АР-м и Къэралыгъо Совет – Хасэм я XXXIX-рэ зэхэсыгъоу иIагъэр депутатхэм языгъэпсэфыгъо уахътэ ыуж апэрагъ.

Ащ хэлэжьагъэх АР-м и ЛIышъхьэу КъумпIыл Мурат, министрэхэм я Кабинет хэтхэр, федеральнэ ыкIи рес­публикэ къулыкъухэм япащэхэр, нэмыкIхэр. Зэхэсыгъор зэрищагъ Парламентым и Тхьаматэу Владимир Нарожнэм.
Пстэумэ апэу депутатхэр IофышIэ­хэм афэгъэхьыгъэ лъэныкъохэм атегущыIагъэх. АР-м и ЛIышъхьэ Правительствэм и Тхьаматэ игуадзэу гъэ­нэфэгъэнэу Хъоткъо Хъызыр Нурбый ыкъом икандидатурэ къыхилъхьагъ. ЗэIухыгъэ шIыкIэм тетэу депутатхэм амакъэхэр атыхи, нэбгырэ 44-у зэхэ­сыгъом хэлажьэхэрэм зэкIэми дырагъэштагъ. Хъоткъо Хъызыр псэолъэшIыным, псэупIэ-коммунальнэ хъызмэ­тым, гъогухэм ыкIи культурнэ кIэным хахьэрэ псэуалъэхэм ягъэцэкIэжьын, чIыпIэхэм хэхъоныгъэхэр ягъэшIыгъэн­хэм афэгъэзэгъэщт.

АР-м и ЛIышъхьэ Хъоткъо Хъызыр ыпэкIэ Iофэу ышIагъэм, Херсон хэкум и Геническэ районэу Адыгеир зыфэгъэ­загъэм координаторэу загъакIом ащ хэхъоныгъэхэр ышIынхэм, иинфраструктурэ зэтегъэуцожьыгъэным, лъэпкъхэм зэгурыIоныгъэ азыфагу илъыным иIа­хьышхоу ахилъхьагъэм фэшI Зэкъошныгъэм иорден къызэрэфагъэшъошагъэм анаIэ тыраригъэдзагъ.
Хъызыр Нурбый ыкъор илъэсыбэрэ Тэхъутэмыкъое районым и Инэм псэупIэ кой ипэщагъ, нэужым муниципальнэ образованием ипащэ игуадзэу Iоф ышIагъ. Аужырэ илъэсхэм ар АР-м и ЛIышъхьэ иупчIэжьэгъугъ.
Джащ фэдэу цIыфхэм яфитыныгъэ­хэмкIэ Уполномоченнэу Адыгэ Респуб­ликэм иIэнымкIэ Михаил Шебанец икан­дидатурэ депутатхэр хэплъагъэх. Шъэф шIыкIэм тетэу амакъэхэр атыхи, ари игъоу алъытагъ. АР-м и ЛIышъхьэ илъэсыбэрэ а IэнатIэм Iутыгъэ Анатолий Осокиным хэбзэухъумэн IофшIэным шъолъырым зыщиушъомбгъуным, рэхьатныгъэр къэухъумэгъэным, цIыфхэм ягумэкIыгъохэр дэгъэзыжьыгъэнхэм алъэныкъокIэ хэбзэ къулыкъухэмрэ об­щественностымрэ зэдэлэжьэнхэм иIа­хьышхоу ахилъхьагъэм афэшI зэрэфэразэр къыхигъэщыгъ.
Владимир Нарожнэми депутатхэм ацIэкIэ Анатолий Осокиным «тхьауегъэ­псэу» къыриIуагъ.
