«Ростов-на-Дону — Хьаджыкъу» зыфиIорэ гъогум зекIохэр зэрысыгъэ апэрэ мэшIокур зэрэрыкIуагъэм Урысыем мэ­шIоку гъогухэмкIэ икъулыкъу уасэ къыфишIыгъ.

ШэкIогъум и 3-р ары зекIоныр зызэхащагъэр. МэшIокум цIыфхэр бэу исыгъэх. Ахэм Адыгеир лъэшэу агу рихьыгъ. ЗекIо­хэм Хьаджыкъо къыщалъэгъугъэхэмкIэ балли 4,9 — 5-рэ, ГъозэрыплъэкIэ балли 5 агъэуцугъ. Джащ фэдэу фэIо-фашIэхэр мэшIокум зэрэщагъэцэкIагъэхэмкIи, зэрагъэшхагъэхэмкIи, экскурсиехэр зэрэзэхэщагъэ­хэмкIи баллхэр шъхьафэу агъэуцугъэх.

Урысыем мэшIоку гъогу­хэмкIэ икъулыкъу къызэритыгъэмкIэ, зекIохэм ате­гъэ­псыхьэгъэ мэшIокур шэкIогъум къыщегъэжьагъэу гъэтхапэм нэс Адыгеим щызекIощт. 2023-рэ илъэсым шэкIогъум и 17-р, тыгъэгъазэм и 1-р, и 15-р, 2024-рэ илъэсым мэзаем и 23-р, гъэтхапэм и 8-р ары мэшIокур гъогу зытехьащтыр. МэфитIум къыкIоцI зекIохэм Адыгеим илъэ­гъупхъэ чIыпIэ шъхьаIэхэр: къушъхьэ тешъоу Лэгъо­-Накъэ, Рыфабгъо ипсы­къефэххэр, Хьаджыкъо итIо­кIэ зэжъу зэрагъэлъэгъун, Кавказ биосфернэ заповедникым, Мыекъуапэ ипивэшI завод щыIэнхэ, Адыгэ Рес­публикэм итарихъ Лъэпкъ музеим щызэрагъэшIэн, псы Iэзэгъухэм защагъэпсэфын, адыгэ шхыныгъохэр, гущыIэм пае, адыгэ къуаер зы­Iуагъэфэн, мэшIокум исхэу сурэт зытырарагъэхын алъэкIыщт.