ХэушъхьафыкIыгъэ дзэ операцием иветеранхэм ыкIи ахэм яунагъохэм арысхэм IофшIэн ягъэгъотыгъэныр, икIэрыкIэу егъэджэжьыгъэнхэм яIофыгъохэр фондэу «Хэгъэгум иухъумакIохэр» зыфиIорэм ишъолъыр къутамэ инэплъэгъу ригъэкIыхэрэп.

Ащ фэгъэхьыгъагъ шъолъыр фондым ипащэу ПIатIыкъо Аслъан АР-м цIыфхэм IофшIэн ягъэгъотыгъэныгъэнымкIэ къулыкъум и ГъэIорышIапIэ ипащэ дыриIэгъэ зэIукIэгъур.
IофшIэн ягъэгъотыгъэнымкIэ Урысые ермэлыкъым ишъолъыр едзыгъоу мэлылъфэгъум и 12-м Мыекъуапэ щыкIощтым изэхэщэн иIофыгъохэм зэIукIэгъум щатегущыIагъэх. Республикэ филармонием щыкIощт Iофтхьабзэм дзэ операцием къикIыжьыгъэхэу мамыр щыIакIэм хэгъозэжьыхэрэм апае хэушъхьафыкIыгъэ чIыпIэ къыщызэIуахынэу рахъухьагъ. Ащ ишIуагъэкIэ ящыкIэгъэ къэбарыр ахэм агъотыщт. ХэкIодагъэхэм яунагъохэм арысхэм анахьэу анаIэ атырагъэтыщт.
Мыщ фэдэ зэдэлэжьэныгъэ муниципальнэ образованиехэми ащагъэфедэщт. А чIыпIэхэм, федеральнэ едзыгъом къы­дыхэлъытагъэу, IофшIэн ягъэгъотыгъэнымкIэ ермэлыкъхэр мэкъуогъум и 28-м ащызэхащэщтых.
Шъугу къэдгъэкIыжьын, IофшIэн ягъэгъотыгъэнымкIэ Гупчэм иIофышIэ мафэ къэс шъолъыр фондым цIыфхэр зэрэщиштэхэрэр. Ащ пае пэшIорыгъэшъэу зыхэптхэн ищыкIагъэп.