ШышъхьэIум имэфэ огъухэм машIом зы­къыштэным ищынагъо нахь лъэш хъугъэ. Джащ фэдэу тыгъуасэ Мыекъуапэ икъэлэ гъунэ уц гъугъэм къыщыкIани квадратнэ метрэ мини 3-м атетыр истыкIыгъ.

[caption id="attachment_137875" align="aligncenter" width="800"] Сурэтыр: ОшIэ-дэмышIэ IофхэмкIэ Министерствэр.[/caption]

АпэрэмкIэ къызкIэнагъэр квадратнэ метрэ 500 зэрагъэу­нэфыгъагъэр. МэшIогъэкIосэ машинитфырэ къулыкъум иIофышIэхэу нэбгырэ 17-рэ машIом къызщыкIэнагъэм агъэкIуагъэх. Сыхьат заулэ зытешIэм уц гъу­гъэр зыщыстырэ чIыгур на-хьыбэ зэрэхъугъэр къэнэфагъ. ОшIэ-дэмышIэ IофхэмкIэ Ми­нистерствэм ишъолъыр ГъэIоры­шIапIэ ипресс-къулыкъу къызэритыгъэмкIэ, машIом зыкъызщиштэгъагъэр квадратнэ метрэ мини 3-м нэсыгъагъ. Мые­къо­пэ мэшIогъэкIосэ гарнизоным итехникэ амал зэкIэ агъэ­федагъ. МашIом упэшIуекIоныр къэзгъэ­хьылъэщтыгъэхэм ащыщ ом изы­тет. Тхьамэфэ заулэ хъу­гъэу шъолъырым мафэм фабэу градус 36-рэ къыщегъэлъагъо.

[caption id="attachment_137876" align="aligncenter" width="800"] Сурэтыр: ОшIэ-дэмышIэ IофхэмкIэ Министерствэр.[/caption]

МашIом игъэкIосэнкIэ штаб зэхащагъэу къулыкъушIэхэр ошIэ-дэмышIэ Iофым пэуцугъэх. Пчыхьэм сыхьатыр бгъу хъункIэ такъикъ пшIыкIутф иIэжьэу ма­шIор зэрэщытэу зэрагъэкIосагъэм икъэбар ошIэ-дымышIэ IофхэмкIэ Министерствэм къытыгъ.

Тэхъутэмыкъое районым, къутырэу Северо-Восточные сады джащ фэдэу мы охътэ благъэм къазщыкIэнэгъэгъэ чIыпIэхэр къыхэкIыгъагъэх. Мы ошIэ-дэмышIэ Iофхэм зыпари фыкъуагъэ ащыхъугъэп, машIор ащагъэкIосэжьыгъ.

МашIом шъолъырым зыкъыщиштэн зэрилъэкIыщтымкIэ я 4-рэ класс зиIэ щынагъор зэ­рэщагъэунэфырэм фэгъэхьыгъэ мэкъэгъэIухэр мэшIогъэкIосэ къулыкъум къешIых. ЦIыфхэм сакъыныгъэ къызхагъафэзэ IофшIэгъу ыкIи зыгъэпсэфыгъо мафэхэм ар зыщагъэгъупшэ хъущтэп.