Урысые Федерацием и Лъэпкъ гвардие идзэхэм яфедеральнэ къулыкъу и Мафэ
ехъулIэу АР-м и ЛIышъхьэ и Коорди­на­ци­оннэ гупчэ зэIукIэ щыкIуагъ.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, Къэралыгъо Со­ветым — Хасэм и Тхьаматэу Владимир Нарожнэр, феде­ральнэ инспектор шъхьаIэу Сергей Дрокиныр, Росгвардием и ГъэIорышIапIэу Адыгэ Республикэм щыIэм ипащэу Олег Якушевыр, АР-м и Прокуратурэ, АР-м и Апшъэрэ хьы­кум, АР-м хэгъэгу кIоцI Iоф­хэмкIэ и Министерствэ, щы­нэгъончъэнымкIэ Федеральнэ къулыкъум и ГъэIорышIапIэу Адыгэ Республикэм щыIэм, АР-м ошIэ-дэмышIэ IофхэмкIэ и Министерствэ, Росгвардием и ГъэIорышIапIэу АР-м щыIэм япащэхэр, мы къулыкъум иветеранхэр.
Урысыем и Президентэу Владимир Путиным пэIудзыгъэ шIыкIэм тетэу шIуфэсэу къари­хыгъэр мы зэIукIэм къыщагъэлъэгъуагъ, Росгвардием иIофы­шIэхэм лIыхъужъныгъэу зэра­хьэрэм, я Хэгъэгу, хэбзэ шIа­гъоу щыIэ хъугъэхэм зэрафэшъыпкъэхэм апае зэрафэразэр ащ къыIуагъ.
«Росгвардием мэхьанэшхо зиIэ ыкIи пшъэдэкIыжь зыхэлъ пшъэрылъхэр зэшIуехых: бзэ­джэшIагъэм, терроризмэм, экс­тремизмэм апэшIуекIорэ бэнэныгъэр, стратегие мэхьанэ зиIэ, транспорт ыкIи инфраструктурэ псэуалъэхэр къэухъумэгъэнхэр, Iашэхэм ягъэфедэн изытет тэ­рэзэу уплъэкIугъэныр ыкIи нэ­мыкIхэр», — къыIуагъ Владимир Путиным.

Iофтхьабзэм илъэхъан къызэрэхагъэщыгъэмкIэ, мы къулыкъур зыщыIэр илъэс 213-рэ хъугъэ. А I-рэ Александр унашъоу ышIыгъэм тетэу 1811-рэ илъэсым хэгъэгу кIоцI Iофы­гъохэм афэгъэзэгъэщт под­разделениехэр зэхащэгъагъэх. Рос­гвардием и ГъэIорышIапIэу Адыгэ Республикэм щыIэр 2016-рэ илъэсым чъэпыогъум зэхащэгъагъ. КъулыкъукIэм лъапсэ фэхъугъэх ведомственнэ къэухъумэнымкIэ гъэIоры­шIапIэр, пшъэрылъ гъэнэфагъэ зыгъэцэкIэрэ отрядыр, авиаотрядыр, АР-м и МВД лицензиехэр ятыгъэнхэм фэгъэзэгъэ Iофтхьабзэхэр зэшIозыхырэ игупчэ ыкIи нэмыкIхэр.
Къэзэрэугъоигъэхэм шIуфэс къарихызэ Адыгеим и ЛIышъхьэ къызэрэхигъэщыгъэмкIэ, хэ­бзэухъумэн системэм изы лъэ­ныкъоу анахь шIуагъэ къэзытыхэрэм къулыкъур ащыщ ­хъугъэ.
«Непэ УIэшыгъэ КIуачIэхэм ядзэкIолIхэм ягъусэхэу рос­гвардейцэхэм хэушъхьафыкIыгъэ дзэ операцием ишъолъыр теубытагъэрэ блэнагъэрэ ахэлъэу япшъэрылъхэр щагъэцакIэх, шъхьафит ашIыжьыгъэ чIыпIэхэм хабзэр ыкIи мамыр цIыфхэр къащаухъумэх. Тэ тичIыпIэгъу­хэм ялIыхъужъныгъэ тырэгу­шхо. Ахэм ащыщыбэхэм къэралыгъо тын лъапIэхэр афагъэшъошагъэх», — къыIуагъ КъумпIыл Мурат.