Нэужым АР-м ихэбзэгъэуцугъэхэм япроектхэу депутатхэр зытегущыIагъэхэм ащыщ медицинэм иIофышIэхэм ипотекэр агъэфедэзэ псэупIэ зэрагъэгъотынымкIэ IэпыIэгъу ятыгъэным фэгъэхьыгъэр. Апшъэрэ ыкIи гурыт медицинэ гъэсэныгъэ зиIэхэр къоджэ псэупIэхэм Iоф ащашIэным кIэгъэгушIугъэнхэм фэшI мы законыр нахьыпэкIэ аштагъэу щыт. АР-м псауныгъэм икъэухъумэнкIэ иминистрэу Мэрэтыкъо Рустем къызэрэщигъэгъозагъэхэмкIэ, нэбгырэ 22-мэ ар къызфагъэфеди унэхэр ащэфыгъэх. Ау хэбзэгъэуцугъэм пIалъэу къыщыдэлъытэгъагъэр мы илъэсым еухы. Ащ фэшI АР-м иминистрэхэм я Кабинет ар 2029-рэ илъэсым итыгъэгъазэ и 31-м нэс лъыгъэкIотэгъэным фэгъэхьыгъэ гъэтэрэзыжьынхэр фэшIыгъэнхэу къызщиIорэ законопроект къыхилъхьагъ. Депутатхэр ащ хаплъэхи, дырагъэштагъ.
ХэушъхьафыкIыгъэ дзэ операцием хэлажьэхэрэмрэ ахэм яунагъохэмрэ IэпыIэгъу ятыгъэным фытегъэпсыхьа­гъэуи хэбзэгъэуцугъэ мы зэхэсыгъом щаштагъ. Ахэм къарыкIырэ сабыеу гурыт ыкIи сэнэхьат зыщарагъэгъотырэ еджапIэхэм ащеджэхэрэр ыпкIэ хэмылъэу шхын стыр зыIэкIагъахьэхэрэм ащыщых. Республикэ законым къызэрэдэлъытэгъагъэмкIэ, дзэкIолIэу хэлажьэхэрэм якIалэхэр ары ащ фэдэ фэгъэкIотэнхэр зиIагъэхэр.
Джы аштэгъэ хэбзэгъэуцугъэм хэу­шъхьафыкIыгъэ дзэ операцием хэкIо­дагъэу е шъобжэу хихыгъэм ыпкъ къикI­кIэ дунаим ехыжьыгъэхэм якIэлэцIыкIухэр гурыт еджапIэр, етIанэ сэнэхьат зыщызэрагъэгъотырэр къаухы­фэкIэ ыпкIэ хэмылъэу агъэшхэнхэу къыщеIо. Адыгеим щыпсэоу, УФ-м и Лъэпкъ гвардие къулыкъу щихьынэу зэзэгъыныгъэм дыкIэтхагъэу, хэушъхьафыкIыгъэ дзэ операцием хэлажьэхэрэм якIэлэцIыкIухэри мыщ къыхеубытэх.
Ахэм анэмыкIэу АР-м изаконхэу цIыфхэм ыкIи ахэм ябагаж язещэн, тыкъэзыуцухьэрэ дунаим икъэухъумэн ыкIи зекIоным алъэныкъокIэ къэралыгъо хэбзэ къулыкъухэм фитыныгъэу яIэхэм, организациехэм ямылъку пае хэбзэ­Iахьэу атырэм, бюджет зэфыщытыкIэхэм, къэралыгъо мылъкум игъэзекIон, унагъом, ныгъом, тыгъом ыкIи кIэлэцIыкIугъом якъэухъумэн, 2024-рэ илъэс бюджеты-р гъэфедагъэ зэрэхъурэм, нэмыкI­хэм афэгъэхьыгъэхэм зэхъокIыныгъэхэр афэшIыгъэнхэм афэгъэхьыгъэ хэбзэгъэ­уцугъэхэм япроектхэм, законхэм атегущыIагъэх, апэрэ ыкIи ятIонэрэ еджэгъухэмкIэ аштагъэх. Адыгэ Респуб­ликэмрэ Луганскэ Народнэ Республи­кэмрэ яхэбзэихъухьэ къулыкъухэм язэдэлэжьэныгъэ фэгъэхьыгъэ унашъори мы зэхэсыгъом щаштагъ.
ХЪУТ Нэфсэт.
Сурэтхэр: А. Гусев.