Адыгэ Республикэм хабзэр щымыукъо­гъэным фэгъэзэгъэ Координационнэ зэIукIэм изэхэсы­гъо АР-м и Прави­тельствэ и Унэ щыкIуагъ.

Республикэм и ЛIышъхьэу, Координационнэ зэIукIэм и Тхьа­матэу КъумпIыл Мурат пшъэрылъ зэрэфишIыгъэм тетэу Урысые Федерацием щынэгъон­чъэнымкIэ и Федеральнэ къулыкъу и Гъэ­IорышIапIэу Адыгэ Республикэм щыIэм ипащэу Михаил Кемеровым ар зэри­щагъ.

Iофыгъоу зытегущыIагъэхэм анахь шъхьаIэхэм зыкIэ ащыщ хэбзэукъоныгъэхэм гъогур афызэпыбзыкIыгъэныр. Ащ хэхьэ лъэпкъ ыкIи федеральнэ проектхэм япхырыщын республикэм зыщыкIорэ лъэхъаным къолъхьэ тын-Iыхыным епхыгъэ бзэджэшIагъэу зэрахьэхэрэм апэуцужьыгъэныр.

Федеральнэ казначействэм и ГъэIорышIапIэу Адыгеим щыIэм ипащэу Жэнэ Мурат къызэриIуагъэмкIэ, мэзищ тешIэ къэс республикэм щызэшIуахын фэе проектхэм ягъэцэкIэнкIэ къэбарыр цIыфхэм игъом алъы­гъэIэсыгъэным дэлажьэх. 2022-рэ илъэсым уплъэкIун Iофтхьэбзи 6 зэшIуахыгъ, 2023-рэ илъэ­сым – планым къыдилъытэрэ Iофтхьэбзэ 12. Хэбзэукъоны­гъэу къыхагъэщыгъэхэм ялъытыгъэу тхылъхэр афагъэхьыгъэх, ахэм пшъэрылъ щафашIы хэбзэукъоныгъэм лъапсэ фэхъугъэр дагъэзыжьынэу. ЕджэпIи 5-мэ, кIэлэцIыкIу IыгъыпIи 3-мэ, зыныбжь хэкIотагъэхэм апае унэ-интернатэу «Активное долголетие» зыфиIорэм икъутамэ гъэпсыгъэнхэмкIэ, искусствэхэмкIэ кIэлэцIыкIу еджапIэу N 6-р зэтегъэпсыхьэгъэнымкIэ, унэу «Налмэсым» игъэцэкIэжьынкIэ IофшIэнхэр зэшIозыхыщтхэм зэзэгъыныгъэ гъэнэфагъэхэр адашIыгъэх. Ащ нэмыкIэу инфраструктурэ проектхэмкIэ Iоф­тхьэбзи 6-мэ апэIухьащт мылъкур зэрагъэфедэщтым епхыгъэ Iофыгъохэр зэшIуахых.

Мы Iофыгъом къэралыгъо зэзэгъыныгъэхэу бюджет мылъкум игъэфедэн епхыгъэу щытхэр хъызмэтыр зезыхьэхэрэм зэрагъэцакIэхэрэм илъыплъэн агъэ­лъэшынэу пшъэрылъ афашIыгъ. Къэбар ыкIи телекоммуникационнэ технологиехэр къызыфагъэфедэхэзэ, шхъухьэшIагъэу зэрахьэхэрэм гъунэ афэшIыгъэ­ным тегъэпсыхьэгъэ Iофтхьабзэхэми атегущыIагъэх. Адыгэ Республикэм хэгъэгу кIоцI Iоф­хэмкIэ иминистрэ ипшъэрылъхэр зыгъэцэкIэрэ Лъэустэнджэл Махьмудэ къызэриIуагъэмкIэ, мы илъэсым республикэм зэдэгущыIэгъу 92947-рэ щадыряIагъ, анаIэ нахь зытырагъэтын фэе IофыгъохэмкIэ зэрэзекIощтхэм япхыгъэу тхьэпэ 74604-рэ аратыгъ. «КурьеркIэ» зэджагъэхэр зыхэлэжьэгъэ бзэджэшIагъэхэм ягъэунэфынкIэ къалэу Мые­къуапэ Iофтхьэбзабэ щызэра­хьагъ. Нафэу зэрэщытымкIэ, ахъщэр Iэрылъхьэу «курьеркIэ» зэджагъэхэм къаратыщтыгъ. Джащ фэдэ бзэджэшIэ 20-м щыщэу нэбгыри 8 агъэунэфыгъ, ахэм «курьерхэм» япшъэрылъхэр агъэцакIэщтыгъэх. Ащ нэмыкIэу Адыгэ Республикэм хэгъэгу кIоцI IофхэмкIэ и Министерствэ иподразделениехэм уголовнэ Iоф 57-мэ яхэплъэн зэшIуахы. Ахэм нэбгырэ 58-рэ ахэщагъэу щыт. Мы лъэны­къомкIэ Iофэу ашIэрэр агъэлъэ­шыщт, къэбар-коммуникационнэ технологиехэр бзэджэшIэным ылъэныкъокIэ къызыфэзгъэфедэхэрэм апэуцужьыгъэнымкIэ отделение гъэнэфагъэ зэха­щагъ, ащ ипшъэрылъыр зигугъу къэтшIыгъэ бзэджэшIагъэхэр къы­хэгъэщыгъэнхэр ыкIи ахэм япхыгъэ Iофхэр зэхэфыгъэнхэр ары.

НепэкIэ анахь зигъо Iофыгъо­хэм зыкIэ ащыщ тимэзхэр машIом щыухъумэгъэнхэр. Адыгэ Республикэм мэзхэмкIэ и ГъэIорышIапIэ ипащэу Былымыхьэ Рэщыдэ къызэриIуагъэмкIэ, 2023-рэ илъэсым пыкIыгъэ мазэхэм къакIоцI республикэм имэз фонд щыщэу гектар 1,32-м гъогогъуищэ машIом зыкъыщиштагъэу агъэунэфыгъ. Ар къызыхэкIыгъэр уцыжъ гъугъэ­хэм къызэракIэнэгъагъэр ары. А мэфэ дэдэу машIор къызыхагъэщыгъэм ар агъэкIосэжьын алъэкIыгъ. Мэз хъызмэтым зэрар ыхьыгъэп. Адыгэ Республикэм мэзхэмкIэ и ГъэIорышIапIэ икъулыкъу пстэуми ящыкIэгъэ техникэр яI мэзым машIом зыкъыщиштэмэ агъэкIосэжьыным пае. Гъэмэфэ лъэхъаным машIом зыкъыштэным анахьэу ищынагъо зэрэщыIэм елъытыгъэу цIыфхэм ренэу агу къагъэ­кIыжьынхэ фае мыщкIэ шап­хъэу щыIэхэр. Муниципалитетхэм игъо афалъэгъугъ я 5-рэ классым хэхьэрэ гумэкIыгъо зэрэщыIэм къыхэкIэу сакъыныгъэ ин къызыхагъэфэныр къыдэзылъытэрэ режимыр агъэуцунэу.

Зэхэсыгъом къыщаIуагъэхэм ялъытыгъэу унэшъо заулэ аш­тагъ, Адыгэ Республикэм и ЛIышъхьэ ахэр гъэцэкIагъэ хъун­хэм ренэу ынаIэ тырегъэты.

АР-м и ЛIышъхьэ ипресс-къулыкъу