Урысыем и Следственнэ комитет Адыгэ Респуб­ликэмкIэ иследственнэ гъэIорышIапIэ къалэу МыекъуапэкIэ иследст­веннэ отдел атлетикэ онтэгъумкIэ Олимпиа­дэхэм ахэлэжьэщтхэр зыщагъэхьазырырэ рес­публикэ спорт еджапIэм итренерэу Урысые Федерацием и Уголовнэ кодекс ия 159-рэ статья ия 3-рэ Iахь, ия 327-рэ статья ия 4-рэ Iахь зигугъу къашIырэ бзэджэшIагъэхэр зезыхьагъэм иуголовнэ Iоф изэхэфын ыухыгъ.

Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иматериалхэм атетэу ащ уголовнэ Iоф къыфызэIуахыгъагъ.
Следствием зэригъэунэфы­гъэмкIэ, республикэ спорт еджа­пIэм итренер IэнатIэу ыIыгъыр къызфигъэфедэнэу, 2020-рэ илъэсым ишэкIогъу щегъэжьагъэу 2022-рэ илъэсым ищылэ мазэ нэс спортсмен 28-мэ физическэ культурэмкIэ ыкIи спортымкIэ республикэ комитетым имылъку зыпэIухьэрэ тренировкэхэр афызэхищагъэ фэдэу тхылъхэр ыгъэпсынхэу ыгу къэкIыгъ.Тренировкэхэр зэрищыкIагъэхэмкIэ документ нэпцIхэр ащ зэхигъэуцохи, къа­дырагъэштэным пае ыпшъэ-
кIэ щыIэ къулыкъум IэкIигъэ­хьа­гъэх.
Тренерым зэхищэнэу «мурад зыфыриIэгъэ» тренировкэхэр игъоу алъэгъухи, сомэ 585060-рэ спорт еджапIэм къыфыха­гъэ­кIыгъ. Хэбзэ мылъкур трене­рым иджыбэ рилъхьагъ, зэ­рэ­фаеу ар зэригъэкIуагъ.
Къалэу Мыекъуапэ ипрокурор итхыгъэу бзэджашIэм имысагъэ зыщиухэсыгъэмрэ уголовнэ Iофымрэ ахэплъэнхэу хьыкумым IэкIагъэхьагъэх.
Урысыем щынэгъон­чъэнымкIэ и Федеральнэ къулыкъу Адыгэ Респуб­ликэмкIэ и ГъэIорышIапIэ ипресс-къулыкъу