Ахэр спортми щыIэныгъэми щыпэрытых. Оруджов зэшъхьэгъусэхэу Ниджатрэ Поли­нэрэ ягупсэ ТIопсэ районым пэчыжьэхэу текIоныгъакIэхэр «афытэ».

2022-рэ илъэсым ибжыхьэ къуаджэу Псыбэ щыщ бэнакIохэу АкIэгъу Миланэ, Камиллэ ыкIи Руслъан янэ-ятэхэр ягъусэхэу Ямало-Ненецкэ автоном хэкум икъэлэ шъхьаIэу Надым кIуагъэх – ахэр ятренерхэу Оруджовхэу Ниджатрэ Полинэрэ акIэлъыкIуа­гъэх. Ащ спорт Iофыр щытхъу пылъэу щылъагъэкIуатэ.
Полинэ спортым зэрэщашIэрэ лъэкъуацIэр — Белоусова. Ар ТIуапсэ щыщ, зэлъашIэрэ тренерэу Нэгъуцу Джанболэт зыгъэ­сагъэр, спортымкIэ дунэе класс зиIэ мастер, хэгъэгум изэхэугъо­егъэ командэ хэт, Урысыем, Дунаим и Кубок ыкIи Европэм текIоныгъэ гъогогъу пчъагъэрэ къащихьыгъ. Полинэ ишъхьэгъусэр Ниджат Оруджовыр ары, блэкIыгъэм гъэхъагъэхэр зышIыгъэ спортсмен, джырэкIэ самбэмкIэ ыкIи дзюдомкIэ кIэлэцIыкIу тренер. Илъэс заулэрэ зэшъхьэгъу­сэхэр поселкэу Ныджэпсыхъо дэт къоджэ клубэу «Ронин» зыфи­Iорэм щылэжьагъэх, къуаджэу Псыбэ щыщ кIэлэцIыкIухэр ыкIи ныбжьыкIэхэр ащ щагъасэщтыгъх.
ИлъэситIукIэ узэкIэIэбэжьмэ Оруджовхэр Надым рагъэблэгъа­гъэх.
Ны-тыхэм ягъусэх якIалэхэу Хаджи-Муратрэ Расулрэ, ахэри яцIыкIугъом къыщыублагъэу бэнэным пылъых, джащ фэдэу АкIэгъу унагъори темырым адэкIуагъ.
— ЧIыпIакIэм псынкIэу тыхэгъозагъ, тыкъезыгъэблэгъэгъэ спорт еджапIэу «Пэрыт» зыцIэм щылажьэхэрэр дахэу къытпэгъо­кIыгъэх, — къеIуатэ Полинэ. — Охътабэ темышIэу апэрэ гъэ­хъагъэхэр ащ щытшIыгъэх: ана­хьыжъым, илъэс 17 зыныбжь Миленэ самбэмкIэ ыкIи дзюдо бэнэнымкIэ спортым имастер хъунымкIэ кандидатыцIэ къыфагъэшъошагъ, Урысыем изэнэкъо­къухэу дзюдомкIэ илъэс 18-м нэс зыныбжьыхэм азыфагу щызэхащэгъагъэм ащытекIуагъ, самбэмкIэ Урысыем икIэлэеджакIохэм яспартакиадэ тыжьын медалыр, дзюдомкIэ дунаим изэнэкъокъу­хэм джащ фэдэу тыжьыныр къа­щихьыгъ, Ямало-Ненецкэ автоном хэкуми ар щатекIуагъ. НахьыкIэ­хэр – илъэс 14 зыныбжь Рус­лъан ыкIи илъэс 11 хъугъэ Камиллэ — Надымскэ районым самбэмкIэ ичемпионых. Джарэущтэу рагъэ­жьагъ, лъагъэкIуатэ…
2023-рэ илъэсым изэфэхьысыжьхэмкIэ, АкIэгъу Миленэ Надымскэ районым испортсмен анахь дэгъоу къыщыхахыгъ, Щытхъу тамыгъэу «Общественнэ лъытэныгъ» зыфиIорэр къыфагъэ­шъошагъ. А илъэс дэдэм «Надымскэ районым итренер анахь дэгъу» зыфиIорэ цIэ лъапIэр Миленэ игъэсакIоу, тренерэу Полина Оруджовам къылэжьыгъ. Ниджати чэзыур къынэсыгъ, 2024-рэ илъэсымкIэ ари Надымскэ районым итренер анахь дэгъоу агъэнэфагъ.
— Ниджатрэ Полинэрэ яунагъокIэ спортым пылъхэу щыIэныгъэ гъогум рэкIох. НэбгыритIур зэнэкъокъухэм нэIуасэ ащызэ­фэхъугъагъэх, мары илъэс 12 хъу­гъэу унэгъо насыпышIоу зэдэпсэух, якIэлэцIыкIуитIу ны-ты­хэм афэдэхэу спортым пылъых. Хаджи-Мурат мызэу, мытIоу рай­он зэнэкъокъухэм дышъэ медальхэр къащихьыгъ, ышнахьыкIэу Расул джыри кIэлэцIыкIу IыгъыпIэм макIо, ау ащи апэрэ лъэ­бэкъухэр спортым щешIых, — къыщыхагъэщыгъ Надымскэ районым иадминистрацие ипресс-къулыкъу.
Полинэ къызэриIорэмкIэ, спортыр ары ящыIэныгъэр. Ны-тыхэри кIалэхэри зэгъусэхэу тренировкэхэр ашIы, спортым епхыгъэ къэбархэм атегущыIэх, текIоныгъакIэхэм афэкIох.

Ныбэ Анзор.