НыбжьыкIэхэм я Дунэе фестиваль  зэ­къош­ныгъэм илъэмыдж ­шъыпкъэ хъу­гъэ. ЛIыкIоу къыщы­зэрэугъои­гъэхэр зэхэсыгъомэ, Iэнэ хъураемэ ахэлажьэх, ­гугъэ-гупшысэхэмкIэ, проект хьалэмэтэу зы­дэлажьэхэрэм афэгъэ­хьыгъэ къэбархэмкIэ зэхъожьых, лъэпкъ къа­шъохэр къызэдашIых, орэдхэр къызэдаIох.

АР-м ыкIи Красноярскэ краим къарыкIыгъэ лIыкIо купхэм Урысыем ишъолъыр зэфэшъхьафхэм, Кыргызстан щыщ ныб­жьыкIэхэм зэIукIэгъу дахэ апэрэ мафэм зэхащэгъагъ. ЛIыкIохэр къызэдэшъуагъэх, лъэпкъ шхынхэр ауплъэкIугъэх, нэпэеплъ шIухьафтынхэмкIэ зэхъожьыгъэх.

— Фестивалыр рамыгъажьэзэ ащ хэлэжьэщтхэр хъытыу зэпхыныгъэхэр зэдашIыхэзэ нэIуасэ зэфэхъущтыгъэх, гъэ­хьа­зырын IофшIэнэу зыхэла­жьэхэрэр, агу ихъыкIырэр къы­зэфаIотэжьыщтыгъ, зэшIуа­хыщт Iофтхьабзэхэр зэдагъэ­нафэщтыгъ. ЗэIукIэгъухэр, куль­турнэ, спортивнэ, гъэсэныгъэ программэхэр джыри ныбжьыкIэхэм бэу къапыщы­лъых, — хигъэунэфыкIыгъ АР-м и ЛIышъхьэу КъумпIыл Мурат.

Дунэе фестивалым Адыгэ къэралыгъо университетым ыкIи Мыекъопэ къэралыгъо тех­нологическэ университетым ястудентхэр, зэкIэмкIи нэбгырэ 90-рэ, хэлажьэх. Творческэ зэ­хахьэу «Ошъадэм» фэдэу Адыгэ къэралыгъо университетым икъэшъокIо купэу «Нарт» зыфиIорэри мэфэкI къэгъэлъэ­гъоным хэлэжьэщт. Лъэпкъ къэшъуи 5 ныбжьыкIэхэм къагъэлъэгъощт. Адыгэ филологиемрэ культурэмрэкIэ факульте­тым истудентэу Уджыхъу Айтэч «Адыгэ макъэм» къызэрэфиIотагъэмкIэ, ныбжьыкIэу фестивалым щызэIукIагъэхэм агухэр зэIухыгъэх, ягуапэу нэIуасэ зэфэхъух.

— Адыгэ къэралыгъо университетым ифакультетхэм ащыщэу, сэ сызщеджэрэм нэмыкIэу, IэкIыб къэралыгъуабзэхэмкIэ, юридическэм, филологиемкIэ, хьисапымкIэ факультетхэм ястудентхэр къытхэтых. IэкIыб къэралыгъомэ къарыкIыгъэ лIыкIохэр бэ мэхъух. ТшIогъэшIэгъонэу ахэм тахэплъэ, тякIуалIэ, нэIуасэ та­фэхъу. НыбжьыкIэхэм шъхьадж къыздикIыгъэ къэралыгъом е зыщыщ лъэпкъым яшъуашэхэр ащыгъых. Ялъэпкъ тарихъ къа­Iуатэ, шъуашэхэр къагъэлъа­гъох. ЗэIэпахызэ адыгэ паIор бэмэ зыщалъагъ. Шри-Ланка, Португалием, Бразилием къарыкIыгъэ ныбжьыкIэхэм сэ сшъхьэкIэ нэIуасэ сафэхъугъ. Кыргызстан къикIыгъэ студентым адыгэ быракъыр бгъэхалъхьэу шIухьафтынэу еттыгъэти, ар ежь илъэпкъ шъуашэу ыщы­гъын хилъхьагъ. Адыгэ джэгу шъыпкъэ афызэхэтщэгъагъ. Ти­къашъохэр агу рихьыгъэх. ХьакIэхэм анахь чанэу ахэтхэр къытхэуцохи къыддешIагъэх. Абзэхэр тымышIэрэми, культу­рэм ижабзэкIэ тызэгурэIо! — Айтэч ыгу Iэтыгъэу телефон­кIэ къыддэгущыIагъ, зыхэлэ­жьэрэ Iофтхьабзэм осэ ин зэрэфишIырэр хигъэунэфыкIыгъ.

