ТелефонхэмкIэ бзэджэшIагъэу зэрахьэхэрэр нахьыбэ зэрэхъугъэм Урысыем хэгъэгу кIоцI IофхэмкIэ и Министерствэ шъунаIэ тырышъуегъадзэ: ахэм хэбзэнчъэу нэмыкI абонент номерхэр къызфа­гъэфедэх.

Криминальнэ Iофэу зэкъуадзэхэрэм ащагъэфедэрэ телефон номерхэр банкхэм е хэгъэгу кIоцI IофхэмкIэ къулыкъухэм яподразделение зэфэшъхьафхэм яенхэ ылъэкIыщт.

Мары а Iофыр зэрэзэкIэлъыкIорэр: цIыфым имынэIуасэ горэ къыфытео, банкым иIофышIэу къыреIо ыкIи бзэджашIэхэм банкым ащ ыцIэкIэ ахъщэ чIыфэ къыIахын мурад яIэу къэбар къы­лъегъэIэсы. ЦIыфым гурагъаIо ежь-ежьырэу чIыфэр онлайн шIыкIэм тетэу ыгъэпсынэу ыкIи картэм къихьэгъэ ахъщэр Iэрылъхьэу къаIихынышъ, «резерв счеткIэ» заджэхэрэм ригъэхьанэу. Такъикъ заулэ зытешIэкIэ, а бзэджэшIэ купым хэт горэ къыфытеошъ, къыреIо поли-цием зэрэхэтыр ыкIи банкым илIыкIохэу ыпэкIэ къытеогъагъэхэм зыфаIуагъэхэр зэкIэ ыгъэцэ­кIэнхэу. Гухэлъ бзаджэ зиIэм фэкъулаеу джырэ технологиехэр къызфегъэфедэх.

Урысыем хэгъэгу кIоцI IофхэмкIэ и Министерствэ цIыфхэм къяджэ сакъыныгъэ къызхагъэфэнэу, шапхъэу щыIэхэр агъэцэкIэнэу.

Апэрэр: телефонымкIэ зыгорэм шъузэрэзекIон фаеу къышъуиIохэрэр шъумыгъэцакIэ.

Банкым е полицием ялIыкIохэу къызышъуа­IокIэ, финанс организациехэм ыкIи хэбзэухъу­мэкIо къулыкъухэм яофициальнэ номерхэмкIэ шъуафытеу.

Банк картэхэм яреквизитхэр, пин-кодхэр, парольхэр зыми ешъумыIох. ЗыгорэкIэ шъо шъушъхьэкIэ е шъуиблагъэ горэмкIэ хэбзэнчъа­гъэ къыжъудызэрахьэмэ, телефонэу 02-м (мобильнэмкIэ 102-м) ащ лъыпытэу шъутеу.

Адыгеим хэгъэгу кIоцI IофхэмкIэ и Министерствэ къэбархэмкIэ иотдел