ГъогурыкIоным ишапхъэхэр зыукъогъэ хъулъфыгъэу полицием къыубытыгъэм административнэ пшъэдэкIыжьэу чэщ-зымэфэ 30 хьапс тыралъхьагъ.

Интернет хъытыухэм ыкIи къэбар жъугъэм иамалхэм къарыхьэрэ къэбархэм полицием икъулыкъушIэхэр алъыплъэхэзэ, зыщыщ амышIэрэ водителэу къэралыгъо номерхэр зытемылъ автомобилыр шапхъэхэр ыукъохэзэ зэригъэIорышIэрэр зэрыт видеор къагъотыгъ. Ар Мыекъуапэ иурамхэм арычъэзэ, нэмыкI машинэхэри щынэгъо чIыпIэхэм аригъафэхэу хэтыгъ.
Нэужым автомобилым имаркэ ыкIи ар зезыфэщтыгъэр полицием ыгъэунэфыгъ. Мыекъуапэ щыщ илъэс 40 зыныбжь хъулъфыгъэу ар къычIэкIыгъ. Хэбзэукъо­ныгъэхэр зезыхьагъэр аубытыгъ ыкIи ащ ылъэныкъокIэ административнэ протоколи 3 зэхагъэуцагъ.
Автоинспекторхэм зэрагъэунэфыгъэмкIэ, транспорт амалыр зэрифэнымкIэ фитыныгъэ хъулъфыгъэм иIагъэп, ащ идокументхэм япIалъэ зикIыгъэр бэшIагъэ ыкIи ар лъигъэкIотагъэп. Ащ нэмыкIэу, ыпэкIэ постановлениеу тыратхэгъагъэхэу кIуачIэ зиIэ хъугъэхэм къадыхэлъытэгъэ тазырхэр ытыжьыгъэхэп.
Ары пакIошъ, мы хъулъфыгъэм ышIэзэ, нэхъоинчъэу шапхъэхэр ыукъощтыгъ. А IофымкIэ 2016-рэ илъэсым къыщегъэжьагъэу пчъагъэрэ административнэ пшъэдэкIыжь рагъэхьыгъ. Я 264.1-рэ статьямкIэ тIогъогогъурэ хьапс тыралъхьагъ ыкIи гъогу транспорт хъугъэ-шIэгъи 3-мэ ащ илажьэ ахэлъ.
Мы уахътэм хьыкумым админстративнэ хьапс чэщ-зымэфэ 30 хъулъфыгъэм тырилъхьагъ.
НэкIубгъор зыгъэхьазырыгъэр
Iэшъынэ Сусан.