Урысые Федерацием и Къэралыгъо быракъ и Мафэ фэгъэхьыгъэ Iофтхьабзэхэр непэ республи­кэм икъэлэ шъхьаIэ игупчэ щыкIуагъэх.

[caption id="attachment_137931" align="aligncenter" width="800"] Сурэтыр: А. Балабась.[/caption]

Мы Iофтхьабзэхэм ахэлэжьагъэх АР-м иминистрэхэм я Кабинет хэтхэр, АР-м и Къэралыгъо Совет – Хасэм идепутатхэр, общественнэ объединениехэм, ветеран организациехэм, патриотическэ клубхэм, научнэ ыкIи творческэ интеллигенцием, ныбжьыкIэхэм, дин конфессиехэм ялIыкIохэр.

Адыгеим и ЛIышъхьэу КъумпIыл Мурат республикэм щыпсэухэрэм шIуфэс тхылъэу зыкъызэрафигъэзагъэм мырэущтэу къыщеIо: «Гербымрэ гимнымрэ ягъусэу Урысые къэралыгъом итамыгъэ шъхьаIэхэм быракъыр зыкIэ ащыщ, тихэгъэгу ишъхьафитыныгъэ, итарихъ ыкIи икультурэ, неущрэ мафэм ицыхьэ зытелъыжьэу зэрэфакIорэм, цIыф лъэпкъыбэмэ зыкIыныгъэ­рэ зэдегъэштэныгъэрэ азыфагу илъэу Урысыем зэрэщыпсэу­хэрэм ар яшыхьат».

ЛIышъхьэм ипсалъэ къызэрэщыхигъэщыгъэмкIэ, хэгъэгум къырыкIощтымкIэ пшъэдэкIыжь ин зэрэтхьырэр непэ лъэшэу зэхэтэшIэ. Мэхьанэшхо зиIэ хъугъэ-шIагъэхэу, Урысыем ищынэгъончъагъэ, ащ къырыкIощтыр, хэгъэгум щыпсэурэ цIыф миллион пчъагъэмэ ящы­IакIэ зыфэдэщтыр зэлъытыгъэ­хэр къызэкIэлъэкIох.

[caption id="attachment_137932" align="aligncenter" width="800"] Сурэтыр: А. Балабась.[/caption]

Адыгэ Республикэм и ЛIышъхьэу КъумпIыл Муратрэ депутатхэмрэ ацIэкIэ мы Iофтхьабзэм къекIолIагъэхэм шIуфэс къарихыгъ АР-м и Къэралыгъо Совет – Хасэм и Тхьаматэ игуадзэу Цэй Эдуард.

Ащ къызэриIуагъэмкIэ, Урысыем ибыракъ къэралыгъошхом ибыракъэу, цIыф лъэпкъ зэфэшъхьафыбэмэ ыкIи дин зэмылIэужыгъохэр зылэжьыхэрэм языкIыныгъэ итамыгъэу зэрэщытыр зэрэдунаеу щызэлъашIэ.

«Наукэм, спортым, культурэм алъэныкъокIэ Урысыем щыпсэухэрэм а быракъым чIэтхэу гъэхъэгъэшIухэр ашIыгъэх, пыим текIощтыгъэх, тикъэралыгъо ыкIуачIэ агъэпытэщтыгъ. Непэ а быракъым чIэтхэу дзэкIолI­хэмрэ офицерхэмрэ Донбасс имамыр щыIакIэ къагъэгъунэ, Урысыем ищынэгъончъагъэ анаIэ тырагъэты. ЗэкIэ тидзэкъу­лыкъушIэхэм тафэлъаIо лIы­хъужъныгъэ зэрахьанэу ыкIи текIоныгъэр къыдахыгъэу псын­кIэу къагъэзэжьынэу!», — къы­Iуагъ Цэй Эдуард.

Ащ къызэрэхигъэщыгъэмкIэ, Адыгэ Республикэм щыпсэу­хэрэм язэкъотныгъэ, Хэгъэгум къырыкIощтым зэригъэгумэкIыхэрэм атегъэпсыхьагъэу Урысыем къэралыгъо гъэпсыкIэу иIэр джыри нахь гъэпытэгъэным яIахьышхо хашIыхьэ.

Къалэу Мыекъуапэ ипащэу Геннадий Митрофановым къызэриIуагъэмкIэ, кIуачIэм, шIошъ­хъуныгъэм, зэфагъэм, уи Хэ­гъэгу шIу зэрэплъэгъун фаем ятамыгъэу щыт шъор зиIэ быракъым чIэтхэу Хэгъэгум итарихъыкIэ непэ агъэпсы.

«ЗэкIэми зэдытипшъэрылъыр къыткIэхъухьэхэрэр къэралыгъо тамыгъэхэм анаIэ атетэу, ахэм мэхьанэшхо зэряIэр къагурыIоу, я Хэгъэгу лъытэныгъэ ин фыряIэу тпIунхэр, Хэгъэгушхом епэсыгъэ цIыфхэу ахэр къэтэджынхэр ары», — къыIуагъ Геннадий Митрофановым.

Нэужым республикэм ыкIи муниципалитетхэм ятворческэ коллектив анахь дэгъухэр зыхэ­лэжьэгъэ концерт къэзэрэугъо­игъэхэм къафагъэлъэгъуагъ.

АР-м и ЛIышъхьэ ипресс-къулыкъу