ЦIыфым банкхэм чIыфэ къаIихын фимытэу ежь-­ежьырэу зыфигъэпсыжьын амал иIэным фэгъэхьыгъэ хэбзэгъэуцугъэм ипроект апэрэ еджэгъумкIэ УФ-м ­и Къэралыгъо Думэ ща­штагъ.

«Самозапрет на кредиты» зэре­джагъэхэр. ЦIыфхэм яшIэ хэмы­лъэу ацIэкIэ чIыфэхэр бзэджа­шIэхэм къызэратыхэрэм е къа­гъапцIэхэзэ зэрарагъаштэрэм ипчъагъэ нахьыбэ мэхъу зэпыт. Законопроектым кIэщакIо фэхъугъэхэм къызэраIорэмкIэ, 2022-рэ илъэсым цIыфым ишIэ хэмылъэу агъэпсыгъэ кредитхэм япчъагъэ, ыпэрэ 2021-м егъэпшагъэмэ, проценти 4,29-кIэ нахьыбэ хъугъэ. АхъщэкIэ къэплъытэмэ, сомэ миллиард 14-м ехъу чIыфэу къатырагъэфагъ.
Ащ фэдэ бзэджэшIагъэхэм цIыф­хэм ащыухъумэгъэнхэр ары «самозапретыр» къаугупшысыным ушъхьагъу шъхьаIэ фэхъугъэр. Хэбзэгъэуцугъэр заштэкIэ, зыпа­рэми ишIэ хэмылъэу ыцIэкIэ кредит агъэпсын е гъэпцIагъэкIэ къы­­Iырагъэхын амал бзэджашIэхэм яIэжьыщтэп.
Интернетыр агъэфедэзэ пэIу­дзыгъэ шIыкIэм тетэу агъэпсырэ кредитхэр ары мыщ къыхиубытэщтхэр. «Самозапретыр» ыгъэ­псыщтмэ хэти ежь иIоф, зыпари рагъэзыщтэп. Ащ фэдэ гъунапкъэ зыфишIыжьмэ зышIоигъор банкым екIуалIэу лъэIу тхылъ ытымэ ыпкIэ хэмылъэу къыфагъэпсынэу хэ­бзэгъэуцугъэм ипроект къыщеIо. Нэужым «кредитнэ историехэм» апылъ агентствэм ар фагъэхьыщт. ТапэкIэ къэралыгъо фэIо-фашIэхэм япортал е МФЦ-м ащыбгъэпсы­шъунэу къашIын гухэлъ яI.
«Самозапретыр» цIыфым мызэу-мытIоу зытырилъхьан, етIанэ зытырихыжьын фитыщт. Ащ пае лъэIу тхылъыр зитыгъэм ыуж чэщ-­зымафэ нахьыбэ темышIэу ар гъэ­цэ­кIагъэ хъун фае.
Хэбзэгъэуцугъэм кIуачIэ иIэ зы­хъурэм ыуж, кредит ыгъэпсынэу банкым екIуалIэрэ пэпчъ «икредит­нэ историе» ыпэрапшIэу ауплъэ­кIущт. ЧIыфэ ыштэн ымылъэкIынэу зыфигъэпсыжьыгъэмэ, ишIэ хэмы­лъэу ар тырахыжьыщтэп.
Мы законопроектыр икIыгъэ илъэ­сым игъатхэ депутатхэм агъэ­хьазырыгъ. А илъэс дэдэм апэрэ еджэгъур «къызэпичыгъ», нэужым УФ-м и Правительствэ ащ игъоу ылъытагъ.
Хэбзэгъэуцугъэр мыгъатхэ аштэ­мэ, 2024-рэ илъэсым иятIонэрэ мэзих кIуачIэ иIэ хъущт.
Зыгъэхьазырыгъэр
ХЪУТ Нэфсэт