ШIэжь зэхахь
ИлъэсипшIкIэ узэкIэIэбэжьмэ, Кавказ заор заухыгъэр илъэси 150-рэ зэрэхъугъэм ыкIи ТекIоныгъэшхом и Мафэ афэгъэхьыгъэ шIэжь парк республикэм щагъэпсыгъагъ, ащ чъыг 220-рэ дагъэтIысхьэгъагъ. Адыгэ Хасэм и Совет хэтыгъэ Хэкужъ Адам ары ар зигукъэкIыр. Iофтхьабзэм чанэу хэлэжьагъэх лъэпкъым фэгумэкIырэ цIыфхэу Мыекъуапэ ыкIи республикэм щыпсэухэрэр, адыгэ интеллигенциер.
ЖъоныгъуакIэм и 19-м, шъыгъо-шIэжь Мафэм ехъулIэу, мы чIыпIэм тилъэпкъэгъухэр щызэхэхьагъэх, непэ мамырэу тыпсэуным пае зыпсэ зытыгъэ тятэжъ пIашъэмэ афэгъэхьыгъэ дыуахь къыщахьыгъ, псэпагъэр аIуагъэкIэнэу жъамэ щагъэугъ.
— Чъыгхэр огъэтIысхьэ къодыекIэ икъурэп, ахэм псы акIэпкIэн, уяшIушIэн фае, — еIо Адыгэ Хасэм и Совет хэтэу Нэхэе Аслъан Анзаур ыкъом. — Апэрэ уахътэм а Iофыр Iэпэдэлэл зэрэхъугъэм къыхэкIэу чъыгхэм бэ ахэкIодыкIыгъэр. Джащыгъум Советым хэт кIалэхэр тиIэпыIэгъухэу чъыгыкIэхэр дгъэтIысхьажьыгъэх, къэтшIыхьагъ. КъэпIонкIэ псынкIэ, ау зэкIэми Iоф къапэкIы. Сыдигъуи тигъусэх ыкIи къыддэлажьэх Мыгу Эдуард, Зэрамыку Валерэ, Щыщэ Юрэ, Дэрбэ Аскэр, Нэхэе Мыхьамэт, нэмыкIхэр.
Зэхахьэм къыщыгущыIагъ зэлъашIэрэ общественнэ IофышIэу МэщфэшIу Нэдждэт.
— ЖъоныгъуакIэм и 9-р ТекIоныгъэм и Маф, ар гушIуагъо, ау щымыIэжьхэм, ар къыдэзыхызэ фэхыгъэхэм тафэшъыгъо. Джащ фэдэу тиадыгэ чIыгу тятэжъ пIашъэмэ зэрафэлъэкIэу къагъэгъунагъ, дунаим щитэкъухьагъэ тыхъугъ, заор зыщаухыгъэ мафэри шъыгъо-шIэжьэу хэтэгъэунэфыкIы, ау тыгу дгъэкIодырэп, чъыгым къутэмакIэхэр къызэрэдэчъыжьхэрэм фэдэу къэнэжьыгъэ тIэкIум зеужьыжьы, зеIэтыжьы. Ащ фэдэ зао къэмыхъужьынэу, ащ зыпсэ хэзылъхьагъэхэми джэнэт агъотынэу Тхьэм селъэIу, — къыIуагъ Нэдждэт.
Iофтхьабзэм изэхэщакIоу Нэхэе Аслъан къызэрэхигъэщыгъэмкIэ, паркым дэт чъыгхэм алъапсэ дэгъоу адзыгъ. Джащ фэдэу зэлъашIэрэ шIэныгъэлэжьхэу ыкIи цIыф цIэрыIохэу адыгэ лъэпкъым чанэу фэлэжьэгъэхэ Шъхьэлэхъо Абу, ШъхьаплIэкъо ГъучIыпс, Къэзэнэ Юсыф, УдыкIэко Юр ыкIи Бэгъушъэ Алый ацIэкIэ къужъ-Iэрысэхэр агъэтIысхьагъэх.
Зэхахьэм къыщыгущыIагъэх Нэгъуцу Аслъан, Хьатикъое Адам, Теуцожь Мос, Мыгу Эдуард ыкIи нэмыкIхэр. ШъыгъошIэжь Мафэм мэхьанэу иIэр, тятэжъ пIашъэмэ къинэу алъэгъугъэр, тилъэпкъ иужьыжьын дэлэжьэгъэн зэрэфаер ыкIи къыткIэхъухьэрэ лIэужмэ тиадыгэ чIыналъэ шIу алъэгъоу пIугъэнхэр пшъэрылъ шъхьаIэу зэрэщытыр къэгущыIагъэмэ къыхагъэщыгъ.