Владимир Путиныр Урысыем и Президент IэнатIэ Iухьаным партиеу «Единэ Россием» зыкIыныгъэ хэлъэу дыригъэштагъ. Я ХХI-рэ зэфэсэу партием иIа­гъэм а IофыгъомкIэ шъхьэ­ихыгъэ мэкъэтыныр щыкIуагъ. Дунэе къэ­гъэлъэгъопIэ форумэу «Урысыер» зыфиIоу ВДНХ-м Москва щызэхащагъэм ар щыкIуагъ. Хэгъэгум ичIыпIэ зэфэшъхьафхэм къарыкIыгъэ нэбгырэ 1000-м ехъу Iофтхьабзэм хэлэжьагъ.

Урысые Федерацием и Президент партием ия ХХI-рэ зэфэс илIыкIохэмрэ ихьакIэхэмрэ шIуфэс къарихыгъ ыкIи къызэрэхигъэщыгъэмкIэ, «Единэ Россиер» хэгъэгум иполитическэ партие анахь инэу щыт.

«Ежь партиеу «Единэ Россием» екIолIэкIэ гъэнэфагъэу иIэм тегъэпсыхьагъэу ащ фэдэ лъы­тэныгъэрэ шъхьэкIэфэныгъэрэ обществэм къыфешIы. ЦIыфхэм яфедэхэм, къэралыгъом игъэпытэн, хэгъэгум ыкIи тишъо­лъыр пстэуми хэхъоныгъэ ашIыным епхыгъэ IофшIэнэу илъэс пчъа­гъэм ыгъэцэкIагъэм ар икIэух. Пстэуми апэу сызэрэшъуфэразэр къэсIонэу сыфай цыхьэшIэгъу IэпыIэгъу къызэрэсэ­шъу­тырэм пае. СэркIэ ащ мэхьа­нэшхо иIэу щыт. Тызэгъусэу ушэтыпIэхэр зэпытчыгъэх, тызэгъусэу гъэхъагъэхэр зэдэтшIы­гъэх, тызэгъусэу джыри бэ зэ­шIотхын фаеу хъущтыр Урысыем ифедэ хэлъэу», — къы­Iуагъ Владимир Путиным.

Президентым къызэрэхигъэщыгъэмкIэ, тихэгъэгу ыпашъхьэ тарихъ мэхьанэ зиIэ пшъэрылъхэр итых. Ахэм язэшIохынкIэ ткIуачIэ зэхэтлъхьан, тихэгъэгу фэшъыпкъэ пстэуми тызэкъотын фае.

«Партиеу «Единэ РоссиемкIэ», къыддезгъаштэхэрэмкIэ ащ къикIырэр IофшIэнышхом изэшIохын, ыпэкIэ лъыкIотэнхэм, джыри нахь гъэхъэгъэ­шхохэр ашIынхэм зэрэфэхьазырхэр ары. Урысыем щыпсэурэ цIыфхэр зэкIэ тигъусэхэу тихэгъэгу исуверенитет, ишъхьафитыныгъэ, ищынэгъончъагъэ къэтыу­хъумэн фае. ДгъэлъапIэу тиIэр зэкIэ — титарихъ, тикультурэ, тишэн-хабзэхэр къэтыухъумэнхэ фае. А пстэуми адакIоу экономикэр, социальнэ лъэныкъор, наукэмрэ технологиехэмрэ япхыгъэ амалэу щыIэхэр нахь дэгъоу, цIыфхэм яфедэ хэлъэу, Урысыем щыпсэурэ унэгъо миллион пчъагъэмэ щыIакIэу яIэр нахьышIу шIыгъэным ди­штэу гъэфедэгъэнхэ фае. Iо хэ­лъэп, анахь мэхьанэ зиIэхэм ащыщ обществэр зэкъотыныр», — къыхигъэщыгъ къэралы­гъом ипащэ.

