2024-рэ илъэсым къулыкъум ­Iофэу ышIагъэм икIэуххэм язэфэхьысыжьын АР-м ипро­куратурэ щыкIуагъ, илъэсэу ­къихьагъэм зэшIуахын фаехэри рахъухьагъэх. Адыгеим и ЛIышъхьэу КъумпIыл Мурат Iофтхьабзэм хэлэжьагъ.

Ащ щыIагъэх УФ-м и Генеральнэ прокурор иапэрэ гуадзэу Анатолий Разинкиныр, АР-м и Къэралыгъо Совет — Хасэм и Тхьаматэу Вла­димир Нарожнэр, федеральнэ ин­спектор шъхьаIэу Сергей Дрокиныр, АР-м и Апшъэрэ хьыкум, АР-м хэ­гъэгу кIоцI IофхэмкIэ и Министерствэ, УФ-м щынэгъончъэнымкIэ икъулыкъу и Гъэ­IорышIапIэу АР-м щыIэм, Следст­веннэ комитетым иследственнэ гъэ­IорышIа­пIэу АР-м щыIэм, Адыгеим и Росгвардие япащэхэр, АР-м ипрокуратурэ хэтхэр. Зэхэсыгъор зэрищагъ Адыгеим ипрокурорэу Игорь Шевченкэм.
Республикэм ипрокурор къызэрэхигъэщыгъэмкIэ, 2024-рэ илъэсым зэхэщэн ыкIи IофшIэным епхыгъэ Iофтхьабзэу аштэгъагъэхэмкIэ гъэ­хъэгъэшIухэр ашIыгъэх, республикэм хэбзэгъэуцугъэр щыгъэцэкIэгъэным ылъэныкъокIэ Iофэу зэшIуахыгъэм ифэмэ-бжьымэшIу къатырихьагъ.
«Хэбзэгъэуцугъэу щыIэр гъогогъу мин 12,5-м ехъу аукъуагъэу прокуратурэм къыхигъэщыгъ. Ащ къыхэкIэу нэбгырэ мини 3,5-м ехъумэ административнэ пшъэдэкIыжь арагъэ­хьыгъ, нэбгырэ 46-мэ уголовнэ Iоф къа­пагъэтэджагъ, сомэ миллион 56-м ехъу зыIэкIагъэхьажьын фаехэм ара­тыжьыгъ», — къыIуагъ Игорь Шевченкэм.
КъызэрэхигъэщыгъэмкIэ, нэбгырэ 25-мэ IофшIэным епхыгъэ яфитыныгъэхэу укъуагъэ хъугъагъэхэр зыпкъ афырагъэуцожьыгъэх, чIыфэу къаратыжьын фэегъэ сомэ миллиони 5,64-рэ фэдизыр аIэкIагъэхьажьыгъ. Iэзэгъу уцхэр тэрэзэу ыкIи игъом аIэ­кIэгъэхьэгъэнхэм ылъэныкъокIэ шэп­хъэ гъэнэфагъэу щыIэхэр аукъуагъэ­хэу мы къулыкъум къыхигъэщыгъагъ ыкIи дагъэзыжьыгъэх. Прокуратурэм Iоф­тхьэбзабэ зэрихьагъ кIэлэцIыкIу­хэм, зыныбжь хэкIотагъэхэм, сэкъатныгъэ зиIэхэм, хэушъхьафыкIыгъэ дзэ опера­цием хэлажьэхэрэм ыкIи ахэм яунагъохэм арысхэм яфитыныгъэхэр къэу­хъумэгъэнхэмкIэ, административнэ пэрыохъуныгъэхэр щыгъэзыегъэнхэмкIэ, бзэджэшIагъэхэмрэ къолъхьэ тын-Iыхынхэмрэ апэуцужьыгъэнымкIэ.

Адыгеим и ЛIышъхьэ ипсалъэ къызэрэщыхигъэщыгъэмкIэ, къэ­ралыгъомрэ цIыфхэмрэ яфитыныгъэхэм якъэухъумэн фэIорышIэрэ прокуратурэм нэбгырэ пэпчъ хабзэм къыритыгъэ фитыныгъэхэмрэ шъхьафитыны­гъэмрэ укъуагъэ мыхъунхэм ынаIэ тырегъэты.
«Непэрэ лъэхъаным Iофхэм язытет зыфэдэ хъугъэм укъыпкъырыкIымэ, нафэ къыпфэхъу цIыфхэр ухъумэгъэнхэм, щыIа­кIэу яIэр нахьышIу шIыгъэным нахь лъэшэу ыгъэгумэкIыхэ зэрэхъугъэр. Общественнэ зыпкъитыныгъэм амал къеты рес­публикэм ихэхъоныгъэкIэ ыпэ ригъэхъунэу, стратегическэ про­ектхэр пхырищынхэу», — къыIуагъ КъумпIыл Мурат.
