Проектэу «Футбол цIыкIур — еджапIэм» зыфиIорэм къыдыхэлъытэгъэ я 19-рэ Урысые зэнэкъокъухэм Мыекъопэ районым гъэсэныгъэмкIэ игупчэу N 1-м икIэлэеджакIохэр ахэлэжьагъэх ыкIи апэрэ чIыпIэр къащыдахыгъ. 2008 — 2009-рэ илъэсхэм къэхъугъэ кIалэхэр зыхэхьэгъэ республикэ командэм ешIэкIэ дахэ къыгъэлъэгъуагъ. Турнирыр зыщыкIуагъэр Нижегородскэ хэкур ары. КIэух едзыгъом къыдыхэ­лъытагъэу тифутболистхэм зэIу­кIэгъуи 7 яIагъ. Тикомандэ къызщыгъэлъэгъогъэ купым хэтыгъэх Дагъыстан, Камчатскэ краим, Нижегородскэ ыкIи Рязанскэ хэкухэм ялIыкIохэр. Финалым щызэIукIагъэх Адыге­им ыкIи Самарскэ хэкум якомандэхэр. ЕшIэгъум иохътэ шъхьаIэ 2:2-у аухыгъ, ащ къыхэкIыкIэ текIоныгъэр къыдэзыхыщтыр пенальтикIэ къэнэфагъ. Мыекъопэ районым икомандэ нахь лъэшыгъ, пчъагъэр — 3:2. Тиреспубликэ ифутболистхэм апэрэу мыщ фэдэ гъэхъагъэ ашIыгъ. Зэнэкъокъум иящэнэрэ едзыгъо зэрэдагъэзыгъэм къы­хэкIэу джы шъолъырым текIо­ныгъэр къыщыдэзыхыгъэ командэр занкIэу кIэух уцугъом зэрэхафэрэм, ащ фытегъэпсыхьэгъэ зэхъокIыныгъэхэр шапхъэхэм зэрафашIыгъэхэм яшIогъэшхо къызэрэкIуагъэр хигъэунэфы-кIыгъ Урысыем футбол цIыкIумкIэ и Ассоциацие ипрезидентэу Эмиль Алиевым. — Тигухэлъ къыддэхъугъэу сэлъытэ. Къэралыгъом ишъолъыр зэфэшъхьафхэм къарыкIыгъэ командэхэр финал едзыгъом хэлэжьагъэх, ахэр къэзыгъэлъэгъогъэ кIэлэеджакIохэм япчъагъэ минитфым шIокIыгъ. Илъэс 19-м къыкIоцI дгъэцэкIэрэ проектым нэбгырэ миллион 15-м ехъумэ зыщаушэтыгъ. Тизэнэкъокъухэр нахь гъэшIэгъон зэрэхъущтхэм тапэкIи тыпылъыщт, — къыIуагъ Эмиль Алиевым.