НэкIмазэм иаужырэ чэщ-мэфипшI КъурIан лъапIэр Алахьталэм къыригъэхынэу зыщыригъэжьэгъэ чэщыр хэт. Ар — Къадыр чэщыр — мэзэ минмэ анахь лъапIэр ары.

АР-м и ДиндэлэжьапIэ иIимамэу Шъхьэ­лэхъо Ибрахьим къызэриIуагъэмкIэ, гъэтхапэм и 30-м аужырэ чэщипшIэу Къадыр чэщыр зыхэтыр къехьэ. Алахьталэм ар чэщ гъэнэфагъэ ышIыгъ, ау а мафэр зытефэрэр къыIуагъэп. Арэущтэу зыкIишIыгъэр цIыфхэр а зы чэщ закъом ежэхэу щымысынхэм, чэщмэфипшIым къыкIоцI дыуахь ыкIи нэмазхэр ашIынхэм пай. Алахьталэм КъурIан лъапIэм ия 97-рэ сурэ иапэрэ Iэят къыщеIо: «Тэ Къадыр чэщым КъурIан лъапIэр къедгъэ­хыгъ. Къадыр чэщыр тэ дгъэлъэпIагъэ, ар мэзэ минмэ анахь лъапI». Я 97-рэ сурэм ия 4-рэ Iэят къыщеIо: «Тхьэм иIизынкIэ а чэщым мэлаIичхэри Джэбраили уашъом къехыхи, зэкIэ зэгъэфэгъахэу къахьыгъ». Я 97-рэ сурэм ия 5-рэ Iэят мырэущтэу ит: «Алахьталэр а чэщым мамырныгъэ чэщкIэ еджагъ».
ЦIыфхэм къарыкIощтыри, къэхъущтхэри, цIыфхэм ярызыкъи Къадыр чэщым мэлаIичхэм атхых. ЫпшъэкIэ къыщытIогъэ пстэуми апай адрэ чэщхэм ялыеу мы чэщыр зыфэлъапIэр. Мы чэщ лъапIэм Тхьэм нахьыбэрэ тызфелъэIурэр ирэзэныгъэ, игукIэгъу, ипсапэхэр къытлъигъэ­Iэсынхэм пай. Пегъымбарым ыIуагъ: «Шъулъыхъу Къадыр чэщым НэкIмазэм иаужырэ мэфипшIым». Пегъымбарым ишъхьэгъусэу Айшэ къыIожьыгъ Къадыр чэщым дыухьэу къэпIощтыр: «Я Алахь, о псэкIодхэр огъэгъух, шIу олъэгъу псэкIодхэр бгъэгъунхэу, сыолъэIу сэри, сипсэкIодхэр къысфэгъэгъух».
Алахьталэм игъогу тетхэу нэкIыр зынэкIэу, нэмазыр зышIэу, а чэщым фэхьазырэу екIуалIэхэрэм ар къызысыкIэ тобэр яIэу, ащ еуцолIагъэхэу, чэщым Тхьэм елъэIоу щысыгъэхэм гукIэгъу ащ къафишIыщт, мэзэ минкIэ а чэщыр афи­Iэтыщт.
Сэдакъэ е фытыр птын фае
Мы мазэм сэдакъэ птыныр, КъурIан уеджэныр, нэмаз уахътэхэр блэмыгъэ­кIынхэр, тэрауихь нэмазыр чэщырэ пшIыныр псэпэшхоу щыт.
Ислъам диным фытыр, зэчат, сэдакъэ хэт. Зэчатэр мылъку зиIэ цIыфым имылъку (ахъщэми, лэжьыгъэми) хихын фае. Мылъку зимыIэм сэдакъэ еты. Ащ уахъти, хэхыгъи пылъэп, уиIэ горэ тхьамыкIэм еоты.
Фытырыр зыми хахьэрэп. Зэзакъо НэкIмазэм ыкIэм птын фае. Уфаемэ, нэкIыр зэрэрагъажьэу ар пшIэми хъущт, ау Бирам нэмазыр рамыгъажьэзэ ар птын фае. ЫкIэм нахь бгъэкIуатэмэ зыкIэнахьышIур тхьамыкIэм зыгорэ IэкIэ­лъэу Бирамым техьаным фэшI.
ЗынэкIырэ пстэуми, зымынэкIыгъэхэми, сабыйхэми, ахэм ямызакъоу, нэкIмэзэ мазэр имыкIызэ къэхъугъэхэми фытырыр афэптынэу щыт. Унагъом ис пэпчъ телъытагъэу ар аты. Сымаджэу щылъым, тхьамыкIэм, сабыибэ зиIэм (уиIахьылхэми хъущт) фытырыр ептынэу тефэ. Зэ­птыщтым нахь ищыкIагъэмэ, шхынкIэ фэохьы е ащ тефэрэ ахъщэр ептымэ, зыфаер къыщэфыщт. Ар, фытырыр, зы­фэдизыщтыр къызэралъытэрэр — быс­лъымэныр зыщыпсэурэ чIыпIэм щалэжьырэ лэжьыгъэ килограмми 3 е ащ ыуасэ фэдиз зы нэбгырэм ытынэу тефэ.
ФытырыпкIэр зыфэдизыщтэу агъэнэфагъэр зы нэбгырэм телъытагъэу сомэ 250-рэ.
Пегъымбар Мухьамэдым къыIуагъ: «Алахьым шIошъхъуныгъэ фашIэу, ипсапэ щыгугъхэу Рэмэзан мазэм нэмаз зышIыгъэхэм Алахьым ахэм ягунахьхэр афигъэгъущт».