Мэкъэ дахэкIэ къэIогъэ орэдхэм ядэIунэу зикIасэхэм апае къэбар гушIуагъу. Урысые зэнэкъокъоу «Жъуа­гъо-2024-м» икъэгъэлъэгъон телеканалэу «Звезда» зыфиIорэм щиублэщт.

Мэлылъфэгъум и 6-м апэ­рэ къэтыныр эфирым къи­хьащт. Диана Орловскаям зэнэкъокъум илъэхъаныкIэ Адыгеир къыщигъэлъэгъощт. Ар илъэс 18-рэ Мыекъуапэ дэсыгъ, непэ Москва щэпсэу. Илъэс 35-рэ ыныбжь, унагъо ис, пшъэшъэжъые епIу. Джырэ искусствэмкIэ институтыр къыухыгъ, эстраднэ-джаз орэдкъэIонымкIэ сэнэхьат зэригъэгъотыгъ. «Театр Александра Рыбникова» зыфиIо­рэм иартист, Семеновскэ дзэм щэрыонымкIэ ихэу­шъхьафыкIыгъэ клуб ипащ.
Зыфэдэ къэмыхъугъэ мэкъэ бэлахь зиIэу къэралы­гъом ишъолъырхэм зэкIэм къарыкIыщтхэм Диана Орлов­скаяр янэкъокъущт. ПстэумкIи нэбгырэ 89-рэ сценэ иным къытехьащт ыкIи сэнаущыгъэу ахэлъымрэ ар зэрагъэIорышIэшъурэмрэ къагъэлъэгъощт. Мы пчъагъэм щыщэу кIэух едзыгъом нэ­сыщтыр нэбгырэ 16: 8-р — осэшI купым, адырэхэр еплъы­хэрэм амакъэ зыфатыхэрэмкIэ къыхахыщтых. ЦIыфхэм агу рихьыгъэм ыцIэ хъытыу нэкIубгъоу «зазвезду.рф» зыфиIорэмкIэ къыха­гъэщын алъэкIыщт. Аужырэ едзыгъор Урысыем и Мафэ ипэгъокIэу, мэкъуогъум и 8 — 9-м щыIэщт, «Жъуагъо-2024» зыфиIорэ цIэр зыхьыщтыр ащ къыщынэфэщт ыкIи сомэ миллион фагъэшъошэщт. Шъори къэтынхэм шъуа­лъыплъ, Адыгэ Республикэр къэзыгъэлъэгъощт Диана Ор­ловскаям шъумакъэхэр фэшъутых.
Зэнэкъокъур мэлылъфэ­гъум и 6-м къыщегъэжьагъэу шэмбэт къэс, телеканалэу «Звезда» зыфиIорэмкIэ, пчы­хьэм сыхьатыр 21:15-м къагъэлъагъозэ ашIыщт. Мэкъэтынри тхьамафэ къэс кIощт.
Анцокъо Ирин.