КIэлэцIыкIухэр щынэгъончъэу автомобилькIэ зещэгъэнхэм фэIорышIэрэ Iофтхьабзэхэр гъогу инспекторхэм бэрэ зэхащэх.

БэмышIэу пэшIорыгъэшъ Iофтхьабзэу рагъэкIокIыгъэм гъогурыкIоным ишапхъэхэр шIокI имыIэу агъэцэкIэнхэ ыкIи кIэлэцIыкIухэм язещэн екIолIэкIэ гъэ­нэфагъэ фыряIэнэу зэрэщытым водительхэм анаIэ щытырарагъэдзагъ.
Зыныбжь имыкъугъэ кIэлэцIыкIухэр зещэгъэнхэм пшъэдэкIыжь хэлъэу ны-тыхэр екIолIэнхэм полицейскэхэр къы­фэджагъэх. Водитель пэпчъ зэрэзекIорэм илъэшыгъэ лъыплъэжьын ыкIи игъом къэуцужьышъуным фэхьазырын фае.
Джащ фэдэу автоинспекторхэм къа­Iотагъэхэм ащыщ хэушъхьафыкIыгъэ кIэлэцIыкIу тIысыпIэу щыIэхэр зыфэдэхэр, сабыим ыныбжь елъытыгъэу къызэрэхэпхыщтыр, ар автомобилым тэрэзэу зэрибгъэуцощт шIыкIэр. Сабыйхэм япсауныгъэ ыкIи ящыIэныгъэ ухъумэгъэнымкIэ мыр анахь амалышIоу зэрэщытыр полицейскэхэм къыхагъэщыгъ. КIэлэцIыкIу пкъынэ-лынэр зэрэзэхэлъым диштэу хэушъхьафыкIыгъэ тIысыпIэр гъэпсыгъэ.
Гъогу хъугъэ-шIагъэм зыхафэхэкIэ, сабыир акокI исымэ нахь щынэгъончъэу ны-тыхэм зэралъытэрэр зэрэмытэрэзыр гущыIэгъу зыфэхъугъэхэм агурагъэ­Iуагъ.
КIэлэцIыкIу-пассажирхэм гъогум къыщыхъун ылъэ­кIыщтым зыгорэ хашIыхьан амал яIэп, ахэм ящынэгъончъагъэ нахьыжъхэм зэрэщытэу аIэ илъ. Арышъ, язекIуакIэ акъылыгъэ хэлъэу ыкIи яшэн-гъэпсыкIэкIэ щысэтехыпIэу ны-тыхэр щытынхэ фае. Автомобилым зитIысхьэхэкIэ щынэгъончъэ бгырыпхыр зытыралъхьанэу, зыныбжь имыкъугъэ къадисмэ, амал зэриIэкIэ ар аухъумэнэу щыт.
КIэлэцIыкIухэр зещэгъэнхэм ишапхъэхэр зыукъо­хэрэм пшъэдэкIыжьэу арагъэхьырэр полицейскэхэм Iофтхьабзэм хэлэжьагъэхэм агу къагъэкIыжьыгъ.