Непэ кIымафэм иаужырэ мазэ къехьэ. ЛатиныбзэкIэ «февралым» къикIырэр зыгъэкъэбзэжьыныр ары.

[caption id="attachment_145004" align="aligncenter" width="800"] А. Балабась.[/caption]

Ижъырэ Урысыем мы мазэм илъэсыр зэфи­шIыжьыщтыгъ, ащ къы­хэкIэу «меженькIэ» еджэщтыгъэх. Тэ тикъыблэ лъэ­ныкъокIэ мэзаем зэ­реджэхэрэр «бокогрей». Мафэм инэфынэ уахътэ хахъозэ джы лъыкIотэщт, мэзаем сыхьатитIу фэдиз хэхъощт, ащ къыхэкIэу тыгъэри нахьыбэрэ къе­псыщт.

ГидрометеорологиемкIэ ыкIи тыкъэзыуцухьэрэ дунаим имониторингкIэ Гупчэм ипащэу Александр Митровым тызэрэщигъэ­гъозагъэмкIэ, мэзаем температурэу щыIэщтыр зыпкъ итыщтэп.

Мазэм къыкIоцI арктикэ жьы чъы­Iэр, джащ фэдэу средиземноморскэ лъэныкъом къикIырэ фабэр щыIэщт. Ащ къыхэкIэу «мэзэе ­шъхьаныгъупчъэкIэ» за­джэ­хэрэ мафэхэм фабэр градус 15 — 20-м кIахьэу хъущт. Мы аужырэ илъэс 70-м мэзэе мазэр анахь чъыIэу къызщыхэкIыгъэр 1950-рэ илъэсыр ары, чъыIэу градус 31,6-рэ агъэунэфыгъагъ. 2023-рэ илъэсым мэзаем иапэрэ мафэхэм чъыIэу градус 16 ыкIи аужырэ мэфи­пшIым фабэр градус 22-м кIахьэу щыIагъ.

Мэзэе мазэм ом изытет зыпкъитыныгъэ иIэщтэп, ощх къещхыщт, нэужым ос цIынэр къыкIэлъыкIощт. ГурытымкIэ мазэм къы­кIоцI температурэр ыкIи ощх-осэу къехыщтыр шапхъэхэм анахьыбэщт, гъо­гухэр цIэнлъагъоу къы-­хэ­кIыщт. Къызыщыучъы­Iырэ уахътэм мылыр чъыг­хэм ыкIи электроры­кIуапIэхэм апишIыхьащт. Жьыбгъэр нэгъэупIэпIэ­гъум метрэ 15-м ехъоу къепщэщт.

Апэрэ мэфипшIыр. Чэ­щым чъыIэу градуси 2 — 3 щыIэщт, къыхэ­кIыщт чъыIэр градуси 10-м зыщынэсыщти. Мафэм чъы­Iэр градуси 4-м, фабэр градуси 10-м кIахьэуи къы­хэкIыщт.

ЯтIонэрэ мэфипшIыр. Чэщхэр чъыIэщтых градуси 8-м нэсэу, мафэхэм фабэр градуси 6-м нэсэуи хъущт.

Ящэнэрэ мэфипшIыр. Мэзаем икIэухым ом изытет нахь къэучъыIыщт. Чэщым чъыIэр градуси 7-м, мафэм градуси 5-м анэсыщт. КъыхэкIыщтых мафэхэм фабэр градус 15-м кIахьэу.

Къушъхьэхэм температурэр градуси 6 — 8-кIэ нахь ащычъыIэщт.

Мы мазэм бжыхьасэхэм чъыIэр къягоощтэп.

Псыхъохэм адэт псыр шапхъэу щыIэхэм ашIокIыщтэп. Къушъхьэхэм ателъ осыр къызщигъэжъурэ уахътэм, лъэшэу къызещхырэм псыхъохэм адэт псыр къыдэкIоен ылъэ­кIыщт. КIАРЭ Фатим.