Адыгеим щыпсэухэу гъот зиIэхэм шIушIэным, псэпэшIэным алъэныкъокIэ Iофыгъоу зэрахьэхэрэм уарыгушхонэу щыт.

НэкIмэзэ мазэм къыриубытэу АР-м ыкIи Пшызэ шъолъыр ащыпсэурэ быслъымэнхэм я ДиндэлэжьапIэ гъот макIэ зиIэ унагъохэм апае шIушIэ Iофтхьабзэ зэхищагъ. Ахъщэм икъэугъоин ыкIи гъомылапхъэхэм якъэщэфын пылъых динлэжь бзылъфыгъэхэр.
ШIушIэ Iофтхьабзэм изэхэщакIохэм ахэтэу ыкIи динлэжьэу Емыж Заремэ къызэрэтиIуагъэмкIэ, илъэс 20 фэдиз хъугъэу мэщытым фэлажьэ. ШIушIэ IэпыIэгъур нэмыкI пшъэшъэжъыехэм ягукъэкIыкIэ апэ рагъэ­жьэгъагъ, гъот макIэ зиIэ ыкIи сабыибэ зэрыс унэгъо зытIущмэ гъомылапхъэ афащэщтыгъ, мылъкукIэ адэIэпыIэщтыгъэх. Нэужым ежьыри ахэтэу IэпыIэгъу зыфэ­хъунхэу зытефэрэ унэгъо пчъагъэхэм ахагъэхъуагъ.

— Муфтиим ишIэ хэлъэу шIушIэ Iофтхьабзэм пае ахъщэ тэугъои. Зыпари шъэф хэмылъэу, ар къэзытыгъэр ыкIи зыфэдизыр зэкIэмкIи нэрылъэгъоу щыт. КъэIогъэн фае, динлэжьхэм ыкIи быслъымэнхэм ямызакъоу, НэкIмазэм пае урысхэми, нэмыкI цIыф лъэпкъхэми картэм ахъщэ къытфырагъахьэ. Мыгъэ ахъщэ угъоиныр нахь пасэу, мэзаем, езгъэжьагъ. Сыда пIомэ НэкIмазэм иапэрэ мафэ цIыфыр зэрэхэIэжьын гъомылапхъэ иIэн фае. Мы мафэм ехъулIэу гъот макIэ яIэу унэгъо 55-рэ фэдиз ттхыгъэ, ахэм зэкIэми IэпыIэгъу аIэкIэтэгъахьэ. Лъэпкъэу зыщыщхэмкIэ зэхэдз тшIырэп, зищыкIагъэу тлъытэхэрэм тадэIэпыIэ, — къыIуагъ Заремэ.
Непэ, гъэтхапэм и 30-м, шIушIэ Iофтхьабзэм ия 3-рэ уцугъо хахьэу зищыкIагъэхэм гъомылапхъэхэр афащэщтых. Ахэр мыкIодыщт гъомылапхъэхэу пындж, шъоущыгъу, хьаджыгъ, дагъэ, фыгу, псы IэшIу, IэшIу-IушIухэр, чэтыл, нэмыкIхэри.
Апэрэ Iофтхьабзэр НэкIмазэр къызщихьащтым ипэгъокIэу, гъэтхапэм и 9-м, ятIуанэрэр гъэтхапэм и 23-м рагъэкIокIыгъ. Гъот макIэ зиIэ унэгъо 20-м якIэ­лэцIыкIу 50 фэдизмэ IэшIу-IушIухэр ыкIи тхылъ цIыкIухэр зэрылъ къэмланхэр афащагъэх.
Заремэ къызэриIуагъэмкIэ, шхапIэ зыIыгъ узбек кIалэхэм ыпкIэ хэмылъэу агощыщт щэламэхэр къаратыгъэх. Ащ нэмыкIэу «Титаным» итучанитIоу Мые­къуапэ дэтхэм, зыр Черемушкэм щыI, адрэр урамэу Жуковскэм тет, гъучI матэхэр ачIэтхэу псапэ зышIэнэу фаехэм гъомылапхъэхэр аралъхьэ. Нэужым ахэр зищыкIагъэхэм афащэх. ШIушIэ IэпыIэгъум чанэу хэлажьэх Быркъ Бэллэ, Мыгу Рузанэ, Жанэ Назирэ, Бэгъушъэ Тамарэ, Теуцожь Джэнэт, Бырсыр Эллэ, Бэгъушъэ Альберт, Дзыбэ Альмир, Къохъужъ Асе.
Хэти псапэу ышIагъэр фэдишъэкIэ къыIукIэжьынэу Тхьэм тафелъэIу.
КIАРЭ Фатим.
Сурэтхэр: АР-м и ДиндэлэжьапI.