Партиеу «Единэ Россием» ипрограммэ пхырыщыгъэным къыдыхэлъытагъэу фельдшер-мамыку IэзапIэхэм яигъэкIотыгъэ гъэцэкIэжьын Адыгеим щэкIо.

Джэджэ районымкIэ псэу­пIэу Гончаркэм ифельдшер-мамыку IэзапIэ зэ­хъо­кIыныгъэ инхэр фашIы­гъэх. 2024-рэ илъэсым IофшIэнхэр зэшIуахынхэу агъэнэфэгъагъ, ау нахь пасэу ахэр агъэцэкIэнхэ алъэкIыгъ. ПстэумкIи сомэ миллиони 3,5-рэ фэдиз гъэцэкIэжьыным пэ­Iухьагъ.

1988-рэ илъэсым къы­щыублагъэу псэупIэу Гончаркэм а IэзапIэр дэт, цIыфхэр зыщыпсэухэрэ унэм иапэрэ къат еубыты. А уахътэм къыкIоцI гъэцэ­кIэжьын цIыкIу горэ ра­шIылIэгъагъ ныIэп. Непэ нэбгырэ минрэ ныкъорэ фэдиз мыщ щэпсэу ыкIи игъом медицинэ IэпыIэгъу цIыфхэм ятыгъэным мэхьа­нэшхо иI. Мыщ вакцинэхэр щахалъхьэх, цIыфхэм япсау­ныгъэ изытет щауплъэкIу, нэмыкI Iофтхьабзэхэри щызэшIуахых.

Мы илъэсым жъоныгъуа­кIэм ыкIэхэм адэжь жъы хъугъэ конструкциехэр зэ­блахъухэу рагъэжьагъ, подряднэ организацием ащ къыщыублагъэу гъэцэкIэ­жьын IофшIэнхэр зэкIэ ыухыгъэх. Унэм ыгупи зэ­хъо­кIыгъэ хъугъэ, дэкIояпIэ­хэр зэблахъугъэх, сэкъатныгъэ зиIэхэм апае шъхьа­фэу ашIыгъэх. Мы лъэхъэнэ благъэхэм IэзапIэм ипчъэ­хэр къафызэIуихыщтых.