Джащ фэдэу Мыекъопэ къэ­ралыгъо технологическэ университетым истудентхэри чанэу фестивалым хэлажьэх. Ахэм ащыщхэр АР-м икъэгъэлъэгъуа­пIэу къызэIуахыгъэм тхьама­фэм къыкIоцI хьакIэхэм ащыпэгъокIыщтых. КъэгъэлъэгъуапIэр къухьэлъатэм ыкIоцI фэдэу шIыгъэ. Мыекъуапэ аэропорт щагъэпсымэ бортпроводницэ­хэм яшъуашэхэр зыфэдэн ылъэ­кIыщтым инэпэеплъхэр къэгъэлъэгъуапIэм хьакIэу къе­кIуалIэхэрэм щалъэгъущт. Ахэм адыгэ хэдыкIыным ишапхъэ-

хэр щыгъэфедагъэх. Шъуашэм ­игъу­сэ пилоткэр адыгэмэ пшъэ­шъэ дышъэ пэIо тIаркъоу ашIыщтыгъэм фэдэу дыгъэ.

КIэдэкIое Нэфсэт зипэ-

щэ ушэтэкIо лабораториеу МКъТУ-м хэтым шъуашэхэр щагъэхьазырыгъэх. Ахэр къэзы­гъэлъэгъощтхэр Виктория Луценкэр, Индрыс Зарин, Лъэустэнджэл Зарин ыкIи Анаста-

сия Мергуловар — плIыри я 4-рэ курсым щеджэх, технологиехэмкIэ, экологиемкIэ, экономикэмкIэ ыкIи стоматологиемкIэ факультетхэм ялIыкIох. Пшъашъэхэм ащыщэу Виктория Луценкэм телефонкIэ гущыIэгъу тыфэхъугъ, АР-м икъэгъэлъэгъуапIэу фестивалым щызэIухыгъэм Iоф зэрэщашIэрэр къытфиIотагъ:

— ТIурытIоу зыдгощызэ мэ­фэ ныкъо-ныкъоу Iоф тэшIэ. КъэгъэлъэгъуапIэр мафэ къэс сыхьатыр 11-м щегъэжьагъэу пчыхьэм сыхьатыр 8-м нэс зэIухыгъэ. ХьакIэхэм Адыгеим фэгъэхьыгъэ нэпэеплъ шIухьафтынхэр ятэтых, адыгэ къуаер ятэгъэуплъэкIу. ШIухьафтынхэр зэрылъ зэнэкъокъухэр афызэ­хэтэщэх. ЗэкIэмэ анахь ашIо­гъэ­шIэгъоныр бортпроводницэхэм яшъуашэу тщыгъхэм адыгэ тхыпхъэхэр тыжьын IуданэкIэ ахэдыкIыгъэу зэрэщытхэр ары.

НыбжьыкIэхэм я Дунэе фестиваль гъэшIэгъонэу рекIокIы. Iофтхьэбзэ зэфэшъхьафэу ащ ипрограммэ хэтхэм ныбжьыкIэхэр чанэу ахэлажьэх. Фес­тивалыр гукъэкIыжь хьалэмэтэу, гуIэтыпIэу зэрафэхъущтым щэч хэлъэп.