ХэушъхьафыкIыгъэ дзэ операцием епхыгъэ Iофыгъохэм афэгъэзэгъэ IофшIэкIо купым иилъэсныкъо IофшIэн зэфэхьысыжьэу фэхъугъэхэр зэрытхэгъэ яхэнэрэ докладыр Президентым фагъэхьыгъ, ар къыIопщыгъ купым ипащэу, «Единэ Россием» и Генеральнэ совет исекретарэу Андрей Турчак.

«ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм зыкъызэрэтфагъэзэгъэ Iофыгъо мин 28-мэ тадэлэжьагъ. ГумэкIыгъуабэ дэдгъэзыжьыгъ — хэукъоныгъэ хэхъухьагъэу дзэм дащыгъэхэм къядгъэгъэзэжьыгъ, Iашэ зищыкIагъэхэм ядгъэгъотыгъ, ахъщэ тынхэр къафыдэтхыгъэх, зы­гъэпсэфыгъо уахътэр къафы­хэтхыгъ ыкIи нэмыкIыбэ», — къыIуагъ ащ.

IофшIэкIо купым зыкъызэрэфагъэзэгъэ Iофыгъохэм апкъ къикIэу федеральнэ хэбзэгъэуцугъэ пчъагъэ аштагъ. «Ахэм ащыщ Донбасс къэзыгъэгъунагъэхэр зэо зэутэкIхэм яветеранхэу лъытэгъэнхэр, хэушъхьафыкIыгъэ дзэ операцием хэлэжьагъэхэм ыпкIэ амытэу юри­дическэ IэпыIэгъу ягъэгъотыгъэныр, ежьхэри якIалэхэри апшъэрэ еджапIэхэм ачIэхьанхэмкIэ квотэхэр ятыгъэнхэр, нэмыкI IэпыIэгъухэр», — къыхигъэщыгъ IофшIэкIо купым ипащэ.

Ежь яшIоигъоныгъэкIэ заом щыIагъэхэу, хэушъхьафыкIыгъэ дзэ операцием хэлэжьагъэхэр зэзэгъыныгъэ шIыкIэм техьа­жьыхэ хъумэ яIэпэIэсэныгъэ къы­дэзылъытэщт хэбзэгъэуцугъэм джырэ уахътэм дэлажьэх.

IофшIэкIо купым къыгъэхьазырыгъэ законопроект заулэ къыхалъхьэгъах ыкIи бжыхьэ зэхэсыгъом щыхэплъэнхэу щытых. Ахэм ащыщых хэушъхьафыкIыгъэ дзэ операцием хэлажьэзэ фэхыгъэхэм е хьылъэу къауIагъэхэм чIыфэу ателъы­гъэхэр афэгъэгъужьыгъэнхэр. Джащ фэдэу Къэралыгъо Думэм ыгъэхьазырырэ законопроектым къыделъытэ хэушъхьафыкIыгъэ дзэ операцием хэлэжьагъэхэр IофшIапIэм зыштэхэрэр социальнэ предпринимательхэм афагъэдэнхэр.

УхъумэкIо къулыкъухэм ахэтыгъэ къулыкъушIэхэу хэкIуа­дэ­хэрэм яунагъомэ унапкIэу къаратынэу щытыгъэр къафэ­гъэнэ­жьыгъэным фэгъэхьыгъэ законо­проектри агъэхьазырыгъ. Шъо­лъырым елъытыгъэу а тынхэр сомэ миллиони 2,7-м къыще­гъэжьагъэу миллиони 5-м нэсы.

Гъэтхэ зэхэсыгъоу блэкIы­гъэм щаштэгъэ хэбзэгъэуцугъэр зыфэгъэхьыгъагъэр мобилизацием хэфагъэхэм IофшIэгъу уахътэу афызэпагъэугъэм те­фэрэ ахъщэ IэпыIэгъур япащэмэ къаратызэ ашIынэу къыделъытэ.

ХэушъхьафыкIыгъэ дзэ операцием иIофыгъохэм афэгъэзэгъэ IофшIэкIо купыр Президентым иунашъокIэ зэхащагъ. Ащ пащэу фашIыгъэр Федераци­емкIэ Советым ипащэ иапэрэ гуадзэу, «Единэ Россием» и Генсовет исекретарэу Андрей Турчак ары. Купым хэхьагъэх федеральнэ палатитIумэ ыкIи зэкIэ парламент партиехэм, зыкъэухъумэжьыгъэнымкIэ Министерствэм ялIыкIохэр, общественникхэр, дзэ корреспондентхэр.

ДзэкIолIхэм ыкIи ахэм яунагъохэм афэгъэхьыгъэ феде­ральнэ IэпыIэгъоу щыIэр зэкIэ Адыгеим щагъэцакIэ, шъолъыр фэгъэкIотэныгъэ заули ахэм ахагъэхъуагъ.

ХэушъхьафыкIыгъэ дзэ операцием хэлажьэрэмэ ясабыйхэр ыпкIэ хэмылъэу кIэлэцIыкIу IыгъыпIэхэм агъакIох, еджапIэ­хэми колледжхэми ыпкIэ хэмылъэу ащагъашхэх. Мобилизацием хэфагъэхэм якIалэхэм зэтыгъоу сомэ мин 20 зырыз араты, унагъохэм адэIэпыIэх.

Джырэ уахътэм нэмыкI къэралыгъо IэпыIэгъухэми ягу­пшы­сэх. Партиеу «Единэ Россием» ишъолъыр къутамэ ­лъэпкъ про­граммэр ыгъэцакIэ зыхъурэм апэ ригъэшъырэр дзэкIолIхэм яунагъохэм адеIэнхэр, яшIуагъэ арагъэкIыныр ары.

«Муниципалитет пэпчъ ащыIэ штабмэ яIофшIэн депутатхэр чанэу хэлажьэх ыкIи пащэхэм, къэралыгъо фондэу «Хэгъэгум иухъумакIохэр» зыфиIорэм ягъу­сэхэу дзэкIолIмэ яунагъомэ ящыкIэгъэ IэпыIэгъур зэкIэ ара­гъэгъоты. Ащ фэшъхьафэу, пар­ламентым зыкъызэрэфагъэзэрэ Iофыгъо пэпчъ зэхэтэфы, нэбгырэ пэпчъ джэуапэгъу тыфэхъу. Ащ фэдэ зэдэлэжьэныгъэм къыкIакIо хэбзэгъэуцугъэхэм зэхъокIыныгъэхэр афэшIыгъэнхэр, цIыфмэ тазэрадеIэрэ лъэныкъохэм зядгъэушъомбгъуныр», — къыхигъэщыгъ ­Адыгэ ­Республикэм и Къэралыгъо Совет — Хасэм и Тхьаматэу Владимир Нарожнэм.