Адыгеимрэ Зэхэт Араб Эмиратхэмрэ азы­фагу сатыу зэфыщытыкIэхэр щыгъэпсы­гъэн­хэмкIэ лъэбэкъушIу адзыгъ.

[caption id="attachment_142767" align="aligncenter" width="800"] А. Лаутеншлегер.[/caption]

АР-м предпринимательствэм IэпыIэгъу фэхъугъэнымкIэ и Гупчэ икIэщакIоу Адыгеим илIыкIохэмрэ Зэхэт Араб Эмиратхэм ащылэжьэрэ сатыушI­хэмрэ нэIуасэ зыщызэфэхъу­гъэхэ зэIукIэгъу Мыекъуапэ щыкIуагъ. Щэфын-щэжьыным къыдыхэлъытагъэу Адыгеим къыщыдагъэкIырэр къызIэкIа­гъахьэмэ ашIоигъоу хьакIэхэм къаIуагъ. Мы IэкIыб къэралы­гъом къикIыгъэ нэбгырищ зэIу­кIэгъум къеблэгъагъэх. Ахэр Iофэу зыпылъхэр, зыщылэжьэ­хэрэ къэралыгъом япродукцие зэрэщыIуагъэкIырэр, илъэс зэ­кIэлъыкIохэм хахъоу ашIыгъэр Адыгеим исатыушIхэм къафа­Iотагъ. ТапэкIэ зэдэлэжьэнхэ хъумэ республикэмкIэ ащ федэу хэлъыщтым, тхылъхэр зэрагъэ­псыщтхэм, зэпхыныгъэр зыфэ­дэщтым джащ фэдэу бысымхэр щагъэгъозагъэх.

СатыушIыным ылъэныкъокIэ къэралыгъо пэрытхэм Эмиратхэр ащыщ. УщылэжьэнымкIэ, сатыу щызэхэпщэнымкIэ Iэры­фэгъу дэдэу къыхагъэщы. Мы къэралыгъом щымыщхэу, ау щыпсэухэрэм япчъагъэ ар къеу­шыхьаты. Нэбгырэ миллиони 10-у къыщалъытэрэм ипроцент 89-р фэшъхьаф чIыпIэхэм къарыкIыгъэх. Адыгеим къеблэгъэ­гъэ сатыушIхэри Пакистанрэ Индиемрэ къарыкIыгъэхэу араб къэралыгъом сатыу щагъэпсыгъэу, илъэс пчъагъэ хъугъэу Iоф щашIэ, IэкIыб зэдэлэжьэныгъэми зырагъэушъомбгъу. Ар иушъхьагъоу Адыгеими ахэр къеблэгъагъэх.

«Тэ типшъэрылъыр зэдэлэ­жьэщтхэр зэфэтщэнхэр, сатыу цIыкIум ыкIи гурытым Iоф ­ащы­зышIэхэрэм ахэдгъэхъоныр ары. Ары мыщ фэдэ зэIу­кIэгъу­хэр зыкIызэхатщэхэрэри. Непэ­рэ зэIукIэгъум зэдэлэжьэныгъэ горэ къыкIэлъыкIомэ, тхьапэхэм ягъэпсынкIэ, юридическэ уп­чIэхэмкIэ IэпыIэгъу та­фэхъущт. ЕгъэжьапIэм щыкIэ­дзагъэу кIэ­у­­хым нэсэу тадэлэ­жьэщт», — къыIуагъ АР-м предпринимательствэм Iэпы­Iэгъу фэхъугъэ­нымкIэ и Гупчэ епхы­гъэу Iоф зышIэрэ IэкIыб щэным хахъо егъэшIыгъэнымкIэ гупчэм ипащэу Дыдыхъу Алый.

ЗэIукIэгъу-зэдэгущыIэгъум къыкIэлъыкIоу хьакIэхэр Адыге­им ихъызмэтшIапIэхэм ащыщхэм яблэгъагъэх. ЯIофшIэн зэ­рэгъэ­псыгъэр, къыдагъэкIырэр зыфэ­дэр зэрагъэлъэгъугъ.