Лъэпкъ проектэу «Щы­нэгъончъэ ыкIи шэпхъэ­шIухэм адиштэрэ гъогу­хэр» зыфиIорэм ишIуагъэкIэ Мыекъопэ районым иавтомобиль гъогу щыщ IахьиплI 2024-рэ илъэсым агъэцэкIэ­жьыщт.

Автомобиль гъогоу «Аб­дзэхэхьабл — Новосвободнэр» зыфиIорэм километрэ 1,35-рэ хъурэ гъогукIэ щашIыщт, Мыекъуапэ къэзыухьэрэ гъогум щыщ Iахьэу километри 2,3-рэ хъурэр агъэцэ­кIэ­жьыщт, Мыекъуапэ икIырэ гъогоу станицэу Кужорскэм екIуалIэрэм щыщэу километрэ 1,8-рэ ыкIи поселкэу Тульскэм екIо­лIэрэ гъогоу километри 7,3-рэ зикIыхьагъэр агъэ­кIэжьыщтых. 2024-рэ илъэсым ишы­шъхьэIу мазэ ыкIэ нэс гъогушIмэ километрэ 12,75-м гъэцэкIэжьын Iоф­шIэнхэр арашIылIэщтых, ахэм сомэ миллион 296-рэ апэIуагъэхьащт. «Адыгеяавтодорым» къызэрэщаIуагъэмкIэ, ахэр ары гъэцэкIэжьынхэм афэ­гъэзэгъэщтыр. Зэнэкъо­къухэр зырагъэкIокIыхэрэ ужым, гъэтхапэм ыкIэхэм адэжь, подрядчикхэр къэ­нэфэщтых. Зэзэгъыныгъэ зыдашIыщт организацием апэрэ унашъоу фашIырэр гъогоу агъэцэкIэжьырэм тыралъхьащт асфальтым мыжъогъэушкъоигъэ-шэф щыфэр хэлъыныр ары. Ащ гъогур мыфыкъоу нахьыбэрэ щигъэтыщт. «Адыгеяавтодорым» ипащэу Алексей Корешкиным къызэрэхигъэщыгъэмкIэ, шъолъыр гъогу­хэм ягъэцэкIэжьынкIэ зэ­зэгъыныгъэу агъэхьазыр­хэрэр планым ыпэ итхэу зэшIуахых. Шъолъыр ыкIи муниципальнэ гъогухэм яобъект 20-у агъэнэфа­гъэхэм километрэ 43-рэ якIыхьагъ, ахэм Мыекъопэ районэу зигугъу къэтшIырэри ахэт, 2025-рэ илъэсым телъытэгъэ Iоф­шIэнхэу лъэпкъ проек­тымкIэ рахъухьагъэхэм ащыщых. Планым ыпэ итэу Iоф­шIэнхэр зэшIохыгъэнхэр, цIыфхэм ягумэкIхэм анаIэ ренэу атегъэтыгъэныр, анахь къопэ чыжьэм щы­Iэхэми ящыIэкIэ-псэукIэ къыдэлъытэгъэныр зиунашъор Адыгэ Республикэм и ЛIышъхьэу КъумпIыл Мурат ары. Анахь автомобиль ­гъогу дэйхэр ыпэрапшIэу ­лъэпкъ проектымкIэ агъэцэкIэ­жьых. Ащ фэдэхэр шэпхъэ гъэнэфагъэу щыIэхэм ады­рагъэштэжьых, ащ елъы­тыгъэу лъэпкъ проектымкIэ пшъэрылъэу къа­гъэуцурэр гъэцэкIагъэ мэхъу. Непэрэ мафэр пштэмэ, шъолъырхэмкIэ Адыгеим планыр процент 60,1-кIэ агъэцэкIагъ, шъо­лъыр ыкIи муниципальнэ мэхьанэ зиIэ гъогухэмкIэ процент 63,8-м щынагъэсыгъ. Къыхэгъэщыгъэн фае, Мыекъуапэ къэзыухьэрэ автомобиль гъогум иапэрэ чэзыу 2009-рэ илъэсым атIупщыгъагъ. Ащ ишIуагъэкIэ хы ШIуцIэ Iушъом кIорэ зекIохэр нахьыбэ хъущтых, ащ пае «Мые­къуапэ — ТIуапсэ» зыфиIорэ гъогур агъэфедэн алъэкIы.