкъекIолIагъ, проценти 10 фэдиз ныIэп щыкIэрэр. Пчъагъэу зигугъу къэсшIыгъэм щыщэу 400 фэдизыр къалэу Мыекъуапэ щатхыгъ. Зэрэреспубликэу тштэмэ, гриппыр нэбгырэ 60-м ехъурэмэ къахагъэщыгъ, ау а пчъагъэр бэкIэ нахьыбэщт. Ныбжь купхэр пштэхэмэ, зэкIэри зэфэдэу мэсымаджэх, — хигъэунэфыкIыгъ Гурген Авакян.
Джащ фэдэу санитарнэ врачым къызэрэхигъэщыгъэмкIэ, кIэлэеджакIохэр купышхоу зэрэсымаджэхэрэм къыхэкIыкIэ нэбгырэ миным ехъу пэIудзыгъэ шIыкIэм тетэу рагъаджэх.
Адыгэ Республикэм псауныгъэр къэухъумэгъэнымкIэ и Министерствэ иштат хэмыт врач-эпидемиолог шъхьаIэу, медицинэ шIэныгъэхэмкIэ кандидатэу Шъэожъ Альбинэ къызэриIуагъэмкIэ, зэпахырэ узхэм зыкъызэраIэтыгъэр джы тызхэт лъэхъаным инэшан. НахьыбэрэмкIэ къекIокIырэр пэтхъу-IутхъумкIэ — риновирусхэр, гриппымкIэ — А-р ыкIи В-р.
— Зэпахырэ узхэм зызэраушъомбгъугъэм ыпкъ къикIыкIэ Адыгеим иеджапIэхэм якласс 50 фэди-
зыр зэфашIыгъ. Роспотребнадзорым и ГъэIорышIапIэ ишIэ хэлъэу ащкIэ унашъо зышIырэр еджапIэм ипащ ары. Ащ ушъхьагъоу иIэн ылъэкIыщтыр классым ис нэбгырэ пчъагъэм ипроцент 20 е нахьыбэ къэсымэджагъэмэ ары. ЦIыфхэр япсауныгъэ нахь фэсакъынхэу тыкъяджэ. Жьы къабзэм мэхьанэ иI. Унэ кIоцIхэм бэрэ жьы къабзэ арыбгъэхьан фае. Ащ вирусыр нахь макIэ ешIы. Пэтхъу-Iутхъу нэшанэхэр шъуиIэхэ зыхъукIэ, IэзапIэхэм зафэжъугъаз. Узыр зэпамыхынымкIэ ащ мэхьанэ
иI, — хигъэунэфыкIыгъ эпидемиолог шъхьаIэм.
Iэшъынэ Сусан.