Хэдзынхэм зафагъэхьазыры
Къихьащт Iоныгъо мазэм и 10-м мэкъэтыным и ЗыкI мафэ зэхащэщт. Ащ къыдыхэлъытагъэу Мыекъуапэ ыкIи Мыекъопэ районым народнэ депутатхэм яхэдзынхэр ащыкIощтых.
ПстэумкIи хадзын фаер 46-рэ, кандидатэу хэлэжьэщтхэр нэбгырэ 203-рэ мэхъу. Ахэм ащыщэу 155-мэ зыкI хэдзыпIэ округхэмкIэ, 45-мэ зы мандат зиIэ округхэмкIэ зыкъагъэлъэгъуагъ.
АР-м хэдзынхэмкIэ и Гупчэ комиссие итхьаматэу Сэмэгу Нурбый къызэриIуагъэмкIэ, участковэ хэдзыпIэ комиссиехэм яIофшIэн шышъхьэIум и 25 — 30-м рагъэжьэщт. Хэдзынхэр зыщыкIощтхэм зэкIэми видеокамерэхэр ачIэтых. Бюллетеньхэр зыщаратыжьыгъэхэм къыщыублагъэу ахэм зэпымыоу алъэплъэх ыкIи къагъэгъунэх.
ПэшIорыгъэшъ Iофтхьабзэхэр хэбзэухъумэкIо къулыкъухэм зэхащагъэх. АР-м хэгъэгу кIоцI IофхэмкIэ иминистрэ иIэнатIэ зыгъэцэкIэрэ Лъэустэнджэл Махьмуд къызэриIуагъэмкIэ, хэдзыпIэ участкэхэр пэшIорыгъэшъэу ауплъэкIугъэх, къагъэгъунэх. Хэдзынхэр зыщыкIощтхэ мафэм участкэхэм ачIахьэхэрэр зэрауплъэкIущт пкъыгъохэр агъэфедэщтых.