Уахътэр къэуцугъо-зэплъэкIыгъо уримыгъафэу, ехьыжьагъэу, гузажъоу мачъэ. ЛъэшIэгъуныкъокIэ узэкIэIэбэжьмэ, ти ­Адыгей кIымэфэшхохэр — осыр куоу, пхъапхъэу, чъыIэр къыпхиIоу, хъотыр зэрихьэу зэрэщытыгъэр къаIотэжь екъу.

Джы мы аужырэ илъэси 10 — 15-м хэпшIыкIэу тичIыопс къэфэбагъ: тапэкIи фэмыдэжьэу осыри тимакI, къесыми, лъэгущиз, е зы тхьамафэ — мэфипшI фэдиз телъымэ, тэгушIо.
Зэрэхабзэу, икIыгъэ тыгъэгъазэм ос цIынэ тIэкIу къыхьыгъагъ, ау нэрэ-Iэрэм жъужьыгъэ, сыда пIомэ мафэхэр фэбагъэх.
Джы хэти тшIуабэ шIэу тызэжэгъэ илъэсыкIэр къихьагъ, щылэ мазэр ­зыпкъ ит гупсэфэу макIо. Ауми, зыдэтымы­шIэжьэу ос фыжь къабзэм тежэ. Осыр — жьы къабз, псауныгъ, къэбзэныгъ. ЧIыопсым хэбдзын гори хэлъэп, кIымафэр зыфырикъужьэу кIомэ, гъэмафэри фэбэ къодыер армырэу, гъэбэжъоу, бэрэчэт-тынчэу къыкIэлъыкIощт, тыщы­Iэмэ, ахэми хэны тафэхъунэп.
Мафэхэр, мазэхэр, илъэсхэр къызэ­кIэ­лъэкIох. Тидунэе дахэ, тичIыгу мамырныгъэ, къэбзэныгъэ ыкIи псауныгъэ пытэ телъынэу, тимурад ехьыжьагъэхэр дахэу зэшIотхыхэзэ хэти тапэкIэ ты­лъыкIотэнэу, илъэсыкIэу къытфэсыгъэр мафэ тэри, зэкIэ цIыфлъэпкъыми тфэ­хъунэу тэлъаIо!
Дзэукъожь Нуриет.