Адыгэ Республикэм икъушъхьэлъэ чIыпIэ ятфэнэрэу щызэхащэгъагъ сэнаущыгъэ зыхэлъ ныбжьыкIэхэм язэхахьэу «Фыщт» зыфиIорэр.

[caption id="attachment_137858" align="aligncenter" width="800"] Сурэтыр: М. Гордышов[/caption]

2023-рэ илъэсым бэдэд ащ къекIолIагъэр — Урысыем и Къыблэ ишъолъыри 5-мэ къарыкIыгъэ нэбгырэ 400 фэдиз. Адыгеим иныбжьыкIэхэм ягъу­сэхэу къушъхьэу Фыщт ылъапсэ екIолIагъэхэм ахэтыгъэх Къэрэщэе-Щэрджэсым, Къэбэртэе-Бэлъкъарым, Краснодар краим ыкIи Къалмыкъым къарыкIыгъэ­хэр. Ахэм ахэтыгъэх кIэлэеджа­кIохэр, студентхэр, гуфакIохэр, ныбжьыкIэ ыкIи студент организациехэм ялIыкIохэр, Iоф зышIэрэ ныбжьыкIэхэм ащыщ­хэр.

Адыгеим и ЛIышъхьэу КъумпIыл Мурат хъугъэ-шIэгъэ гъэшIэгъоным къытегущыIэзэ къызэрэхигъэщыгъэмкIэ, зэхахьэу «Фыщтым» ныбжьыкIэхэм хабзэм илIыкIо къулыкъухэм шъхьэ­ихыгъэ зэдэгущыIэгъу адыряIэнымкIэ мэхьанэшхо иIэу щыт.

«ТиныбжьыкIэхэр ары респуб­ликэм инеущырэ мафэ, ащ иэкономикэ ыкIи хэхъоныгъэу ышIыщтыр зэпхыгъэхэр. Джары ныбжьыкIэ политикэм, сэнаущыгъэ зыхэлъхэм IэпыIэгъу ятыгъэным иIофыгъохэм лъэшэу тынаIэ зыкIатедгъэтырэр. Мыщ фэдэ зэхахьэм ишIуагъэкIэ кIэ­лэеджакIохэр, студентхэр, ныбжьыкIэ организациехэм ялIыкIохэр гъэпсын IофшIэным нахь хэщагъэ мэхъух, ягухэлъхэмкIэ зэдэгуащэх, IофтхьэбзакIэхэу игъоу алъэгъухэрэм ягугъу къа­шIы. Iо хэлъэп, ащкIэ ренэу ти­шIуагъэ ядгъэкIыщт, еджапIэхэм къащыублагъэу шъолъыр лъэгапIэм нэсыжьэу», — къы­Iуагъ КъумпIыл Мурат.

Мы зэхахьэм щыIагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м гъэсэныгъэмрэ шIэныгъэмрэкIэ иминистрэ ипшъэ­рылъхэр зыгъэцакIэу Евгений Лебедевыр, АР-м культурэмкIэ иминистрэу Аулъэ Юрэ, АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч, АР-м мэкIу-мэщымкIэ иминистрэу Къуанэ Анзаур, АР-м финансхэмкIэ иминистрэу Виктор Орловыр, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, АР-м зекIонымкIэ ыкIи зыгъэпсэфыпIэхэмкIэ и Комитет итхьаматэу Былымгъот Ибра­хьим, республикэм имуниципальнэ образование пстэуми япащэхэр. «Фыщтым» ихьэкIагъэх Олимпийскэ чемпионэу Мудрэнэ Беслъан, хэушъхьафыкIыгъэ дзэ операцием иветеранэу Илья Донцовыр.

Яворовэ гъэхъунэм къикIыхи лъэсэу зекIохэр шъхьэегъэзыпIэу «Фыщт» зекIуалIэхэм, Ады­геим имуниципалитет пэпчъ Урысыем икъыблэ шъолъырхэм яныбжьыкIэхэр ягъусэхэу ятворчествэ къагъэлъэгъуагъ.

Апэрэ мафэм пчыхьэм Адыгеим ихэбзэ къулыкъухэм ялIыкIохэмрэ ныбжьыкIэхэмрэ зэ­дэгущыIэгъу зэдыряIагъ. Адыгэ Республикэм иминистрэхэм я Кабинет хэтхэм зэхахьэм хэлажьэхэрэм къафаIотагъ ныбжьыкIэ политикэу республикэм щыпхыращырэм фэгъэхьыгъэу. Джащ фэдэу проектхэу зыгъэ­псэфыпIэу «Лэгъонакъэ», промышленнэ паркэу «Инэм» социальнэ лъэныкъомкIэ Iофхэм язытет хэпшIыкIэу нахьышIу хъунымкIэ яшIуагъэ къэкIощт, къэралыгъо ыкIи лъэпкъ проект­хэми цIыфхэм ящыIакIэ нахь зыкъырагъэIэтыщт. Республикэм финансхэм алъэныкъокIэ иIоф­хэм язытети нэсыгъэх.

Адыгеим ихэбзэ къулыкъухэм ялIыкIохэм зэхахьэм хэлажьэ­хэрэм къаIэтыгъэ Iофыгъохэм джэуапхэр аратыжьыгъэх. Ахэр зыфэгъэхьыгъагъэхэр лъэпкъ культурэмрэ шэн-хабзэхэмрэ къэухъумэгъэнхэр, зекIоным, спортым, наукэм хэхъоныгъэ ашIыныр, ныбжьыкIэ ыкIи волонтер организациехэм, движение зэфэшъхьафхэм IэпыIэгъу ятыгъэныр ары. Пчыхьэм адыгэ джэгурэ дискотекэрэкIэ зэхахьэр аухыгъ.

Мы илъэсым «Фыщт» ипрограммэ заулэу зэтеутыгъагъ: гъэсэныгъэм, культурэм, спортым ыкIи зекIоным япхыгъэхэу ахэр щытыгъэх. Мы зэхахьэм хэлажьэхэрэр Фыщт имылы- лъэ цIыкIу щыIагъэх, гъэсэныгъэм епхыгъэ лекциехэм ядэIугъэх, тренингхэм, джащ фэдэу лъэпкъ IэшIагъэхэмкIэ мастер- классхэм ахэлэжьагъэх, яшIэныгъэхэм ахэгъэхъогъэным те­лъытэгъэ фильмхэм яплъы­гъэх.

Джащ фэдэу мы программэм ГТО-м ишапхъэхэр тыгъэнхэм, волейболымкIэ, биатлонымкIэ, кIапсэр зэпэкъудыигъэнымкIэ, щэбзащэмкIэ щэрыонхэм япхыгъэ Iофтхьабзэхэр къыдилъытэщтыгъэх.

Сэнаущыгъэ зыхэлъ ныбжьыкIэхэм язэхахьэу «Фыщтым» изэхэщэнкIэ IэпыIэгъу къафэхъу­гъэх Шъэумэн Хьазрэт ыцIэкIэ щыт ШIушIэ фондымрэ Кавказ къэралыгъо чIыопс биосфернэ заповедникэу Х.Г. Шапошниковым ыцIэкIэ щытымрэ.

АР-м и ЛIышъхьэ ипресс-къулыкъу