Зичэзыу шIушIэ IэпыIэгъур мызыгъэгум зынагъэсыгъэр Запорожскэ ыкIи Херсонскэ лъэныкъохэр ары.

Километрэ 1900-рэ хъурэ гъогууанэр акIуи, Адыгеим икъэзэкъ ныбжьыкIэмэ я Союз ипащэу Екатерина Загорулькэмрэ къэзэкъ-гъэсакIоу мы Союзым иIэ Александр Даниловымрэ шIушIэ Iофтхьабзэр агъэцэкIагъ.
ЗэкIэмкIи тонни 2,5-рэ хъурэ шIушIэ IэпыIэгъур мыекъопэ артиллерийскэ бригадэм, дзэ госпиталым ыкIи блок-пост­хэу гъогум тетхэм афащагъ.
ГуфэкIо купэу «Тэтиемэ апае тэу­гъуае. Мыекъуап» зыфиIорэм дзэкIолIмэ ялъэIухэр агъэцакIэхэзэ, анахь ящыкIагъэхэр — автомобиль Iэмэ-псымэхэр, гъомылапхъэхэр, IаплъэкIхэр, газыр зэрыт баллонхэр, шэф остыгъэхэр ыкIи нэмыкIхэр къаугъоигъэ ахъщэмкIэ къащэфыгъэх. Ежь-ежьырэу агъэхьазырыгъэ щыфэ уцхэр бэу афащагъэх, ахэр уIагъэхэм ащафэнхэмкIэ яшIуагъэ къякIынэу щыт. Щаир, лимон гъэгъугъэхэр Краснодар краим и Мостовской район щыщ унагъоу Рябушенкэхэм къаратыгъ. Мыекъуапэ ыкIи Мыекъопэ районым ащыпсэухэрэм шъоур, джем зэфэшъхьафхэр, унэм щагъэхьазырыгъэ хьаджыгъэхэкI гъомылапхъэхэр, шIоIухэр къыхалъхьагъэх. Шытхьэлэ районым ит станицэу Великовечнэм щыпсэурэмэ хэтэрыкIхэр зэрылъ Iалъмэкъ хъагъэхэмкIэ IофыгъошIум къыхэлэжьагъэх.
ЦIыфхэр чанэу Iофтхьабзэм къызэрэ­хэлажьэхэрэм ишIуагъэкIэ псынкIэу ахъщэр къаугъоин алъэкIыгъ, а мылъкум­кIэ мандарин ыкIи лимон килограмми 130-рэ, помидор килограмми 100-м ехъу къащэфыгъэх.
Адыгеим икъэзэкъ ныбжьыкIэмэ дронэу къащэфыгъэр ратыгъ позывноеу «Псих» зыцIэм. Джащ фэдэу зызэготхагъэхэр илъэсипшI зэрэхъугъэм ехъулIэу шIухьафтын ащ ишъхьэгъусэ ышIыгъ — тыжьыным хэшIыкIыгъэ Iэлъыныр Екатерина Загорулькэм дзэкIолIым IэкIигъэхьажьыгъ.
Мы чIыпIэм щыпсэурэ сабыйхэми IэшIу-IушIухэр афагощыгъэх, ахэм зэдэгущыIэгъухэр адашIыгъ, Урысыем игражданхэу зэрэхъугъэхэм агу къызэриIэтырэр кIэлэцIыкIумэ къаIотагъ.
Энергодар дэжь шIушIэ IэпыIэгъум игощын ыкIэм щыфэкIуагъ. Мыекъуапэ щыпсэухэрэм къагъэхьазырыгъэхэр ащ щыIэ дзэкIолIмэ аIэкIагъэхьагъэх.
ЗекIо атаманэу «ПетровичкIэ» заджэ­хэрэм ТекIоныгъэм и Быракъэу кIэлэцIыкIумэ аIапэхэр зыкIэдзагъэмрэ сурэтэу ашIыгъэхэмрэ ратыгъэх. Ащ къыгъэгугъагъэх заор аухыфэ быракъыр ымытIупщынэу, нэужым ар Адыгеим икъэзэкъхэм я Союз къыфихьыжьынэу.
ШIушIэ IэпыIэгъум иугъоин закъоп Союзыр зыпылъыр, письмэхэм ятхын, сурэтхэм яшIын дэлажьэ, дзэкIолIхэм агухэр ахэм къаIэты. Позывноеу «Пересвет» зиIэм къэзэкъ пшъэшъэжъые ныбжьыкIэу Мыекъуапэ дэт еджапIэу N 10-м щеджэрэм письмэ къыфигъэ­хьыжьыгъ. Лотореехэу зи къэзымыхьын зыхэмытхэр, IэшIу-IушIухэр къырыпхьынэу гъэпсыгъагъэхэр, ежь игукъэ­кIыкIэ пшъэшъэжъыем афигъэхьазы­рыгъ. А шIыкIэр дзэкIолIым лъэшэу ыгу ри­хьыгъ ыкIи мыщ фэдэ гущыIэхэр ащ къыфитхыжьыгъэх: «ДгъэлъэпIэрэ Валерие шIуфэс фабэ етэхы!!! Тэ, дзэкIолI-хэу, къэзэкъхэу хэушъхьафыкIыгъэ дзэ операцием хэлажьэхэрэм, тыгъуасэ лъэшэу тыгушIуагъ, анахьэу къыхэзгъэщынэу сызыфаер «пчыхьэ IэшIу» о уихьатыркIэ зэрэтиIагъэр ары. ЯмышIыкIэу о къэу­угупшысыгъэм тыгу къыдищэягъ. Зэо Iофхэм зы охътэ пIалъэкIэ такъызэрэхэпщыгъэм пае «тхьауегъэпсэушхо» къы­отэIо. Лотореем зэкIэхэри хэлэжьагъэх, ащыщхэр ятIонэрэуи хэлэжьэнхэм дэгуIэщтыгъэх. Тыгухэр къэб­гъэрэхьатыгъэх, шъукъызэрэтфэгумэкIырэр, шъу­зэрэтигъусэр зэхэтшIагъэ. ШъуиныбжьыкIэгъу шIуагъэ къытэу жъугъакIо, щыIэ­ны­гъэм IэшIугъэу хэ­лъыр къыхэшъух! Тэ дунаир къэрэхьатыжьыным пае тфэшIэщтыр зэкIэ тшIэщт!!! Ащ фэдэ IэпыIэгъу тиIэщтмэ, тэ тызэрэте­кIо­щтым уехъырэхъышэжьынэу щытэп!!!»
Непэрэ мафэм тэ дзэкIолIмэ ялъэIу­хэр тэгъэцэкIэжьых, ахэм яунагъохэм, ячIыгогъухэм ягущыIэ фабэхэр алъытэгъэIэсыжьых.
ШIушIэ IэпыIэгъум икъэугъоин зиIахь къыхэзылъхьагъэмэ зэкIэмэ тафэразэу «тхьашъуегъэпсэу» ятэIо. Тэ тшъхьэкIэ дзэкIолIмэ ящыкIагъэхэр къэтэщэфых ыкIи аIэкIэтэгъэхьажьых, ащкIэ къэдгъэ­лъэгъонэу тыфай тэщ пае заорэмэ тазэраготыр, текIоныгъэр къызэрэдгъэб­лэгъэщтым тэри тиIахь зэрэхэтшIыхьэрэр.
Екатерина Загорулько.
Адыгеим икъэзэкъ ныбжьыкIэмэ я Союз итхьамат.