Мэрэтыкъо Анзор Аслъан ыкъор
ТичIыпIэгъоу, къалэу Москва и Къыблэ административнэ кой ипрокурорэу щытыгъэ Мэрэтыкъо Анзор игъонэмысэу дунаим ехыжьыгъ.
Лъэпкъэу къызхэкIыгъэм ыкъо шIагъоу ар щытыгъ, Iофэу зыфэгъэзагъэм хэшIыкI дэгъу фыриIагъ, иIофшIэгъухэми ичIыпIэгъухэми лъытэныгъэ ин къыфашIыщтыгъ.
Мэрэтыкъо Анзор жъоныгъуакIэм и 9-м, 1972-рэ илъэсым Мыекъуапэ къыщыхъугъ. 1996-рэ илъэсым Пшызэ къэралыгъо университетыр къыухыгъ. 1998-рэ илъэсым прокуратурэм икъулыкъухэм IофшIэныр ащыригъэжьагъ. Охътэ зэфэшъхьафхэм Краснодар краим, Къалмыкъ Республикэм япрокуратурэхэм къулыкъур ащихьыгъ. 2008-рэ илъэсым къыщегъэжьагъэу Москва ипрокуратурэ Iоф щишIагъ.
ШIэныгъэ куу зэриIэм ыкIи IэпэIэсэныгъэ ин зэрэхэлъым яшIуагъэкIэ Анзор Аслъан ыкъом IофшIэнымкIэ гъэхъагъэхэр ышIыщтыгъэх. Къалэу Москва ипрокуратурэ пшъэдэкIыжь зыхэлъ IэнэтIэшхо ащ щиIыгъыгъ, законыр укъуагъэ мыхъуным, цIыфхэм яфедэхэр къэухъумэгъэнхэм иIахьышхо ахишIыхьагъ.
Мэрэтыкъо Анзор цIыфышIоу, Iушэу, зэфагъэ хэлъэу щытыгъ. ЦIыфхэм уафэлэжьэныр пшъэрылъ лъапIэу ащ ылъытэщтыгъ, гуетыныгъэ хэлъэу рихъухьагъэхэм афакIощтыгъ.
А пстэуми ягъусэу илъэныкъо гупсэ, ичIыпIэгъухэм ыгукIэ лъэшэу афэщэгъагъ, хымэ лыуз щымыIэу ылъытэщтыгъ, хэти ишIуагъэ ригъэкIыным ыуж итыгъ. ЦIыфхэм апашъхьэ шIушIагъэу щыриIэхэр ащыгъупшэщтхэп.
Адыгэ Республикэм и ЛIышъхьэу КъумпIыл Мурат Мэрэтыкъо Анзор Аслъан ыкъом иунагъорэ иIахьылхэмрэ афэтхьаусыхэ.