Оперуполномоченнэ IофшIэныр бгъэцэкIэным фэшI угукIэ ащ уфытегъэпсыхьэгъэн фаеу елъытэ АР-м хэ­гъэгу кIоцI IофхэмкIэ и Министерствэ уголовнэ лъы­хъу­нымкIэ и ГъэIорышIапIэ истаршэ уполномоченнэу Станислав Клименкэм.

[caption id="attachment_141509" align="aligncenter" width="800"] Сурэтыр авторым ий.[/caption]

— Мы сэнэхьатыр къыхэсхыным бэрэ сегупшысагъэп, сыда пIомэ сятэжъэу, полицием иполковникэу Владимир Симоновыр мы структурэм хэтэу илъэсыбэрэ Iоф ышIагъ. Сятэ мы уахътэм Урысыем и МВД иэкспертнэ-криминалистическэ гупчэу АР-м щыIэм ипащ, полицием иполковник, сянэ майорэу пенсием кIуагъэ. Ахэр сищысэтехыпIэхэу ыкIи ялъагъо сырыкIо сшIоигъоу Ростов дэт юридическэ институтым сычIэхьагъ. Сэнэхьатэу къыхэсхыгъэм зы мафи сырыкIэгъожьырэп. IофшIэным угу фэщагъэу, теубытэгъэ пытэ фыуиIэу урылажьэ хъумэ, къин пылъэп. Пстэуми апэу шъыпкъагъэ ыкIи цIыфыгъэ пхэ­лъынхэ фае. ТиIофшIэн къин, арышъ, кIуачIэу пхэлъым имызакъоу, психологическэу уузынчъэн ыкIи уфэхьазырын, юридическэ шIэныгъэ куу уиIэн, уипшъэ­рылъхэр икъоу бгъэцэкIэнхэмкIэ культурэ пхэлъын фае. Пхъэшагъэр, лIыблэнагъэр, цIыфыгъэр, шъыпкъагъэр — джахэр ары сэ сиIэубытыпIэхэр, — къыIуагъ полицием истаршэ лейтенантэу Станислав Клименкэм.

Институтыр къызеухым, 2019-рэ илъэ­сым Станислав уголовнэ лъыхъуным икъэлэ отдел IофшIэныр щыригъэжьагъ. Ащ илъэси 2,5-рэ уполномоченнэу Iоф щишIагъ. НыбжьыкIагъэ нахь мышIэми, иIофшIакIэ гу лъатагъ ыкIи старшэ опер­уполномоченнэу агъэнэфагъ. От­делым иIофшIэн хэхьэ тыгъон, хъункIэн, гъэпцIагъэ зыхэлъ бзэджэшIагъэхэм якъы­чIэ­гъэщын, джащ фэдэу цIыфхэм ­ямылъку епхыгъэхэр зэкIэ.

— ЛъыхъунымкIэ къэлэ отделым джы­ри Iоф щысшIэ зэхъум бзэджашIэхэм якъыхэгъэщын сыфэгъэзэгъагъ. Мы уахътэм бзэджэшIагъэхэм якъычIэгъэщынкIэ АР-м ичIыпIэ къулыкъухэм Iоф адэсэшIэ. ШэкIогъум и 10-м илъэситIу мэхъу мы IофшIэныр зызгъэцакIэрэр, — къыIуагъ ащ.

БзэджэшIагъэр къычIэгъэщыгъэныр анахь пшъэрылъ шъхьаIэу Станислав иIэхэм ащыщ. Мыщ фэдэ еплъыкIэхэр ыкIи пшъэрылъхэр ренэу зыдиIыгъых ыкIи а лъагъом тетэу рэкIо. БэмышIэу ежьыр хэлажьэзэ зэхафыгъэ бзэджэшIагъэм игугъу къытфишIыгъ. Осэшхо зиIэ хьап-щыпхэр зыщащэрэ тучанэу «Золото России» зыфиIоу Мыекъуапэ дэтыр захъункIэм, ар зышIэгъэ бзэ­джашIэм икъычIэгъэщын хэлэжьагъ. ПсынкIэ Iофэу бзэджэшIагъэ зезыхьагъэр зыфэдэр, ар зыдэщыIэр агъэунэфыгъ. Нэужым Москва ар къыщаубытыгъ. Мы уахътэм хьапсым ар чIэс.

