Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец республикэм и Правительствэ и Унэ зэIукIэгъу щадыриIагъ хэушъхьафыкIыгъэ дзэ операцием ишъолъыр щыфэхыгъэ генерал-лейтенантэу Олег Цоковым иIахьылхэм.

Мы зэIукIэгъум рагъэблэгъа­гъэх янэу Алла Цоковар, ишъхьэ­гъусэу Елена Цоковар ыкIи ыкъоу Борис Жериховыр.

Урысыем и Президентэу Владимир Путиным и УказкIэ Къыблэ дзэ округым ипащэ игуадзэу, генерал-лейтенантэу Олег Цоковым идунай зехъожь нэужым Урысыем и ЛIыхъужъы­цIэ фагъэшъошагъ.

Республикэм и ЛIышъхьэу КъумпIыл Мурат ыцIэкIэ Урысыем и ЛIыхъужъ игупсэхэм афэтхьаусыхагъ АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец.

«Къулыкъур дэзыхьыгъэ­хэм къызэраIотагъэмкIэ, те­убытагъэ зыхэлъ офицер бланэу ар щытыгъ, кIырыплъыщтыгъэх, зыгорэм ыкIыб зыкъуигъэбылъы­хьан шэн хэлъыгъэп. Командир шъыпкъэу, цIыф шъып­къэу, ыIэ илъ цIыф­хэм афэгумэкIэу, ящыIэ­кIэ-псэукIэ епхыгъэ Iофыгъо горэ къэуцугъэми ащ изэшIохын хэлажьэу щытыгъ. Олег Юрий ыкъор уихэгъэгу узэрэфэшъыпкъэн фаемкIэ, лIыхъужъныгъэ зе­хьэгъэ­нымкIэ щысэу хъугъэ. Къыт­кIэхъухьэхэрэмкIэ, тидзэкIолIхэмкIэ ренэу ар щысэтехыпIэщт», — къы­Iуагъ Владимир Свеженец.

Къэралыгъо тын лъапIэр — Урысыем и ЛIыхъужъыцIэ къызэрэфагъэшъошагъэр къэзыушыхьатырэ Жъуагъор Къыблэ федеральнэ шъолъырым идзэ­хэм япащэ игуадзэу, генерал- лейтенантэу Алексей Авдеевым иIахьылхэм къаритыжьыгъ.

«Олег Юрий ыкъор егъэшIэ­рэу тыгу илъыщт, джащ фэдэу апсэ пэтыфэ зипшъэрылъ зыгъэцэкIэгъэ тидзэкIолIхэми яблэнагъэ тщыгъупшэщтэп», — къы­Iуагъ Алексей Авдеевым. Мы зэIукIэгъум хэлэжьагъэх АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард, федеральнэ инспектор шъхьаIэу Сергей Дрокиныр, АР-м идзэ комиссарэу Александр Авериныр.

Мыщ къекIолIагъэхэр генерал-лейтенантым игупсэхэм афэтхьаусыхагъэх, Iофэу зыфэгъэзэгъагъэмкIи ицIыфыгъэкIи шIу ехъу епIолIэнэу зэрэщымытыр, пшъэрылъ къинхэм ягъэцэкIэнкIэ ренэу пшъэдэкIыжьэу ыхьырэр икъоу зэрэзэхишIэщтыгъэр къаIуагъ.

Олег Цоковым иIахьылхэм республикэм ипащэхэм ыкIи Къыблэ дзэ округым пэщэныгъэ дызезыхьэхэрэм анаIэ къызэратырагъэтырэм ыкIи гущыIэ фабэхэр къызэраIуагъэхэм апае зэрафэразэхэр къыхагъэщыгъ. ЛIыхъужъым ыкъоу Борис ятэ илъагъо рыкIонэу унашъо ышIыгъ, дзэ училищым чIэхьанэу зегъэхьазыры.

ИкIэухым зэIукIэгъум хэлажьэ­хэ­рэм къаIуагъ дзэкъулыкъу­- шIэм ыкъоу Борис ищыкIэгъэ IэпыIэгъур зэрэратыщтыр. Ащ нэмыкIэу Урысыем и ЛIыхъу­жъэу Олег Цоковыр ащымыгъупшэным пае Мыекъуапэ иурамхэм ащыщ горэм ыцIэ фэусыгъэн фаеу зэралъытэрэр къыхагъэщыгъ.

Шъугу къэтэгъэкIыжьы: илъэс 51-рэ хъугъэ генерал-лейтенантэу Олег Цоковым М. Фрунзем ыцIэкIэ щыт дзэ академиемрэ апшъэрэ команднэ училищэу Ташкент дэтымрэ къыухыгъэх. Темыр дзэ округым къулыкъур щихьыгъ, Чэчэным щы­кIогъэ Iэшэ зэпэуцужьыны­гъэм хэлэжьагъ. 2011 — 2014-рэ илъэсхэм Мыекъуапэ къулыкъур щихьыгъ, Къыблэ дзэ округым ия 49-рэ армие ия 33-рэ хэушъхьафыкIыгъэ шхончэо бригадэ ипащэ игодзагъ. Къэралыгъо тынхэр иIэх. Сирием щыкIогъэ заом хэлэжьэгъагъ, къыщауIэгъагъ. 2022-рэ илъэсым мэзаем къыщыублагъэу Урысыем ифедэхэр Донбасс къыщиу­хъумагъэх. 2023-рэ илъэсым бэдзэогъум и 11-м Бердянскэ дэжь щыIэ команднэ пунктым ракетэр къызеом ащ щыфэхыгъ. Къалэу Мыекъуапэ щагъэтIы­лъыгъ. ИIахьылхэмрэ къулыкъур дэзыхьыгъэхэмрэ анэмыкIэу нэбгыришъэ пчъагъэ ащ къекIо­лIэгъагъ, Адыгеим и ЛIышъхьэ, республикэм ихэбзэ къулыкъу­хэм япащэхэр ыкIи ялIыкIохэр ащ щыIагъэх.

АР-м и ЛIышъхьэ ипресс-къулыкъу