Терроризмэ нэшанэ зыхэлъ бзэджэшIагъэхэр псэолъэ зэфэшъхьафхэм зэращызэхащэхэрэм, ащ епхыгъэ къэбар нэпцIэу агъэIухэрэм апэшIуекIогъэным фэгъэхьыгъэ Iофтхьабзэ Мыекъуапэ щызэхащагъ.

Ащ хэлэжьагъэх АР-м хэгъэгу кIоцI IофхэмкIэ и Министерствэ экстремизмэм пэуцужьыгъэнымкIэ и Гупчэ ианалитическэ отдел ипащэу ГутIэ Рэмэзан, Мыекъопэ къэлэ администрацием терроризмэм пэшIуекIогъэнымкIэ щызэхэщэгъэ комиссием иаппарат ипащэу Александр Ермиловыр, къэбар жъугъэм иамалхэм ялIыкIохэр.
Муниципальнэ образованиеу «Къалэу Мыекъуапэ» ишъолъыр рэхьатныгъэр ыкIи общественнэ щынэгъончъагъэр щыгъэпытэгъэнымкIэ IофшIэнэу зэра­хьэхэрэм къатегущыIагъ Александр Ермиловыр. Ащ къызэриIуагъэмкIэ, хэушъхьафыкIыгъэ дзэ операциер зэрэрагъэжьагъэм епхыгъэу, УФ-м и Президентэу Владимир Путиным иунашъокIэ Урысыем и Къыблэ ыкIи Гупчэ Федеральнэ шъолъырхэм ясубъектхэм ащыщ­хэр терроризмэм пэшIуекIогъэнымкIэ гъэлъэшыгъэ шIыкIэм ишапхъэ техьа­гъэх. Ахэм Адыгэ Республикэри къахеубытэ. Ащ къыхэкIэу общественнэ рэхьатны­гъэр, транспортым, связым, энергетикэм ыкIи нэмыкIхэм япсэуалъэхэр къэухъу­мэгъэнхэр нахь агъэлъэшыгъ.
— Терроризмэм пэшIуекIогъэнымкIэ комиссием ипшъэрылъ шъхьаIэхэм ащыщ терроризмэ нэшанэ зыхэлъ хъугъэ-шIагъэхэр къэмыгъэхъугъэнхэмкIэ шIэгъэн фаехэм е ащ фэдэ хъугъэмэ, зэрэзекIощтхэм, медицинэ ыкIи нэмыкI IэпыIэгъоу арагъэгъотын фаехэм афэгъэхьыгъэ къэбархэр икъоу цIыфхэм алъыгъэ­Iэсыгъэнхэр. Мы илъэсыр къызихьагъэм къыщегъэжьагъэу а Iофым епхыгъэ хэутыгъэ 15 къэбар жъугъэм иамалхэм, социальнэ хъытыухэм информационнэ къэбар 60 фэдиз къарагъэ­хьагъ. 2023-рэ илъэсым хэбзэукъоны­гъэхэр къэмыгъэхъугъэнхэм ыкIи цIыф­хэм ящыIэныгъэ къэухъумэгъэным афэIорышIэрэ памяткэ 9000 фэдиз Мые­къуапэ щаго­щыгъ, — хигъэунэфыкIыгъ Александр Ермиловым.
Джащ фэдэу терроризмэм пэшIуекIогъэнымкIэ комиссием ипащэ къыхигъэщыгъэхэм ащыщ автомат шIыкIэм тетэу макъэ зыгъэIурэ системэм иIофшIэн къэлэ администрацием зэрэщиублагъэр. Ар Мыекъуапэ и ЗыкI дежурнэ-диспетчерскэ къулыкъу епхыгъ ыкIи нэмыкI ухъумэкIо къулыкъухэм зэпхыныгъэ адыриI. ОшIэ-дэмышIэ Iоф е терракт къэхъунымкIэ щынагъо къызыуцурэм, цIыфыбэ зыщызэрэугъоирэ чIыпIэхэм ар къащыхэнэщт. ЦIыфхэр лъэшэу къэмыщтэнхэу ащ къыIорэ тхыгъэр зэхагъэу­цуагъ ыкIи Мыекъуапэ и чIыпIэ зэфэшъхьафхэм ащаушэтыгъ. Программэу «Къэлэ щынэгъончъэр» зыфиIорэм къы­дыхэлъытагъэу илъэс зэкIэлъыкIохэм видеокамерэ 2600-м ехъу агъэуцун гухэлъ яI.