Адыгеим ыцIэкIэ «Единэ Рос­сием» ия ХХI-рэ зэфэс хэлэжьагъэх партием ишъолъыр къутамэ и Секретарэу, Адыгеим и ЛIы­шъхьэу КъумпIыл Мурат, Урысые Федерацием Адыгеим ыцIэ­кIэ исенаторхэу Хъопсэрыкъо Мурат ыкIи Александр На­ролиныр, Урысые Федерацием и Къэралыгъо Думэ Адыгеим ыцIэкIэ идепутатэу Хьасанэкъо Мурат, партиеу «Единэ Россием» ишъолъыр гъэцэкIэкIо комитет ипащэу АфэшIэгъо Рэмэзан, «Единэ Россием» и Тхьаматэ ишъолъыр общественнэ приемнэ ипащэу Наталья Широковар, партиеу «Единэ Россием» и Генеральнэ совет хэ­тэу Надежда Бражниковар, муниципальнэ образованиеу «Къалэу Мыекъуапэ» инароднэ депутатхэм я Совет идепутатэу Бэрзэдж Асиет. Партием унашъоу ыштагъэм къытегущыIэзэ Адыгеим и ЛIышъхьэ къызэрэхигъэщыгъэмкIэ, политическэ кIочIэ зэфэшъхьафхэм, ныбжь зэфэшъхьаф зиIэхэм, цIыф куп зэмылIэужыгъохэм ялIыкIохэм джырэкIэ Iоф зышIэрэ Президентым зэрэдырагъэштагъэм къикIырэр Владимир Путиныр цIыфхэм цыхьэшхо зыфашIырэ, тихэгъэгу щыпсэурэ пстэуми яфедэхэмрэ яIофыгъохэмрэ икъоу къыдэзылъытэрэ пащэу зэрэщытыр ары. «Урысыем инеущырэ мафэ зыфэдэщтымкIэ Владимир Путиным гугъэпIэ инхэр тицIыфхэм зыкIырапхыхэрэр Iофэу ышIэ­рэмкIэ, зэшIуихыхэрэмкIэ къыгъэшъыпкъэжьыгъэшъ ары цIыф­хэм зэрафэгумэкIырэр, ти Хэгъэгушхо исуверенитет пытэным ынаIэ зэрэтыригъэтырэр. Непэ зыкIыныгъэ ахэлъэу зэфэсым щаштэгъэ унашъом джыри зэ къегъэшъыпкъэжьы Президентым цIыфхэм зэрэдырагъаштэрэр», — къыIуагъ Къум­пIыл Мурат.

Зэфэсым илъэхъан анахьэу анаIэ зытырагъэтыгъэ Iофыгъо­хэм зыкIэ ащыщыгъ хэушъхьафыкIыгъэ дзэ операцием хэла­жьэхэрэмрэ ахэм яунагъохэм арысхэмрэ IэпыIэгъу ятыгъэным иIофыгъо.

Партиеу «Единэ Россием» и Тхьаматэу Дмитрий Мед­ведевым къызэриIуагъэмкIэ, партием хэтхэу заом Iутхэм ыкIи нэмыкI чIыпIэхэм Iоф ащызышIэхэрэм ТекIоныгъэр къагъэблагъэ.

«Ахэр гуфакIохэу заом Iухьагъэхэр арых. Пытагъэрэ лIы­хъужъныгъэрэ зэрахьэхэзэ япшъэрылъхэр ахэм зэшIуахых. ТигуфакIохэу сымэджэщхэм дежурствэр ащызыхьыхэрэм, егъэзыгъэ IофкIэ зышъхьэ езы­хьыжьэжьыгъэхэм ягупсэфынкIэ адеIэхэрэм бэ зэшIуахырэр. Партиеу «Единэ Россием» иобщественнэ приемнэхэм яIофы­шIэхэм цIыфхэр упчIэжьэгъу афэхъух, ахэм яIофыгъохэр амал зэриIэкIэ нахь псынкIэу зэшIохыгъэ хъунхэм яшъыпкъэу дэлажьэх», — къыIуагъ Дми­т­рий Медведевым.

Партиеу «Единэ Россиемрэ» «Гвардие НыбжьыкIэмрэ» чанэу ахэлэжьэрэ нэбгырэ мин пчъа­гъэмэ шIушIэ IэпыIэгъу тонн мин 80-м ехъу къаугъоигъ ыкIи заом Iутхэм аIэкIагъэхьагъ. ШIушIэ гупчэ 40 ыкIи кIэлэ­цIыкIу гупчэ 15 чIыпIэхэм къащызэIуа­хыгъэх. Хэгъэгум ишъолъыр пстэуми къарыкIыгъэ врач ми­ным ехъу сымэджэщхэм Iоф ащашIэнэу кIуагъэх. ШъолъырыкIэу щыIэ хъугъэхэм ащыпсэурэ цIыфхэм адеIэнхэу ныбжьыкIэ чан мини 3 фэдиз кIуагъэ.

«Единэ Россием» ипленарнэ зэхэсыгъо зыщаублэщтым дэжь хэгъэгум ишъолъыр пстэуми ащызэIуагъэкIэгъэ шIушIэ Iэпы­Iэгъур шъолъырыкIэхэм арысхэм алъагъэIэсыным ублапIэ зэрэфашIыгъэр къыщыхагъэщыгъ. Хьылъэзещэ пшIы пчъагъэмэ заом Iутхэм ыкIи шъолъырыкIэхэм яшIоигъоныгъэхэм атегъэпсыхьагъэу псэолъапхъэхэр, гъомылапхъэхэр, Iэзэгъу уцхэр, унагъохэм агъэфедэрэ техникэр, тхылъхэр, гъогу дэйхэм ащызекIон зылъэкIыщт автомобильхэр, джащ фэдэу ИлъэсыкIэм ехъулIэу шIухьафтынхэр аIэкIагъэхьащтых.

ГуфакIохэм, цIыф гумэкIылэ­хэм, депутатхэм, предпринимательхэм хьылъэ тонн 600 фэдиз къаугъоигъ.

АР-м и ЛIышъхьэ ипресс-къулыкъу