Мы илъэсым ыкIэм ехъулIэу почтэ зэпхыныгъэм икъоджэ къутэмэ 12-у муниципальнэ образование зэфэшъхьафхэм арытхэр агъэкIэжьыщтых.

Хэгъэгум и Президент пшъэрылъ къызэрафишIыгъэм тетэу ыкIи партиеу «Единэ Россием» иIэпыIэгъу хэлъэу 2022-рэ илъэсым хэгъэгум ипочтэ къутамэхэм ягъэкIэжьын епхыгъэ IофшIэныр аублагъ.

Мы лъэхъаным Мые­къопэ районымкIэ псэу­пIэу Каменномостскэм гъэцэкIэжьын Iофхэр етIупщыгъэу щэкIох. 1910-рэ илъэсым ашIыгъэгъэ унэм зэ ныIэп гъэцэкIэжьын цIыкIухэр зырашIылIэгъагъэхэр, джы «Урысыем ипоч­тэхэр» зыфиIорэм икъу­тамэ зэхъокIыныгъэ­шхохэр фэхъух. ЖъоныгъуакIэм ыкIэхэм адэжь квадрат метри 100 фэдиз хъурэ унэм ыкIоцIкIи ыкIыбкIи гъэцэкIэ­жьынхэр рашIылIагъэх, подряднэ организацием дэпкъхэр зэхихыгъэх, жъы хъугъэ пхъэ джэхашъохэр, шъхьаныгъупчъэхэр зэблихъу­гъэх. Унэм ыгупи агъэцэкIэжьыщт, ащ дакIоу нэмыкI Iофтхьабзэхэри зэшIуахыщтых. Сэ­къатныгъэ зиIэхэм апае пандусхэр агъэуцугъэх. Iоныгъом ыгузэгухэм адэжь IофшIэнхэр зэкIэ аухыщтых.