Апшъэрэ еджапIэхэм ащеджэрэ студентхэм апае АР-м хэдзынхэм­кIэ и Гупчэ комиссие мы мафэхэм зэнэкъокъоу «Право выбора» зыфиIорэр афызэхищагъ. Нэбгырэ 50 фэдиз ащ хэлэжьагъ.ДжэгукIэ шIыкIэм тет Iоф­тхьабзэр уцугъуищэу гощыгъагъ. Апэрэм хэдзын правэм ехьы­лIэгъэ упчIэхэм яджэуапхэр студентхэм къаратыжьыгъэх. Анахь джэуап тэрэзыбэ къезытыгъэхэр ятIонэрэм ихьагъэх, нэужым шIэныгъэ дэгъу къэзыгъэлъэгъуагъэхэр ящэнэрэ уцу­гъом пхырыкIыгъэх. КIэухым хэдзынхэр зыщыкIорэ чIыпIэхэм хъугъэ-шIэгъэ зэфэшъхьафхэр къащыхъухэмэ хэкIыпIэу къафагъотын алъэкIыщтхэм ныбжьыкIэхэр къытегущыIагъэх. — УФ-м и Президент ихэ­дзынхэр къызэрэблагъэхэрэм къыхэкIыкIэ упчIэхэр нахьыбэмкIэ зыфэгъэхьыгъэхэр мы кампаниер ары. студентхэм шIэныгъэ дэ­гъухэр къагъэлъэ­гъуагъ. Зэ­нэкъокъум хэлэжьагъэхэм зэ­кIэми сертификатхэр, текIоныгъэр къыдэзыхыгъэхэм дипломхэр ыкIи ахъщэ шIухьафтынхэр афэдгъэхьазырыгъэх. Джащ фэдэу анахь чанэу зыкъэзыгъэлъэгъогъэ нэбгыри­пшIы­мэ шIухьафтынхэр яттыщтых, — къытиIуагъ АР-м хэ­дзынхэмкIэ и Гупчэ комиссие хэтэу Екатерина Дуна­евскаям. Студентхэр мы зэнэкъокъум ашIогъэшIэгъонэу илъэс къэс хэлажьэх. Тхылъым ишIуагъэкIэ агъотырэ шIэныгъэхэм ямы­за­къоу, мыщ фэдэ Iофтхьа­бзэхэми ахэлэжьэнхэм мэхьа­нэшхо зэриIэр апшъэрэ еджэпIитIумэ якIэлэегъаджэу гущы­Iэгъу тызыфэхъугъэхэм къыта­Iуагъ. Iофтхьабзэм къыдыхэлъытагъэу хэдзынхэм афэгъэхьыгъэ видеороликхэр ныбжьыкIэхэм къафагъэлъэгъуагъ, проект зэ­фэшъхьафхэр щыIэныгъэм зэрэщыпхыращыхэрэр къафа­Iотагъ. Зэнэкъокъум текIоныгъэр къы­щыдихыгъ Адыгэ къэралыгъо университетым июридическэ факультет истудентэу Алина Кунашевам, ятIонэрэ чIыпIэр зэдагощыгъ Адамэкъо Дианэрэ Игорь Рябушенкэмрэ, ящэнэрэ хъугъэх Борис Черепахинымрэ Агнесса Барцикянрэ. Анахь чанэу зыкъэзыгъэлъэгъогъэ ныб­жьыкIэхэри агъэшIуагъэх.