Адыгеим икъэлэ шъхьаIэ икIэлэеджакIохэм я Спартакиадэ къыдыхэ­лъытэгъэ зэнэкъокъухэр макIох. Футболыр, теннис цIыкIур, во­лейболыр, шахматхэр къызэра­нэкIыгъэх. Зичэзыу къэсыгъэр баскетболыр ары. ЗэхэщакIохэм зэрагъэнэфагъэу, командэ пэпчъ нэбгырищ хэт. Мыекъуапэ илицееу N 34-м щыкIогъэ зэнэкъокъухэм командэ 30 ахэлэжьагъ. Апэрэ купым текIоныгъэр къыщыдахыгъ Мые­къопэ гимназиеу N 22-м (кIа­лэхэм), гурыт еджапIэу N 17-м (пшъашъэхэм). ЯтIонэрэ купым нахь щылъэшыгъэх православнэ гимназием ыкIи гъэсэныгъэм игупчэу N 18-м ялIыкIохэр.