ЗэIукIэм хэлажьэхэрэр зы такъикърэ афэшъыгъуагъэх Рос­гвардием иIофышIэхэу фэхы­гъэхэм. Ахэр зышъхьамысыжьхэу яхэгъэгу ишъхьафитыныгъэ фэбэнагъэх, цIыфхэм ящынэ­гъончъагъэ къаухъумагъ.
КъумпIыл Мурат анахьэу анаIэ зытыраригъэдзагъэхэм ащыщ Подмосковьем къыщы­хъугъэ тхьамыкIагъор. Урысыем ипыйхэр хэгъэгу кIоцIым мы­хъо-мышIагъэхэр къыралъхьанхэм, цIыф лъэпкъ зэфэшъхьаф­хэм къахэкIыгъэхэм язэгуры­Iоныгъэ аукъоным, Урысыем щыпсэурэ цIыфхэм язэкъотныгъэ зэрар рахыным пылъых.
«Республикэм ищынэгъончъэн къэухъумэгъэным мэхьа­нэшхо иI, экстремизмэмрэ тер­роризмэмрэ ясыд фэдэрэ лъэныкъо гуцаф фэшъушIымэ, ащ гъогур фызэпышъубзыкIын фае. Адыгеим ис цIыфхэм къызэраухъумэхэрэр икъоу зэхашIэн фае», — къыIуагъ КъумпIыл Мурат.
Республикэм ипащэ къызэриIуагъэмкIэ, хабзэм икъулы­къухэм, Росгвардием ыкIи хэ­бзэухъумэнымкIэ Iофыгъо гъэ­нэфагъэхэр зэшIозыхырэ пстэуми Урысыем и Президент ихэ­дзынхэм ялъэхъан хабзэр укъуагъэ мыхъуным пае бэ зэшIуахыгъэр. Хэгъэгум ифе­дэхэр къэухъумэгъэнхэм, об­щественнэ щынэгъончъэныр гъэпытэгъэным апае ГъэIорышIапIэм иIофышIэхэмрэ иветеранхэмрэ зэрафэразэр рес­публикэм и ЛIышъхьэ къыIуагъ. Анахьэу ащ ирэзэныгъэ гущыIэхэр зыфэгъэзэгъагъэхэр хэушъхьафыкIыгъэ дзэ операцием хэлажьэхэрэмрэ ахэм ягупсэхэмрэ ары.
Республикэм и ЛIышъхьэ Росгвардием и ГъэIорышIапIэу АР-м щыIэм ипащэ игуадзэу Сергей Трубниковым медалэу «За храбрость» зыфиIоу я II-рэ шъуашэ зиIэр ритыжьыгъ. Джащ фэдэу дзэкIолI заулэмэ АР-м и ЛIышъхьэ ирэзэныгъэ тхылъхэр аритыжьыгъэх.
АР-м и Къэралыгъо Совет — Хасэм и Тхьаматэу Владимир Нарожнэм, АР-м и Апшъэрэ хьыкум и Тхьаматэу Шумэн Байзэт, ФСБ-м и ГъэIорышIапIэу АР-м щыIэм ипащэу Михаил Кемеровым, АР-м хэгъэгу ­кIоцI IофхэмкIэ иминистрэу Олег Безсмельницыным, Урысыем и МЧС и ГъэIорышIапIэу АР-м щыIэм ипащэу Станислав Илющенкэм, Росгвардием и ГъэIорышIапIэу АР-м щыIэм ипащэу Олег Якушевым къулыкъум хэтхэмрэ ащ иветеранхэмрэ афэгъэхьыгъэ шIуфэс гущыIэ фабэхэр къаIуагъэх.
Къулыкъум анахь дэгъоу зыкъыщызгъэлъэгъуагъэхэм АР-м и Къэралыгъо Совет — Хасэм ирэзэныгъэ тхылъхэр, АР-м и Апшъэрэ хьыкум, ФСБ-м и ГъэIорышIапIэу АР-м щыIэм, АР-м и МВД, нэмыкIхэми ящытхъу тхылъхэр, медальхэу «За боевое отличие», «За проявленную доблесть» зыфиIо­хэрэр, бгъэхалъхьэу «Участник боевых действий» зыфиIорэр къаратыжьыгъэх.
Адыгэ Республикэм и ЛIышъхьэ ипресс-къулыкъу