Республикэм и ЛIышъхьэ къызэрэхигъэщыгъэмкIэ, хэбзэ къулыкъухэмрэ Адыгеим ипрокуратурэрэ шIуагъэ хэлъэу зэ­рэзэдэлажьэхэрэм амал къытыгъ экономикэмрэ социальнэ политикэмрэ алъэныкъокIэ республикэм ыпашъхьэ ит пшъэ­рылъхэр зэрищыкIагъэм тетэу гъэцэкIагъэ хъунхэу. Ар зыфэгъэхьыгъэр зэхэубытагъэу къа­хьыжьырэр нахьыбэ шIыгъэныр, къыдагъэкIырэм хэгъэхъогъэныр, цIыфхэм яхахъохэр, инвестициехэр нахьыбэ шIыгъэнхэр, псэолъэшIыныим зегъэушъомбгъугъэныр. ЦIыфхэр зычIэсыщтхэ унэхэу ашIыхэрэр нахьыбэ хъугъэх, илъэси 6-м къыкIоцI квадрат метрэ миллиони 2,4-рэ фэдиз ашIыгъ. КIэлэцIыкIу ибэ­хэм фэтэрхэр афащэфых, зэхэтэкъоным нэсыгъэ унэжъхэм цIыфхэр къачIащыжьых ыкIи нэмыкI Iофтхьабзэхэр зэрахьэх.
Республикэм и ЛIышъхьэ анахь мэхьанэ зиIэ пшъэрылъхэу зэшIохыгъэн фаехэм ащыщэу зигугъу къышIыгъэхэр предпринимательхэм ыкIи социальнэ лъэныкъомкIэ зиIофхэр нахь дэй цIыфхэм яфитыныгъэхэр ухъумэгъэнхэр, псауныгъэм икъэухъумэнкIэ, гъэсэныгъэмкIэ, псэупIэ-коммунальнэ хъызмэтымкIэ, IофшIэным епхыгъэ ыкIи нэмыкI лъэны­къохэмкIэ къэуцурэ Iофыгъохэр игъом гъэцэкIэгъэнхэр. КъумпIыл Мурат къызэриIуагъэмкIэ, анахьэу анаIэ зытырагъэтын фаехэр хэушъхьафыкIыгъэ дзэ операцием хэлажьэхэрэр ыкIи иветеранхэр, ахэм ягупсэхэр ары. Игъом ыкIи тэрэзэу Iэпы­Iэгъур алъыгъэIэсыгъэн фае.
«Урысыем и Президентэу Владимир Путиным анаIэ зэратыригъэдзагъэмкIэ, мы илъэсым мэзаем къыщегъэжьагъэу рес­публикэ программэу «Адыгеим и ЛIыхъужъхэр» зыфиIорэм зы­фагъэхьазырэу рагъэжьэщт. Илъэсэу икIыгъэм хэгъэгум щагъэцакIэу рагъэжьагъ программэу «Лыхъужъхэм яуахът» зыфиIорэр. Ащ пшъэрылъ шъхьа­Iэу иIэр хэушъхьафыкIыгъэ дзэ операцием иветеранхэу анахь къахэщыгъэхэр къэралыгъо ыкIи муниципальнэ гъэIорышIэным икъулыкъухэм яIофшIэн къыхэгъэлэжьэгъэнхэр ары», — къы­Iуагъ АР-м и ЛIышъхьэ.
ХэушъхьафыкIыгъэу къыха­гъэщыгъэхэм ащыщых наркотикхэм, экстремизмэм, терроризмэм япхыгъэ бзэджэшIа­гъэхэм апэшIуекIогъэныр, общественнэ-политическэ щыIа­кIэм, цIыф жъугъэхэм бырсыр, зэпэуцужьныгъэ къахэзгъэтэ­джэ­нэу фежьэхэрэм ягъогу зэ­пыбзыкIыгъэныр.
Ахэм анэмыкIэу анаIэ зытырадзагъэхэм ащыщых Хэгъэгу зэошхом ТекIоныгъэр къызщыдахыгъэм ия 80-рэ илъэс ихэгъэунэфыкIын изыфэгъэхьазырын. Республикэм хабзэр щамыукъоным, общественнэ щынэгъончъэныр щыIэным ренэу анаIэ щытырагъэтын фае.
Урысые Федерацием и Гене­ральнэ прокурор иапэрэ гуадзэу Анатолий Разинкиным хэбзэ къулыкъухэмрэ прокуратурэм икъулыкъухэмрэ шIуагъэ хэлъэу язэдэлэжьэныгъэ зэрэкIорэм пае Адыгеим и ЛIышъхьэу Къум­пIыл Мурат зэрэфэразэр къы­Iуагъ.
«ХэушъхьафыкIыгъэ дзэ операцием хэлажьэхэрэм IэпыIэгъу ятыгъэным, псауныгъэм икъэу­хъумэн, гъэсэныгъэм, кIэлэцIыкIу ибэхэм зычIэсыщтхэ унэхэр ягъэгъотыгъэнхэм, нэмыкI Iофы­гъуабэхэм алъэныкъокIэ шъо­лъырым гъэхъэгъэшIухэр ешIых. ТапэкIи тизэдэлэжьэныгъэ лъыд­гъэкIотэщт», — къы­Iуагъ Анатолий Разинкиным.
КъумпIыл Мурат прокурату­рэм ипащэхэм ыкIи иIофышIэхэм 2024-рэ илъэсым дэгъоу Iоф зэрашIагъэм пае зэра­фэразэр къыIуагъ, къулыкъум ыпашъхьэ ит пшъэрылъхэр тапэкIи гъэхъагъэ хэлъэу ахэм зэшIуахынхэу афэлъэIуагъ. Зэхэсыгъом икIэуххэмкIэ унашъоу аштагъэм къыреIотыкIых прокурор IофшIэным шIуагъэу къытырэм джыри нахь зыкъегъэIэтыгъэнымкIэ зэшIо­хыгъэн фэе Iофтхьабзэхэу къапыщы­лъхэр.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.