— Мафэ къэс цIыф зэфэшъхьафхэм Iоф адэтшIэнэу мэхъу. Сэнэхьатэу Iоф зэрэсшIэрэмкIэ цIыфым ипсихологие дэгъоу ущыгъозэн фае. БзэджэшIагъэм икъычIэгъэщынкIэ ар зезыхьагъэу зэгуцафэхэрэм цыхьэ къызэрэпфишIырэм бэ елъытыгъэр. IофшIэнэу згъэцакIэрэм емылъытыгъэу, гукIэгъуныгъэ схэлъ. Бэ­рэ къыхэкIы ежьым ыкIи исабый цIыкIу ашхын, зыдэщыIэн зэрямыIэм къыхэкIэу тыгъон бзэджэшIагъэхэр зэрахьэхэу. Ащ фэдэхэм сыгу ягъу нахь мышIэми, хэбзэгъэуцугъэу щыIэр сыу­къон сыфитэп… Шъыпкъэ, къулыкъушIэ пэпчъ иIофшIэн къины. Ау цIыфым ила­жьэ шъыпкъагъэ хэлъэу бгъэунэфыныр, зэрар зэрахыгъэм ­илъэIу фэбгъэцэкIэныр, бзэджашIэм пшъэ­дэ­кIыжь ебгъэ­хьыныр Iоф псынкIэп, ащ мэхьанэшхо иI, — еIо С. Клименкэм.

Полицием икъулыкъушIэ къызэриIуагъэмкIэ, ныбжьыкIэ дэдэу уголовнэ лъыхъуным иотдел IофшIэныр щыригъэ­жьагъэшъ, нэмыкI горэм ригъэпшэнэуи хъурэп. Аущтэу щытын фаеуи еплъы, сэ­нэхьатэу къыхихыгъэм рыкIэгъожьэу къыхэкIыгъэп, рыраз. ЦIыфым ишэн-гъэ­псыкIи бэ зэрелъытыгъэр къыгурэIо. ШIэныгъэр зэбгъэгъотын плъэкIыщт, ау шэн теубытагъэ уимыIэ хъумэ, IофшIэныр къин къыпфэхъущт. Арышъ, апэрапшIэу цIыфыр психологическэу Iоф­шIэным фэхьазырын фае. Сыда пIомэ бэрэ къыхэкIы IофшIэныр афэмыукIо- чIэу IукIыжьхэу.

— IофшIэныр къин хъумэ, ар щыIэныгъэмкIэ лъэшэу зэхэошIэ. Оперуполномоченнэм охътабэ IофшIапIэм щи­гъэкIон фаеу мэхъу. Унагъо, сабыйхэр уиIэхэ хъумэ, ар тIэкIу къин мэхъу, арэу щытми, IофшIэным уфэщагъэу, шIу ­плъэгъу хъумэ ащи уесэжьы. Сэ зызгъэпсэфынэу охътабэ сиIэп. Арэу щытми, сиунагъо сыхэсэу уахътэр зэрэзгъэ­кIощтым сыпылъ. Унагъо сиI, сишъхьэгъусэрэ сэрырэ шъэожъые зэдэтэпIу, ащ илъэси 5 ыныбжь, — къыIуагъ полицием икъулыкъушIэ.

Гъэхъагъэхэр ышIыхэзэ иIофшIэн зэригъэцакIэрэм фэшI С. Клименкэм АР-м хэгъэгу кIоцI IофхэмкIэ и Минис­терствэ щытхъу тхылъхэр къыфигъэ­шъошагъэх. IофшIэным дакIоу Станислав спортым пылъ. 2019-рэ илъэсым къыщыублагъэу дзюдомрэ самбэмрэкIэ къулыкъум зэхищэрэ зэнэкъокъухэм ахэлажьэ, текIоныгъэр мызэу, мытIоу къыдихыгъ.

КIАРЭ Фатим.