Гъэсэныгъэм иорганизациехэм щынэгъончъагъэр зэращызэхэщагъэм мэхьанэ ратызэ уплъэкIунхэр ащызэрахьэх ыкIи щыкIагъэу къыхагъэщыхэрэр зэрэдагъэ­зыжьыщтхэм ыуж итых. Комиссием ипащэ зэрэхигъэунэфыкIыгъэмкIэ, непэ ехъулIэу муниципалитетым ишъолъыр ит гъэсэныгъэ организацие 21-мэ шапхъэхэм атетэу щынэгъончъагъэр ащызэхэщагъ.
Нэужым АР-м хэгъэгу кIоцI IофхэмкIэ и Министерствэ илIыкIоу ГутIэ Рэмэзан терроризмэм фэгъэхьыгъэ къэбар нэпцI­хэр зыгъэIухэрэм якъыхэгъэщынкIэ Iофэу ашIэрэм, пшъэдэкIыжьэу арагъэхьырэм къатегущыIагъ.
— Терроризмэм фэгъэхьыгъэ къэбар нэпцIхэр нахьыбэрэмкIэ дунэе хъытыур къызфагъэфедэзэ агъэIух. Аужырэ илъэс­хэм нафэ зэрэхъугъэмкIэ, терроризмэ нэшанэ зыхэлъ хъу­гъэ-шIагъэм епхыгъэ къэбарыр къулыкъухэм, организацие зэфэ­шъхьафхэм яэлектроннэ адрес къафырадзэ ыкIи а зы къэбарыр УФ-м ишъолъыр зэфэшъхьафхэм а зы уахътэм афатIупщын алъэ­кIы. Ахэм якъыхэгъэщын къулыкъухэм акIуачIэ зэхэлъэу дэлажьэх нахь мышIэми, Iофыр къызэрыкIоу щытэп. Сыда пIомэ бзэджашIэхэм агъэ­федэрэ сервисхэр IэкIыб къэралыгъохэм е джыдэдэм геополитическэ пыеу тиIэ Украинэм яехэу къы­чIэкIы. Арышъ, икъоу ахэм пшъэ­дэкIыжь ядгъэхьынэу хъу­рэп. Арэу щытми, мы лъэныкъом епхыгъэ уголовнэ Iоф 19 къызэIутхыгъ, 18-м «алъапсэ» IэкIыб къэралыгъохэм ащыIэу дгъэунэфыгъэ. Мыщ фэдэ бзэджэшIагъэ зезыхьэхэрэм хьапс илъэси 8 — 10 атыралъхьэ, — къыIуагъ ГутIэ Рэмэзан.
Мыщ фэдэ уголовнэ Iофхэм язэхэфынкIэ техническэ къэкIуапIэу агъэфедэрэр зэрэбэм дакIоу, псынкIэу зэфашIыжьынхэ алъэкIырэп. ГумэкIыгъор дэгъэзыжьыгъэным фэшI къулыкъушIэхэм чанэу Iоф ашIэ нахь мышIэми, ахэр зезыхьэрэ бзэджашIэхэр IэкIыб къэралыгъохэм зэращыпсэухэрэм фэшI кIэух гъэнэфагъэ афашIын алъэкIырэп.
Iофтхьабзэм икIэухым журналистхэм яупчIэхэм игъэкIотыгъэ джэуапхэр къа­ратыжьыгъ.
Iэшъынэ Сусан.